សៀមរាបៈ ក្រសួងព្រះបរមរាជវាំង បានប្រកាសជូនដំណឹងដល់សាធារណជននៅព្រឹកថ្ងៃទី ១៣ មីនាថា ករណីគ្រោះអគ្គិភ័យ ឆេះព្រះរាជដំណាក់តូចក្នុងក្រុង-ខេត្តសៀមរាប ដែលបានបណ្តាលឱ្យរងការខូចខាតយ៉ាងធ្ងន់ធ្ងរ កាលពីយប់ថ្ងៃទី ១២ មីនា គឺបណ្ដាលមកពីការ «ផ្ទុះឆ្លងចរន្តអគ្គិសនី»។
លោក តេង ច័ន្ទណាត ស្នងការខេត្តសៀមរាប បានប្រាប់ ភ្នំពេញ ប៉ុស្តិ៍ថា នៅវេលាម៉ោង ១០:៣៥ នាទីយប់ថ្ងៃទី ១២ ខែមីនា មានអគ្គិភ័យឆាបឆេះ អគារព្រះរាជដំណាក់តូច ដែលមានទីតាំងស្ថិតនៅក្នុងសង្កាត់ស្វាយដង្គុំ ក្រុងសៀមរាប ក្បែរទីតាំងសក្ការៈបូជាព្រះអង្គចេកព្រះអង្គចម ។
អគ្គិភ័យនោះត្រូវបានកម្លាំងនគរបាលបង្ការ និងពន្លត់អគ្គិភ័យ ចុះអន្តរាគមន៍បាញ់ទឹកពន្លត់ឱ្យរលត់ទៅវិញជាស្ថាពរនៅវេលាម៉ោងជាង១២យប់ ឈានចូលថ្ងៃទី១៣ ខែមីនា ឆ្នាំ២០២៣។
ទោះយ៉ាងណាលោកបានបញ្ជាក់ថា មកទល់ពេលនេះសមត្ថកិច្ចនគរបាលជំនាញ នៅមិនទាន់ដឹងពីមូលហេតុពិតប្រាកដដែលបង្កឱ្យកើតមានគ្រោះអគ្គិភ័យនោះនៅឡើយទេ។
លោកបញ្ជាក់ថា៖«នៅពេលនេះក្រុមមន្តី្រនគរបាលជំនាញ កំពុងបន្តធ្វើការស្រាវជ្រាវលើករណីនេះ»។
ជុំវិញគ្រោះអគ្គិភ័យឆេះព្រះរាជដំណាក់តូចនេះផងដែរ លោក ទៀ សីហា អភិបាលខេត្តសៀមរាប បានសរសេរនៅលើបណ្ដាញហ្វេសប៊ុករបស់លោក ដោយបានបង្ហាញពីអារម្មណ៍សោកស្ដាយជាទីបំផុតចំពោះការខូចខាតនូវព្រះរាជដំណាក់ដ៏ជាទីសក្ការនៃប្រវត្តិសាស្ត្រនេះ។
ក្នុងសំណេរនោះលោកបានគូសបញ្ជាក់ថា៖«យើងពិតជាសោកស្តាយ ចំពោះអគ្គិភ័យដែលបានឆាបឆេះអគារមួយ នៃព្រះរាជដំណាក់សៀមរាប ដែលជាកន្លែងជាទីសក្ការដ៏ខ្ពង់ខ្ពស់បំផុត»។
ចំណែក ព្រះអង្គម្ចាស់ ស៊ីសុវត្ថិ ធម្មិកោ អតីតលេខាព្រះបរមរតនកោដ្ឋ សម្តេចព្រះ នរោត្តម សីហនុ បានមានបន្ទូលប្រាប់ភ្នំពេញប៉ុស្តិ៍ថា ព្រះរាជដំណាក់តូចនោះ គឺជាទីស្ថានប្រវត្តិសាស្រ្តនៃការចាប់ផ្ដើមយុទ្ធនាការទាមទារឯករាជជាតិ ពីប្រទេសបារាំងក្នុងឆ្នាំ១៩៥២។
ព្រះអង្គមានបន្ទូលថា៖«ខ្ញុំពិតជាមានការសោកស្ដាយខ្លាំងណាស់ ពីព្រោះព្រះរាជដំណាក់តូចនោះ គឺជាទីកន្លែង ដែលព្រះបរមរតនកោដ្ឋ ព្រះមហាវីរក្ស័ត្រ នរោត្តម សីហនុ ព្រះអង្គបានចាប់ផ្ដើមរៀបចំផ្ដួចផ្ដើម នូវយុទ្ធនាការដំបូងក្នុងការទាមទារឯករាជ ពីប្រទេសបារាំងក្នុងឆ្នាំ១៩៥២»។
យ៉ាងណាក៏ដោយ មកទល់ពេលនេះ អាជ្ញាធរនៅមិនទាន់បញ្ជាក់ឱ្យដឹងពីទំហំខូចខាត ដែលបង្កឡើងពីគ្រោះអគ្គិភ័យ ឆាបឆេះសំណង់អគារព្រះរាជដំណាក់តូច រួមទាំងទ្រព្យសម្បត្តិ ដែលមាននៅក្នុងនោះនៅឡើយទេ។
លោកច័ន្ទណាត បានមានប្រសាសន៍ថា៖«ក្រុមគណៈកម្មការចម្រុះ ដែលមានការចូលរួមពីមន្ត្រីជាន់ខ្ពស់នៃក្រសួងព្រះបរមរាជវាំង កំពុងធ្វើការត្រួតពិនិត្យ និងវាយតម្លៃ។ នៅពេលបានលទ្ធផលសមត្ថកិច្ចយើងនឹងប្រកាសឱ្យដឹងជាសាធារណៈ»៕