.jpg)
យុវតី ធា សុជាតិតា និង ឈុំ សុគន្ធារី។ រូបថត សហការី
ភ្នំពេញៈ ផ្ដើមពីពាក្យ ១ ឃ្លាថា ស្ត្រីវិលចង្ក្រានមិនជុំ បន្តមកដល់ពាក្យ «ការងារនេះជាការងារមនុស្សប្រុស» ឬ «កុំរៀនអីវាជាជំនាញសិស្សប្រុស» បានធ្វើឱ្យយុវតីជាច្រើនរូបបាត់បង់ឱកាសក្នុងវិស័យការងារមួយចំនួន និងធ្វើឱ្យយុវតីមួយចំនួនធំងាកទៅចាប់ជំនាញដែលខ្លួនពុំចូលចិត្តតែស្របតាមនិន្នាការនៃសង្គមការងារ។
យ៉ាងណាមិញ ផ្ទុយពីការដើរតាមទំនោរសង្គមក៏មានយុវតីក្លាហានមួយចំនួនតូចដែលជម្នះផ្នត់គំនិតទាំងនេះ ចាប់រៀនជំនាញដែលខ្លួនស្រឡាញ់ពេញចិត្ត និងឱកាសការងារខ្ពស់បើទោះសង្គមយល់ថា ជាជំនាញសម្រាប់បុរសក៏ដោយ។
កញ្ញា ធា សុជាតិតា ជាយុវតីម្នាក់ដែលមានទស្សនៈថា៖ «ស្ត្រីក៏អាចរៀន ឬធ្វើការដូចបុរស» បានដើរតាមក្ដីស្រឡាញ់របស់ខ្លួនចាប់រៀនជំនាញដ៏កម្រមួយគឺជំនាញ វិស្វកម្មរថយន្ត នៅវិទ្យាស្ថានបច្ចេកទេសឧស្សាហកម្ម។
យុវតីវ័យ ១៨ ឆ្នាំរូបនេះបានឱ្យដឹងពីការយល់ឃើញរបស់ខ្លួន និងការចាប់ជំនាញសិក្សាដែលកម្រមានសិស្សស្រីចាប់យកនេះថា «បានជាខ្ញុំជ្រើសរើសជំនាញវិស្វកម្មរថយន្តព្រោះក្ដីស្រឡាញ់ខាងរថយន្ត ចង់ទទួលយកបទពិសោធន៍ថ្មី និងងាយស្រួលរកការងារធ្វើ»។
សុជាតិតា បានបញ្ជាក់បន្ថែមថា ដោយសារតែប្រទេសកម្ពុជារីកចម្រើន សម្បូរអ្នកជិះរថយន្តច្រើន ធ្វើឱ្យការងារនេះមានទីផ្សារខ្ពស់ ហើយក្រៅពីនេះជំនាញនេះក៏អាចធ្វើជាគ្រូបង្រៀនបានដែរ។
ដ្បិតជំនាញដែលខ្លួនកំពុងសិក្សាជួបផលវិបាកមួយចំនួនដូចជា មានសំឡេងឮខ្លាំងពេលអនុវត្ត ត្រូវធ្វើការជាមួយនឹងម៉ាស៊ីនធ្ងន់ និងពិបាកធ្វើការជាមួយប្រុសៗបន្តិច តែយុវតី សុជាតិតា នៅតែចង់ជំរុញឱ្យយុវតីដទៃទៀតរៀនជំនាញដូចខ្លួននេះព្រោះខ្លួនយល់ថា សិស្សស្រីនឹងមានអាទិភាពការងារខ្ពស់ជាងបុរស ហើយថែមទាំងទទួលបានការលើកទឹកចិត្តពីលោកគ្រូអ្នកគ្រូ មិត្តភក្ដិ ក៏ដូចជានៅកន្លែងការងារផង។
សុជាតិតា បន្តថ្លែងថា៖ «ខ្ញុំយល់ថា ការរៀនជំនាញនេះមានអត្ថប្រយោជន៍ចំពោះស្ដ្រីព្រោះពេលដែលចេញទៅធ្វើការ យើងមិនត្រូវតែទៅជួសជុលដូចជាបុរសនោះទេ យើងអាចនៅក្នុង Office ជាអ្នកបច្ចេកទេសទំនាក់ទំនង និងផ្ដល់ព័ត៌មានផ្សេងៗ»។
ចំណែកឯយុវតីម្នាក់ទៀតគឺកញ្ញា ឈុំ សុគន្ធារី ដែលជានិស្សិតឆ្នាំទី២ នៅសាកលវិទ្យាល័យភូមិន្ទវិចិត្រសិល្បៈ ជំនាញស្ថាបត្យកម្ម ដែលជាជំនាញសិក្សា១ប្រភេទដែលកម្រមានសិស្សស្រីរៀននោះ ក៏បានរៀបរាប់ស្រដៀងគ្នានេះថា ដោយសារតែក្ដីស្រឡាញ់ចំពោះជំនាញមួយនេះ និងមិនចង់ឱ្យមានពាក្យថា ជំនាញនេះមិនសមនឹងមនុស្សស្រីរៀន ទើបខ្លួនសម្រេចជម្នះដើរតាមបេះដូងរបស់ខ្លួន។
កញ្ញា សុគន្ធារី បានឱ្យដឹងថា៖ «ទី១ ដោយសារតែចំណង់ចំណូលចិត្ត ខ្ញុំស្រឡាញ់ជំនាញនេះតាំងពីថ្នាក់ទី១០ មកម្ល៉េះ ទី២ គឺដោយសារខ្លួនចង់បំបាត់ពាក្យថា ជំនាញស្ថាបត្យកម្មមិនសមនឹងមនុស្សស្រី ហើយចង់បង្ហាញពីភាពច្នៃប្រឌិត និងទេពកោសល្យដែលមនុស្សស្រីមាន និងកត្តាសំខាន់បំផុតក៏ដោយសារខ្ញុំទទួលបានការលើកទឹកចិត្តពីក្រុមគ្រួសារ និងលោកពូដែលជាស្ថាបត្យករស្រាប់»។
យុវតីវ័យ ២០ឆ្នាំរូបនេះក៏បានរៀបរាប់ពីផលវិបាកមួយចំនួនក្នុងការសិក្សាជំនាញទាំងនេះ តែក៏នៅតែចង់ជំរុញយុវតីដទៃរៀនជំនាញស្ថាបត្យកម្មដូចខ្លួន។ សុគន្ធារី បន្តថា ដូចជាគ្រប់គ្នាដឹងស្រាប់ថា ជំនាញនេះមិនសូវមាននិស្សិតស្រីរៀននោះទេ បើពួកគាត់ចូលរួមនោះអាចនឹងផ្ដល់សិទ្ធអំណាចដល់ស្ត្រីដទៃឱ្យហ៊ានចូលរៀន និងអាចបំបាត់ពាក្យថា ជំនាញសម្រាប់បុរសជាដើម។
កញ្ញា សុគន្ធារី ថែមទាំងបានលើកទឹកចិត្តទៅដល់ស្ត្រីដែលរៀន ឬធ្វើការលើជំនាញដែលគេយល់ថា ជាជំនាញបុរសបែបនេះ «បើតាមគំនិតខ្ញុំ យើងជាស្ត្រីយើងមានភាពខ្លាំង ហើយគួរហ៊ានធ្វើអ្វីដែលខ្លួនស្រឡាញ់ចង់ធ្វើ និងត្រូវគិតថា បុរសធ្វើបានយើងក៏អាចធ្វើបានដូចគ្នា ព្រោះខ្ញុំគិតថា វាដូចមិនមានអ្វីខុសឆ្គងទេ ហើយខ្ញុំចង់ឱ្យបុរសចូលរួមលើកទឹកចិត្តស្ត្រីដែលធ្វើការ ឬរៀនលើជំនាញទាំងនេះ»។
ក្នុងពិធីអបអរសាទរទិវាអន្តរជាតិនារី ៨មីនា ខួបលើកទី១១២ នៅវិមានសន្តិភាព រាជធានីភ្នំពេញ កាលពីព្រឹកថ្ងៃអង្គារ ទី៧ ខែមីនា ឆ្នាំ២០២៣ លោកនាយករដ្ឋមន្ត្រី ហ៊ុន សែន បានថ្លែងជំរុញឱ្យគ្រប់ភាគីពាក់ព័ន្ធអនុវត្តការងារអាទិភាព ៨ចំណុច ផ្ដោតលើការបញ្ជ្រាបយេនឌ័រ និងលើកតម្លៃស្ត្រី ហើយក្នុងនោះចំណុចអាទិភាពទី៤ ជាចំណុចមួយដែលជំរុញស្ត្រី និងយុវតីចូលរួមក្នុងវិស័យដែលមានគម្លាតយេនឌ័រខ្ពស់។
នាយករដ្ឋមន្ត្រីនៃព្រះរាជាណាចក្រកម្ពុជា បានឱ្យដឹងថា៖ «ចំណុចទី៤ បង្កើនការចូលរួមរបស់ស្ត្រី និងក្មេងស្រី ក្នុងវិស័យឌីជីថល វិទ្យាសាស្ត្រ បច្ចេកវិទ្យា វិស្វកម្ម សិល្បៈ ច្នៃប្រឌិត និងគណិតវិទ្យា STEM ដើម្បីកាត់បន្ថយគម្លាតយេនឌ័រក្នុងវិស័យឌីជីថល និងការពង្រីកកម្មវិធីបណ្ដុះបណ្ដាលវិជ្ជាជីវៈដល់ស្ត្រី»៕
