ភ្នំពេញៈ ក្រសួងសុខាភិបាលកម្ពុជា និងក្រសួងឧស្សាហកម្ម រ៉ែ និងពាណិជ្ជកម្មនៃសាធារណរដ្ឋអុិស្លាមអុីរ៉ង់ មានគោលបំណងសហការលើវិស័យឱសថវ៉ាក់សាំង សម្ភារបរិក្ខាពេទ្យ និងការចុះអនុស្សរណៈ នៃការយោគយល់គ្នា (MoU) លើវិស័យសុខាភិបាលជាមួយកម្ពុជា។
គោលបំណងនេះ ត្រូវបានលើកឡើងក្នុងជំនួបរវាងលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ជាមួយនឹងលោក Mohsen Rezaie Pour អគ្គនាយករងទទួលបន្ទុកកិច្ចការអាស៊ី និងអូសេអានី ក្រសួងឧស្សាហកម្ម រ៉ែ និងពាណិជ្ជកម្មនៃសាធារណរដ្ឋអុិស្លាមអុីរ៉ង់ កាលពីថ្ងៃទី១០ ខែមីនា កន្លងទៅនេះ។
យោងតាមក្រសួងសុខាភិបាលបានឱ្យដឹងថា៖ «គណៈប្រតិភូបានជម្រាបអំពីគោលបំណងនៃដំណើរទស្សនកិច្ចនេះ ដើម្បីរឹតចំណងសហប្រតិបត្តិការទ្វេភាគីរវាងប្រទេសទាំង២ ហើយគណៈប្រតិភូ បានជម្រាបជូនអំពីគោលបំណងសហការលើវិស័យឱសថវ៉ាក់សាំង សម្ភារបរិក្ខាពេទ្យព្រមទាំងមានបំណងចុះ MoUលើវិស័យសុខាភិបាលជាមួយកម្ពុជា»។
ក្នុងជំនួបនោះដែរលោកស្រី ឱ វណ្ណឌីន ក៏បានលើកឡើងថា៖ «ជំហររបស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាលផ្ទាល់គឺស្វាគមន៍រាល់ការវិនិយោគក្នុងវិស័យសុខាភិបាល ដើម្បីផ្តល់នូវសេវាសុខភាពដែលមានគុណភាពដល់ប្រជាពលរដ្ឋទូទៅ ហើយលោកស្រី ក៏បានផ្តល់ជាអនុសាសន៍ក្នុងនីតិវិធីដើម្បីនាំចូល និងការវិនិយោគ ទាក់ទងលើវិស័យឱសថ នៅកម្ពុជាផងដែរ»។
នាពិធីបិទសន្និបាតសុខាភិបាល លើកទី៤២ កាលពីថ្ងៃទី៦ ខែមីនា លោកនាយករដ្ឋមន្ត្រី ហ៊ុន សែន បានលើកឡើងថា ភាពរឹងមាំនៃការអភិវឌ្ឍសេដ្ឋកិច្ចអាស្រ័យលើការអភិវឌ្ឍធនធានមនុស្សប្រកបដោយគុណវុឌ្ឍិ ហើយការអភិវឌ្ឍធនធានមនុស្សគឺអាស្រ័យលើសុខភាពល្អរបស់ប្រជាជន ដោយជំរុញនូវការផ្តល់សេវាសុខភាពល្អពេញលេញ គ្រប់គ្រាន់ និងប្រកបដោយប្រសិទ្ធភាព។
នាពិធីនោះ លោកក៏បានកោតសរសើរចំពោះក្រសួងសុខាភិបាលដែលបានខិតខំប្រឹងប្រែង ដើម្បីទប់ស្កាត់ការរាតត្បាតជំងឺកូវីដ១៩ ដែលធ្វើឱ្យកម្ពុជាអាចបើកប្រទេសបម្រើសេដ្ឋកិច្ច និងសង្គមឡើងវិញយ៉ាងពេញលេញ ដោយលោកក៏បានជំរុញឱ្យក្រសួងសុខាភិបាលពង្រឹងបន្ថែមទៀតលើការត្រួតពិនិត្យតាមដានកត្តាដែលនឹងនាំទៅដល់ហានិភ័យដល់សុខភាពសាធារណៈ។
ជាមួយគ្នានោះដែរ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានលើកឡើងផងដែរថា សមិទ្ធផលជាច្រើនដែលក្រសួងទទួលបានក្នុងរយៈពេល៥ឆ្នាំកន្លងមកនេះ ប៉ុន្ដែនៅតែប្រឈមនឹងបញ្ហាដែលលោកទាមទារឱ្យមានការខិតខំប្រឹងប្រែងបន្ដទៀត ជាពិសេសការពង្រឹងនូវសេវាសុខាភិបាល ធនធានមនុស្ស និងមន្ទីរពិសោធន៍ព្រមទាំងការបន្ដប្រយុទ្ធនឹងជំងឺរ៉ាំរ៉ៃ និងជំងឺឆ្លងផ្សេងៗរួមទាំងជំងឺកូវីដ១៩។
លោក ម៉ម ប៊ុនហេង ក៏បានសម្តែងនូវការកោតសរសើរដល់ថ្នាក់ដឹកនាំ និងមន្ត្រីរាជការ បុគ្គលិកសុខាភិបាលគ្រប់លំដាប់ថ្នាក់ ដែលបានខិតខំបំពេញភារកិច្ចក្នុងរយៈពេលកន្លងមកនេះ យ៉ាងយកចិត្តទុកដាក់ និងទទួលបានសមិទ្ធផលដ៏គួរជាទីមោទនៈ៕