ស្វាយរៀងៈ មន្ត្រីយោធាចូលនិវត្តន៍ម្នាក់ត្រូវបាននគរបាលព្រហ្មទណ្ឌខេត្តស្វាយរៀងកសាងសំណុំរឿងបញ្ជូនទៅតុលាការ ដើម្បីបន្តតាមនីតិវិធីបន្ទាប់ពីឃាត់ខ្លួនករណីបំផ្ទុះគ្រាប់បែកទៅក្នុងផ្ទះគូទំនាស់បណ្ដាលឱ្យមនុស្សក្មេង-ចាស់ ប្រុស-ស្រី ចំនួន ៦ នាក់រងរបួស ធ្ងន់ និងស្រាល។
ប្រធានការិយាល័យព្រហ្មទណ្ឌនៃស្នងការដ្ឋាននគរបាលខេត្តស្វាយរៀង លោក កឹម ឡៃ បានប្រាប់ ភ្នំពេញ ប៉ុស្តិ៍ នៅថ្ងៃទី ៩ ខែមីនាថា ជនសង្ស័យឈ្មោះ អ៊ុំ ផា អាយុ ៦៩ ឆ្នាំ ជាមន្ត្រីយោធាចូលនិវត្តន៍ មានលំនៅក្នុងភូមិព្រៃគាវ ឃុំកំពង់ចក ស្រុករំដួល ត្រូវបាននគរបាលស្រុករំដួល ចាប់ខ្លួនបានភ្លាមៗកាលពីយប់ថ្ងៃទី ៧ ខែមីនា ឆ្នាំ ២០២៣ បន្ទាប់ពីគាត់គប់គ្រាប់បែកដៃចូលក្នុងផ្ទះបងថ្លៃជីដូនមួយគាត់បណ្ដាលឱ្យផ្ទុះរងរបួសមនុស្ស ៦ នាក់ក្នុងនោះមានទាំងកុមារ អាយុ ៣ ឆ្នាំ ចំនួន ២ នាក់ផងដែរ។
លោកបានបញ្ជាក់ថា៖ «តាមចម្លើយសារភាពរបស់ជនសង្ស័យករណីបំផ្ទុះគ្រាប់បែកនោះគឺបណ្ដាលមកពីគាត់មានគំនុំគុំកួនជាមួយបងថ្លៃជីដូនមួយរបស់គាត់ពាក់ព័ន្ធរឿងទំនាស់ព្រំដី»។
លោក កឹម ឡៃ បានបន្តថា ជនសង្ស័យបានរៀបរាប់ថា មុនកើតហេតុគឺនៅព្រឹកថ្ងៃទី ៧ ខែមីនា ជនសង្ស័យបានប្រើប្រពន្ធ ឱ្យទៅសុំការអនុញ្ញាតពីបងប្រុសជីដូនមួយរបស់អ្នកស្រី ឈ្មោះ ជេត ចាន់ថន អាយុ ៦៤ ឆ្នាំ ដើម្បីប្រើជញ្ជាំងរបងផ្ទះរួមគ្នា ប៉ុន្តែត្រូវបានប្រពន្ធបងប្រុសគាត់ ឈ្មោះ ហ៊ឹង សុវណ្ណ អាយុ ៦៣ ឆ្នាំ បដិសេធ ហើយក៏មានការឈ្លោះប្រកែកគ្នាខ្លាំង។ លុះដល់ល្ងាច[ថ្ងៃដដែល] ជនសង្ស័យបានជួបជុំផឹកស៊ីជាមួយក្រុមជាងដែលមកសង់ផ្ទះគាត់។
បន្ទាប់ពីស្រវឹងស្រាស្រឿងៗគាត់ក៏នឹកឃើញសម្ដីឈ្លោះគ្នាជាមួយបងថ្លៃស្រីគាត់ពីព្រឹក ក៏ដើរទៅរើសាក់កាដូចាស់ៗ កាលពីគាត់នៅធ្វើទាហាន ហើយក៏ឃើញមានសល់គ្រាប់បែកដៃ ១ គ្រាប់ ក៏យកទៅគប់ចូលក្នុងផ្ទះបងថ្លៃបណ្ដាលឱ្យផ្ទុះត្រូវរបួសធ្ងន់ស្រាលមនុស្ស ៦ នាក់។
លោកកឹម ឡៃ បានបន្ថែមថា៖ «តាមចម្លើយសារភាពរបស់ជនសង្ស័យ មន្ត្រីនគរបាលជំនាញយើង បានសម្រេចកសាងសំណុំរឿងព្រហ្មទណ្ឌពាក់ព័ន្ធបទល្មើសឃាតកម្ម ដើម្បីបញ្ជូនទៅតុលាការ ខេត្តស្វាយរៀង ចាត់វិធានការបន្តតាមនីតិវិធី ប្រឆាំងនឹងជនសង្ស័យ»។
តាមក្រមព្រហ្មទណ្ឌកម្ពុជា មាត្រា ១៩៩ បានកំណត់និយមន័យ «បទឃាតកម្ម ថា ជាអំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ដោយគ្មានស្ថានទម្ងន់ណាមួយ»។ មាត្រានេះបានកំណត់ផងដែរថា «បទឃាតកម្មត្រូវផ្ដន្ទាទោសដាក់ពន្ធនាគារពី ១០ ឆ្នាំទៅ ១៥ ឆ្នាំ»។
យ៉ាងណាក៏ដោយ នៅល្ងាចថ្ងៃទី ៩ ខែមីនា ជនសង្ស័យកំពុងស្ថិតក្រោមនីតិវិធីនៃការសាកសួររបស់តំណាងអយ្យការអមសាលាដំបូងខេត្តស្វាយរៀងនៅឡើយ។នេះបើតាមលោក ទេព ផល្លា ប្រធានលេខាធិការដ្ឋានរដ្ឋបាល និងជាអ្នកនាំពាក្យសាលាដំបូងខេត្តស្វាយរៀង។
យោងតាមរបាយការណ៍របស់នគរបាលស្រុករំដួលដែលភ្នំពេញប៉ុស្តិ៍ទទួលបាន ជនរងគ្រោះក្នុងសំណុំរឿងនេះ រួមមាន ឈ្មោះ ជេត ចាន់ថន អាយុ ៦៤ ឆ្នាំ ត្រូវជាបងថ្លៃប្រុសរបស់ជនសង្ស័យ, ហ៊ឹង សុវណ្ណ អាយុ ៦៣ ឆ្នាំ ត្រូវជាបងថ្លៃស្រីជនសង្ស័យ,ជេត សុភ័ក្រ អាយុ ២៥ ឆ្នាំ ត្រូវជាក្មួយស្រីជនសង្ស័យ [ទាំង ៣ នាក់] របួសធ្ងន់។ ចំណែកកុមារី នី ម៉ីម៉ី អាយុ ៣ ឆ្នាំ និងកុមារាបេ ចំណាប់ អាយុ៣ឆ្នាំ ព្រមទាំងស្ត្រីវ័យ៥៦ឆ្នាំ ឈ្មោះ ប៉ែន សេថា របួសស្រាល ដែលទាំង ៣ នាក់គឺជាអ្នកជិតខាង ដែលបានទៅលេងផ្ទះជនរងគ្រោះ។
លោកសូរ អាត អធិការរងស្រុករំដួលបានប្រាប់ភ្នំពេញប៉ុស្តិ៍ថា ក្នុងចំណោមជនរងគ្រោះទាំង ៦ នាក់ មានជនរងគ្រោះម្នាក់ឈ្មោះ ជេត ចាន់ថន រងរបួសធ្ងន់ធ្ងរជាងគេ ហើយត្រូវបានក្រុមគ្រូពេទ្យបង្អែកស្រុករំដួលបញ្ជូនទៅមន្ទីរពេទ្យកាល់ម៉ែតក្នុងរាជធានីភ្នំពេញ ដើម្បីវះកាត់យកអំបែងគ្រាប់។
លោកបានបញ្ជាក់ថា៖ «តាមការបញ្ជាក់របស់គ្រូពេទ្យជំនាញជនរងគ្រោះត្រូវអំបែងគ្រាប់បែកមុតចូលជ្រៅទៅក្នុងសាច់ផ្នែកខាងក្រោមដោះខាងឆ្វេងហើយជនរងគ្រោះមានកំហាប់ជាតិស្ករក្នុងឈាមខ្ពស់ដែលជាហេតុនាំឱ្យក្រុមគ្រូពេទ្យជំនាញត្រូវតែបញ្ជូនជនរងគ្រោះទៅកាន់មន្ទីរពេទេព្យកាល់ម៉ែតជាបន្ទាន់ ដើម្បីធ្វើការវះកាត់យកបំណែកគ្រាប់បែកនោះចេញ»។
លោក សូរ អាត បានឱ្យដឹងទៀតថា ចំណែកជនរងគ្រោះ ៣ នាក់ ដែលរបួសស្រាល បានចាកចេញពីមន្ទីរពេទ្យវិញហើយលើកលែងតែស្ត្រីជាប្រពន្ធ និងកូនស្រីដែលរងរបួសមធ្យមកំពុងសម្រាកព្យាបាលនៅមន្ទីរ-ពេទ្យបង្អែកស្រុករំដួល៕