ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ណែនាំដល់គណៈគ្រប់គ្រងមជ្ឈមណ្ឌលការងារនៃសាកលវិទ្យាល័យភូមិន្ទកសិកម្ម (RUA) ដែលទើបបើកសម្ពោធថ្មី ត្រូវជ្រើសរើសសម្រិតសម្រាំងនិស្សិតដែលមានសមត្ថភាពពិតប្រាកដក្នុងការចាប់យកឱកាសការងារជាមួយក្រុមហ៊ុនឯកជនធំៗនិងកសាងកេរ្តិ៍ឈ្មោះបង្កើតទំនុកចិត្តចំពោះសាលាក្នុងការបណ្ដុះបណ្ដាលធនធានមនុស្សប្រកបដោយគុណភាព។
លោករដ្ឋមន្ត្រីក្រសួងកសិកម្មបានណែនាំបែបនេះនៅក្នុងពេលចូលរួមបើកបវេសនកាលឆ្នាំទី១ ឆ្នាំសិក្សា២០២២-២០២៣ និងសម្ពោធមជ្ឈមណ្ឌលការងារនៃសាកលវិទ្យាល័យភូមិន្ទកសិកម្មនាព្រឹកថ្ងៃទី១៣ ខែមីនា ឆ្នាំ២០២៣។
លោកបញ្ជាក់ថា៖«មជ្ឈមណ្ឌលការងារនេះត្រូវជ្រើសរើសសម្រិតសម្រាំងនិស្សិតដែលមានសក្តានុពល មានសមត្ថភាពពិតប្រាកដ ទាំងចំណេះដឹង និងចំណេះធ្វើ ក្នុងការចាប់យកឱកាសការងារជាមួយក្រុមហ៊ុនឯកជនធំៗ និងជាការកសាងកេរ្តិ៍ឈ្មោះ បង្កើតទំនុកចិត្តចំពោះសាលាក្នុងការបណ្ដុះបណ្ដាលធនធានមនុស្សប្រកបដោយគុណភាព»។
ជាមួយគ្នានោះ លោករដ្ឋមន្ដ្រី បានផ្ដល់អនុសាសន៍ដល់សាលាភូមិន្ទកសិកម្មឱ្យធ្វើការបន្ថែមទៀត ក្នុងការអភិវឌ្ឍធនធានមនុស្ស តាមរយៈការអភិវឌ្ឍកម្មវិធីសិក្សា និងជំរុញឱ្យមានកម្មវិធីផ្សារភ្ជាប់ក្រុមហ៊ុននិងសាកលវិទ្យាល័យ ដើម្បីតម្រង់ទិសនិស្សិតឱ្យត្រូវនឹងតម្រូវការរបស់ក្រុមហ៊ុននិងដំណើរការធនធានមនុស្សរបស់ក្រុមហ៊ុន។ បន្ថែមលើនោះ ដើម្បីចូលរួមក្នុងការអភិវឌ្ឍធនធានមនុស្ស លោកឌិត ទីណា ក៏បានផ្តល់អាហារូបករណ៍សម្រាប់និស្សិតចំនួន១៩នាក់ផងដែរ។
ក្នុងពិធីបើកបវេសនកាលនោះលោករដ្ឋមន្ត្រីក្រសួងកសិកម្ម បានសម្ដែងការកោតសរសើរចំពោះថ្នាក់ដឹកនាំសាស្ត្រាចារ្យ លោកគ្រូអ្នកគ្រូ ដែលបានយកចិត្តទុកដាក់ក្នុងការបំពេញភារកិច្ច និងបណ្ដុះបណ្ដាលធនធានមនុស្ស ដើម្បីចូលរួមក្នុងការអភិវឌ្ឍវិស័យកសិកម្ម ក៏ដូចជាលើកស្ទួយសេដ្ឋកិច្ចជាតិ។
ជាមួយគ្នានេះ លោកបានលើកឡើងអំពីភាពសំខាន់នៃទស្សនវិទ្យា និងការអភិវឌ្ឍធនធានមនុស្ស និងបានផ្តាំផ្ញើដល់ប្អូនៗនិស្សិតនៅទីនោះចាំបាច់ត្រូវស្គាល់ខ្លួនឯងឱ្យបានច្បាស់ ដឹងចំណង់ចំណូលចិត្ត មានក្ដីស្រមៃ និងកំណត់គោលដៅខ្លួនឯងឱ្យបានច្បាស់លាស់ ដែលជាត្រីវិស័យនាំផ្លូវដើរទៅរកភាពជោគជ័យ ដោយមិនបាក់ទឹកចិត្ត។ ទន្ទឹមនឹងនោះ ត្រូវតាមដានផែនការ បង្កើតទម្លាប់ ដោយដាក់ចិត្តរៀនដើម្បីចេះទាំងចំណេះដឹងក្នុង និងក្រៅសាលា ចេះឱ្យប្រាកដ ធ្វើឱ្យចេញជាលទ្ធផល និងឱ្យល្អបំផុត។
លោកថ្លែងថា៖«លើសពីនេះទៀត ត្រូវពង្រឹងសមត្ថភាពបច្ចេកវិជ្ជា ពិសេសភាសាផ្សារភ្ជាប់នឹងពិភពលោក ក្នុងការពង្រីកការយល់ដឹងឱ្យកាន់តែទូលំទូលាយដើម្បីឈានទៅរកការសម្រេចក្ដីស្រមៃជាអ្នកជំនាញកសិកម្ម និងទទួលបានឱកាសការងារក្នុងវិស័យរដ្ឋ ឯកជន និងអាចជាវិនិយោគិនក្នុងវិស័យកសិកម្ម»។
ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នេះជាលើកទី២ដែលលោករដ្ឋមន្ត្រីក្រសួងកសិកម្មបានមកជួបសំណេះសំណាលជាមួយថ្នាក់ដឹកនាំ សាស្ត្រាចារ្យ លោកគ្រូអ្នកគ្រូ និងនិស្សិតនៃសាកលវិទ្យាវិទ្យាល័យភូមិន្ទកសិកម្ម។ ក្នុងឆ្នាំសិក្សាថ្មីនេះ សាកលវិទ្យាល័យមាននិស្សិតចូលរៀនចំនួន ១ ០៤៧នាក់ ក្នុងនោះស្ត្រីមានចំនួន ៤២១នាក់ ស្មើនឹង៤០ភាគរយ។
ក្រសួងបន្តថា RUA បានអភិវឌ្ឍកម្មវិធីសិក្សាកាន់តែប្រសើរ មានមុខវិជ្ជាច្រើនជាងមុន វិធីសាស្ដ្របង្រៀនថ្មីៗ គឺចាប់ផ្តើមពីមហាវិទ្យាល័យជលផល និងកសិឧស្សាហកម្ម ដោយផ្តោតលើការអនុវត្តផ្ទាល់ និងការចូលរួមពីនិស្សិតដូចជាការភ្ញាស់កូនត្រី ការធ្វើចំណី ការចិញ្ចឹមត្រី ការរៀបចំបែ ឬស្រះ និងការធ្វើទីផ្សារ ដើម្បីធានាគុណភាពបណ្តុះបណ្តាល និងសមត្ថភាពប្រកួតប្រជែងរបស់និស្សិតក្នុងទីផ្សារការងារក្រោយពេលបញ្ចប់ការសិក្សា។
ជាមួយគ្នានេះដែរ សាលាទើបដាក់ឱ្យដំណើរការនូវមជ្ឈមណ្ឌលការងារ ដែលនឹងផ្តល់ព័ត៌មាន ជួយតម្រង់ទិស និងដើរតួនាទីជាស្ពានតភ្ជាប់រវាងនិស្សិតដែលជិតបញ្ចប់ឬទើបបញ្ចប់ការសិក្សាជាមួយនឹងទីផ្សារការងារផងដែរ៕
វីដេអូ៖