សៀមរាបៈ ក្រុម​មន្ត្រី​ក្រសួង​ព្រះ​បរមរា​ជវាំ​ងកំ​ពុងរុះរើ​សំណង់​អគារ​ព្រះរាជដំណាក់​តូច​ក្នុង​ក្រុង​-​ខេត្ត​សៀមរាប​ ដើម្បី​សាង​សង់​ជាថ្មី​ឡើង​វិញ​ បន្ទាប់ពី​មាន​គ្រោះ​អគ្គិ​ភ័យ​ឆាបឆេះ​​រង​ការ​ខូច​ខាត​ស្ទើរ​តែ​ទាំង​ស្រុង​កាល​ពី​យប់​ថ្ងៃទី​ ១២​ ខែមីនា ឆ្នាំ​ ២០២៣​។​

លោក អ៊ិន រដ្ឋា​សេរី ទីប្រឹក្សា​ក្រសួង​ព្រះបរ​មរាជ​វាំងប្រចាំ​នៅ​ព្រះរាជ​ដំណាក់​ក្នុង​ខេត្ត​សៀមរាប​ បាន​ប្រាប់​ភ្នំពេញ​ប៉ុស្តិ៍​នៅ​រសៀល​ថ្ងៃ​ទី​១៤ ​ខែមីនា​ថា នៅ​ពេលនេះ​ ក្រុម​មន្ត្រី​នៃ​ក្រសួង​ព្រះបរ​មរាជវាំង​ប្រចាំ​នៅ​ព្រះ​រាជ​ដំណាក់​ក្នុង​ក្រុង​-​ខេត្ត​សៀមរាប​ កំពុង​​រុះរើ​ បោស​សម្អាត ​សំណល់​បាក់​បែកនៃ​សំណង់​អគារ​ព្រះរាជ​ដំណាក់​តូច​ដែល​រង​ការ​ឆេះ​ខូច​ខាត​ស្ទើរ​ទាំង​ស្រុង​នោះ ដើម្បី​សាង​សង់​ជាថ្មី​ឡើងវិ​ញ​។​

​លោក​ថ្លែងថា​​៖«​នៅ​ពេលនេះ​ ក្រុម​ការងារ​យើង​កំពុង​រុះរើ​ផ្នែក​ដំបូល ​និង​បោសស​ម្អាត​សំណល់​បាក់បែក ចេញពី​បរិ​វេណ​នៃ​សំណង់​អគារ​ព្រះរា​ជដំណា​ក់ ដែល​រង​ការឆេះ​ខូច​ខាត​ដោយ​គ្រោះ​អគ្គិ​ភ័យ​នេះ​ ដើម្បី​សាង​សង់​ជាថ្មី​ឡើង​វិញឱ្យ​បាន​ឆាប់​បំផុតតាម​ដែល​អាច​ធ្វើ​ទៅ​បាន​»​។​

​បើតាម​លោក រ​ដ្ឋា​សេរី ក្រៅពី​សំណង់​អគារ ​និង​សម្ភារ​ប្រើប្រា​ស់​មួយ​ចំនួ​ន ដូ​ចជា ​តុ កៅអី សា​ឡុង និង​កម្រាល​ព្រំ គឺ​គ្មាន​ឯក​សារ​ប្រវ​ត្តិសាស្ត្រ​ ឬបុរាណ​វត្ថុ​សំខាន់ៗ​អ្វី​ត្រូវបាន​ឆេះ​ខូច​ខាត​នោះ​ទេ​។​

​លោក​មាន​ប្រសាស​ន៍​បន្ថែ​ម​​ថា​៖ «​ជាការ​ពិត ​យើងទាំ​ងអស់គ្នា​ ទាំង​រាស្ត្រ​ និង​មន្ត្រី​គ្រប់​លំដាប់​ថ្នាក់ គឺមាន​ការ​សោក​ស្ដាយ​ជា​ពន់​ពេក​ចំពោះ​ឧ​បទ្ទវ​ហេតុ​នៃ​គ្រោះ​អគ្គិ​ភ័យ​ដ៏​រន្ធត់​នេះ ​ព្រោះ​សំណង់​អគារ​ព្រះរាជ​ដំណាក់​តូច​ក្នុង​ក្រុង​សៀម​រាប​នេះ គឺមាន​ទំនាក់​ទំនងជា​​ប្រវត្តិ​សាស្ត្រ​នៃ​ព្រះរាជ​បូជនីយ​កិច្ច​របស់​ព្រះ​បរម​រតន​កោដ្ឋ ​ព្រះមហា​វីរក្សត្រ សម្ដេច​ព្រះ​នរោត្ដម សីហនុ ក្នុង​ការ​តស៊ូ​ទាម​ទារ​ឯក​រាជ្យ​ជាតិ​ពី​ប្រទេស​បារាំង តាំង​ពីអំឡុង​ទស​វត្សរ៍ឆ្នាំ​១៩៥០​មក​ម្ល៉េះ​»​។​

​ទន្ទឹម​នឹង​នេះ ​សម្តេចព្រះ​​មហាក្ស​ត្រី នរោត្តម​ មុនិ​នាថ ​សីហនុ ​ព្រះវ​ររាជ​មាតា​ជាតិខ្មែ​រ ដែល​បច្ចុប្បន្ន កំពុង​គង់​ប្រថាប់​នៅ​ទីក្រុង​ប៉េកាំង​ប្រទេស​ចិន​ ព្រះ​អង្គ​សព្វ​ព្រះរាជ​ហឫទ័​យចេញ​ព្រះរាជ​សារ​មួយ ចុះ​ថ្ងៃទី​១៤​ ខែមីនា ឆ្នាំ​២០២៣ ដោយ​បាន​ពិពណ៌​នាពី​​ទំនាក់​ទំនងជា​ប្រវត្តិ​សាស្ត្រ​នៃ​ព្រះរាជ​ដំណាក់​តូច​ក្នុង​ខេត្ត​សៀម​រាប និង​ការធ្វើ​ព្រះរាជ​បូជ​នីយ​កិច្ច​ទាម​ទារ​ឯករាជ្យ​ជាតិ​ពី​បារាំង​។​

​ក្នុង​ព្រះ​រាជ​សារ​នោះ សម្តេច​ព្រះ​មហា​ក្សត្រី បាន​ពិពណ៌នា​ថា ព្រះរាជ​ដំណាក់​ខេត្តសៀម​រាប ដែល​មាន​អាយុ​កាល​ជាង​៧០​ឆ្នាំ​មក​ហើយ​នេះ ​បាន​បន្សល់​នូវ​អនុស្សាវ​រីយ៍​ជាប្រវត្តិ​សាស្ត្រ និង​អត្ថន័យ​ជាតិ​ដ៏​ធំធេង​ជា​មួយ​នឹង​ព្រះរាជ​បូជ​នីយកិ​ច្ច​តស៊ូ​ទាម​ទារ​ឯករាជ្យ​ បន្ទាប់ពី​ការ​យាង​បំពេញ​យុទ្ធ​នាការ​នៅ​បរទេស មា​នដូ​ចជា បារាំង​ កាណា​ដា អាមេ​រិក ជប៉ុន និង​ថៃឡ​ង់​។ ព្រះករុណា​ ព្រះមហា​វីរ​ក្សត្រ ព្រះ​វររាជ​បិតា​ជាតិ​ខ្មែរ​ ព្រះ​បរម​រតន​កោដ្ឋ ជា​ទីគោរព​សក្ការៈ​ដ៏​ខ្ពង់​ខ្ពស់​បំផុត បាន​ដឹកនាំ​ការ​តស៊ូ​ជាមួយ​ការចូល​រួម​ដ៏​សកម្ម និង​ដ៏​អង់​អាច​ក្លាហាន​ពី​សំណាក់​ជន​រួម​ជាតិ​គ្រប់​ស្រទាប់​វ​ណ្ណៈ និង​គ្រប់​និន្នាការ​ដោយ​គ្មាន​ការ​បង្ហូរ​ឈាម​។​

​ក្នុង​ព្រះរាជ​សារ​នោះ​ ស​ម្តេចព្រះ​មហា​ក្សត្រី បាន​បញ្ជាក់​ថា​៖«​រវាង​ខែមិថុនា​ដល់​ខែវិច្ឆិកា​ឆ្នាំ​១៩៥៣​ខ្ញុំ​មាន​មហា​កិត្តិ​យស​បាន​ដង្ហែ​ព្រះ​បិតា​ឯ​ករាជ្យជាតិ ក្នុង​ព្រះរាជ​បូជនីយកិ​ច្ច ប្រវ​ត្តិសាស្ត្រ​ខាង​លើនេះ​​នៅ​ក្នុង​ខេត្ត​សៀមរា​ប ខេត្ត​កំពង់​ធំ និង​ខេត្ត​បាត់​ដំបង ​ដែលជា​តំបន់​ស្វយ័ត​នាពេ​លនោះ​ រហូត​ទទួល​បាន​ជោគ​ជ័យ​ជា​ស្ថា​ពរ​ជូន​ជាតិ​មាតុ​ភូមិ​ទាំង​មូល​នៅ​ថ្ងៃទី​៩ ​ខែវិច្ឆិកា ឆ្នាំ​១៩៥៣»​។​

​ជា​មួយ​គ្នានេះ សម្តេច​ព្រះ​មហាក្សត្រី​ក៏បាន​ថ្លែងអំ​ណរគុ​ណ​ដ៏​ជ្រាលជ្រៅ​ជូន​ដល់​ជនរួម​ជាតិ​និង​អន្ត​រជាតិ ដែល​បាន​សម្តែង​នូវ​សមាន​ចិត្ត​សោក​ស្តាយ​ចំពោះ​ព្រឹត្តិ​ការណ៍​នៃ​ឧបទ្ទវ​ហេតុ​ដ៏​តក់​ស្លុត និង​រន្ធត់​បំផុត​លើ​ព្រះរា​ជដំណា​ក់​ខេត្តសៀ​មរាប​ដោយ​គ្រោះ​អគ្គិ​ភ័យ​ឆាបឆេះ​នៅ​ថ្ងៃទី​១២​ ខែមីនា ឆ្នាំ២០២​៣ កន្លង​មក​នេះ​។ ​

សម្តេច​ព្រះ​មហាក្ស​ត្រី ក៏​បាន​ថ្លែង​អំណរ​គុណ​ដ៏​ជ្រាល​ជ្រៅ​បំផុតជូន​ថ្នាក់​ដឹកនាំ​ និង​មន្ត្រី​នៃ​ក្រសួងព្រះ​បរម​រាជ​វាំង ព្រម​ទាំង​អាជ្ញា​ធរ​មូល​ដ្ឋាន កង​កម្លាំង​សមត្ថ​កិច្ច ក្រុ​ម​ពន្លត់​អគ្គិ​ភ័យ ​ក្រុម​ប្រឹក្សា និង​គណៈ​អភិ​បាល​ខេត្ត ដែល​បាន​ជួយ​អន្ត​រាគ​មន៍​ភ្លាមៗ ​។​

​យោ​ង​តាម​ព្រះ​រាជ​សារ​នោះ ​សម្តេច​ព្រះ​មហា​ក្សត្រីបាន​បញ្ជាក់​ទៀតថា​៖ «​តាម​សេចក្ដី​ទួល​ស្នើ​សុំ​របស់​សម្ដេច​ចៅ​ហ្វា​វាំង ​វរ​វៀង​ជ័យ អធិ​បតី​ស្រឹង្គារ​ គង់ សំ​អុល ឧបនា​យក​រដ្ឋ​មន្ត្រី រដ្ឋ​មន្ត្រី​ក្រសួង​ព្រះ​បរម​រាជ​វាំង ព្រះរាជ​ដំណាក់​ថ្មី​នឹង​ត្រូវ​រៀប​ចំ​កសាង​ឡើង​វិញ នៅ​ពេល​ឆាប់ៗ​ខាង​មុខ​នេះ​» ៕

វីដេអូ៖