ប៉ៃលិនៈ ពលរដ្ឋជាង ១០០ គ្រួសារ បានសម្តែងការព្រួយបារម្ភ និងផ្តិតមេដៃសុំអន្តរាគមន៍ដល់អាជ្ញាធរខេត្តជួយបញ្ឈប់សកម្មភាពបង្ហូរទឹកកាកសំណល់កខ្វក់ចូលអូរធម្មជាតិចេញពីក្រុមហ៊ុនចិនយីហោឆៃសិន ផលិតដំណាប់ស្វាយ នៅភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលធ្វើឱុ្យប៉ះពាល់ដល់ការរស់នៅ ការធ្វើកសិកម្ម និងប៉ះពាល់ដល់សត្វចិញ្ចឹមរបស់ពួកគាត់។
អ្នកស្រី បូរ ស្រីនាថ អាយុជាង ៣០ ឆ្នាំ ជាប្រជាពលរដ្ឋរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែមីនាថា កាកសំណល់ដែលហូរចេញពីក្រុមហ៊ុនចិន១នេះជាកាកសំណល់កខ្វក់ មានក្លិនស្អុយ បណ្តាលឱ្យប្រជាពលរដ្ឋពិបាកដកដង្ហើម និងកើតជំងឺផ្សេងៗ។ ម្យ៉ាងវិញទៀតពេលទឹកអូរកខ្វក់ធ្វើឱ្យប្រជាពលរដ្ឋជួបការលំបាកដោយខ្វះទឹកប្រើប្រាស់សម្រាប់ងូតសម្អាតរូបកាយ។ បន្ថែមលើនេះសត្វចិញ្ចឹមរបស់ប្រជាពលរដ្ឋមានមាន់ទាជាដើមប្រឈមការឬឈឺងាប់ផងដែរ។
អ្នកស្រីថ្លែងថា៖«បញ្ហានេះកើតឡើងយូរដែរហើយ ហើយឥឡូវហ្នឹងវានៅតែធុំក្លិនស្អុយរហូត ធុំក្លិនបែបនេះធ្វើឱ្យប៉ះពាល់ដល់សុខភាពក្មេងៗបណ្តាលឱ្យឈឺ ហើយអ្នកស្រុករកទឹកប្រើប្រាស់[សម្រាប់ងូត]មិនបាន ព្រោះពលរដ្ឋអាស្រ័យទឹកអូរហ្នឹងសម្រាប់ងូតប្រចាំថ្ងៃ»។
អ្នកស្រី បានឱ្យដឹងទៀតថា កន្លងមកអាជ្ញាធរមូលដ្ឋានបានចុះសម្របសម្រួលជាមួយក្រុមហ៊ុននេះ ជាបន្តបន្ទាប់ ប៉ុន្តែមិនមានលទ្ធផលអ្វីល្អប្រសើរទេ។ ក្នុងនាមពលរដ្ឋរងផលប៉ះពាល់ម្នាក់ អ្នកស្រី បូរ ស្រីនាថ បានសំណូមពរបន្ថែមដល់អាជ្ញាធរពាក់ព័ន្ធឱ្យជួយដោះស្រាយបញ្ហានេះដោយឱ្យក្រុមហ៊ុនឈប់បង្ហូរកាកសំណល់ចូលក្នុងអូរបន្តទៀត។
លោក ហែម ជ័យ អាយុជាង ៤០ឆ្នាំ ជាប្រជាពលរដ្ឋរស់នៅភូមិអូររអិល ឃុំស្ទឹងកាច់ ស្រុកសាលាក្រៅ ប្រាប់ភ្នំពេញប៉ុស្តិ៍នៅថ្ងៃទី ១២ ខែមីនាដែរថា ក្រោយពីរងផលប៉ះពាល់ដោយសារក្លិនស្អុយអស់ជាច្រើនខែកន្លងមក នៅថ្ងៃទី ៨ ខែមីនា ពលរដ្ឋជាង ១០០ គ្រួសារក្នុងតំបន់នោះ បាននាំគ្នាផ្តិតមេដៃស្នើសុំអាជ្ញាធរខេត្តជួយអន្តរាគមន៍បញ្ឈប់សកម្មភាពបង្ហូរទឹកដែលមានជាតិពុល និងក្លិនស្អុយចូលអូរធម្មជាតិពីសំណាក់ក្រុមហ៊ុនផលិតដំណាប់ស្វាយឆៃសិន។
លោកហែម ជ័យ លើកឡើងថា ទឹកមានក្លិនស្អុយដែលហូរចេញពីក្រុមហ៊ុនចិនខាងលើ ធ្វើឱ្យងាប់ជីវចម្រុះមានត្រីក្នុងទឹកជាដើម។ជាមួយគ្នានោះទឹកកខ្វក់នេះបានធ្វើឱ្យខូចដំណាំរបស់ប្រជាពលរដ្ឋដែលអាស្រ័យផលទឹកនោះសម្រាប់ស្រោចស្រព ក៏ដូចជាធ្វើការបាញ់ថ្នាំការពារដំណាំផងដែរ។
លោកថ្លែងថា«ធុំក្លិនស្អុយអ៊ីចឹងវាខូចបរិស្ថាន ធ្វើឱ្យយើងពិបាកដកដង្ហើម សូម្បីត្រីតាមអូរហ្នឹងក៏ងាប់ដែរ។ទឹកកខ្វក់សូម្បីស្រោចដំណាំក៏មិនកើតដែរ ព្រោះយើងប្រើប្រាស់ទឹកហ្នឹងយកទៅលាយបាញ់ថ្នាំស្មៅចម្ការដំឡូងជាដើម វាពិបាកយកមកប្រើដោយសារវាស្អុយ ហើយធ្វើឱ្យខូចគុណភាពដំណាំទៀត»។
យ៉ាងណាក៏ដោយ លោក សាក់ សាវរិទ្ធិ ប្រធានមន្ទីរបរិស្ថានខេត្តប៉ៃលិន ប្រាប់ភ្នំពេញប៉ុស្តិ៍នៅថ្ងៃទី ១២ ខែមីនាថា បញ្ហា នេះក្រុមហ៊ុនបានសហការជាមួយមន្ត្រីជំនាញបរិស្ថានដោះស្រាយរួចរាល់ហើយកាលពីថ្ងៃទី១១ ខែមីនា។ លោកថា ខាងក្រុមហ៊ុនបានយល់ព្រមបញ្ឈប់លែងឱ្យមានទឹកកខ្វក់ហូរចូលក្នុងអូរធម្មជាតិបន្តទៀត ដោយធ្វើអាងប្រព្រឹត្តិកម្មសំណល់រាវនិងជីកស្រះបន្ថែមទៀតសម្រាប់ស្តុកទឹកកខ្វក់។
លោកសាក់ សាវរិទ្ធិ បានបន្ថែមថា ក្រុមហ៊ុនបានផលិតដំណាប់ស្វាយ ប៉ុន្តែមិនបានធ្វើស្រះរំដោះទឹកកខ្វក់ ហើយបែរជាបង្ហូរចូលអូរធម្មជាតិទើបបណ្តាលឱ្យមានបញ្ហាប៉ះពាល់ដល់ការរស់នៅរបស់ប្រជាពលរដ្ឋ។
លោកបញ្ជាក់ថា៖«ចំពោះបញ្ហានេះយើងដោះស្រាយរួចរាល់អស់ហើយ។ខាងក្រុមហ៊ុនគាត់ជីកស្រះសម្រាប់ស្តុកទឹកកាកសំណល់១បន្ថែមទៀត និងបូមកាកសំណល់[សំណល់ដែលហូរចូលអរូធម្មជាតិ]ចេញអស់ហើយ។យើងដោះស្រាយរួចរាល់កាលពីម្សិលមិញហើយ[ថ្ងៃទី១១ ខែមីនា]»។
តាមការផ្សាយលើគេហទំព័រក្រសួងព័ត៌មានថ្ងៃទី១១ ខែមីនា បានឱ្យដឹងថា កាលពីថ្ងៃទី១០ ខែមីនា អាជ្ញាធរខេត្តប៉ៃលិន ដឹកនាំដោយលោកស្រី បាន ស្រីមុំ បានចុះដោះស្រាយបញ្ហានេះជូនប្រជាពលរដ្ឋដល់ទីតាំងក្រុមហ៊ុនផ្ទាល់ និងបានណែនាំដល់ក្រុមហ៊ុនចិន «ឆៃសិន» ដែលកំពុងកែច្នៃ និងវេចខ្ចប់ផ្លែស្វាយសម្រាប់នាំចេញឱ្យបញ្ឈប់ការបង្ហូរកាកសំណល់ផ្លែស្វាយ និងទឹកស្អុយមានសារធាតុគីមីពុលចូលទៅក្នុងប្រឡាយ ឬ អូរធម្មជាតិបន្តទៀត។
គ្រានោះ លោកស្រីបាន ស្រីមុំ បានជំរុញដល់ក្រុមហ៊ុនត្រូវសហការជាមួយមន្ត្រីជំនាញពាក់ព័ន្ធដើម្បីសិក្សា និងរៀបចំបំពាក់អាងប្រព្រឹត្តិកម្មសំណល់រាវតាមលក្ខណៈបច្ចេកទេសចៀសវាងការបង្ហូរទឹកស្អុយ និងសារធាតុគីមីចូលទៅក្នុងប្រឡាយ ឬ អូរធម្មជាតិ និង ដីកម្មសិទ្ធិឯកជនរបស់ប្រជាពលរដ្ឋដែលមានលំនៅឋានក្បែរទីតាំងក្រុមហ៊ុន ដោយបង្កជាផលប៉ះពាល់ដល់ការរស់នៅរបស់ប្រជាពលរដ្ឋ និងការបំពុលប្រភពទឹកសាធារណៈ៕