ពិធីចុះហត្ថលេខាផ្តល់-ទទួលជំនួយកាលពីថ្ងៃទី១៤មីនា។ រូបថត ស្ថានទូតជប៉ុន
ភ្នំពេញៈ ថវិកាចំនួន ២០៩ ១៩៧ ដុល្លារ ត្រូវបានរាជរដ្ឋាភិបាលជប៉ុន ផ្តល់ទៅដល់គម្រោងចំនួន ២ គឺគម្រោងសាងសង់ស្ពាន ១ កន្លែងក្នុងស្រុកប្រាសាទសំបូរ ខេត្តកំពង់ធំ និងការពង្រឹងខ្សែចង្វាក់តម្លៃផលិតកម្មមាន់ស្រែខ្មែរ ក្នុងខេត្តកំពង់ឆ្នាំង និងខេត្តសៀមរាប។
កិច្ចសន្យានៃការផ្តល់ជំនួយនេះ ត្រូវបានចុះហត្ថលេខានារសៀលថ្ងៃទី ១៤ ខែមីនា ឆ្នាំ ២០២៣ រវាងលោក អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពប្រទេសជប៉ុន ប្រចាំកម្ពុជា និងអ្នកតំណាងស្ថាប័នទទួលជំនួយទាំង ២ នេះ នៅស្ថានទូតជប៉ុន។
យោងតាមសេចក្តីប្រកាសព័ត៌មានរបស់ស្ថានទូតជប៉ុន បានឱ្យដឹងថា ថវិកាចំនួន ១០០ ៣៩៤ ដុល្លារ សម្រាប់គម្រោងទី១ ក្នុងការសាងសង់ស្ពាន១កន្លែងស្ថិតក្នុងឃុំគោល ស្រុកប្រាសាទសំបូរ ខេត្តកំពង់ធំ ដែលថវិកានេះផ្តល់ដល់មន្ទីរសាធារណការ និងដឹកជញ្ជូនខេត្តកំពង់ធំ។
លោក អ៊ូអិណុ អាត់ស៊ូស៊ី បានលើកឡើងថា គម្រោងនេះ នឹងផ្តល់អត្ថប្រយោជន៍ដល់ប្រជាជនមូលដ្ឋានជាង ១៣ ០០០នាក់ តាមរយៈការសម្រួលដល់ការដឹកជញ្ជូនកសិផល ក៏ដូចជាការធ្វើដំណើរប្រចាំថ្ងៃរបស់សិស្ស និងប្រជាជន ទៅកាន់សាលារៀន ផ្សារ និងមណ្ឌលសុខភាពដែលនៅជិតបំផុតពេញ១ឆ្នាំ ខណៈស្ពានចាស់ដែលជាស្ពានឈើពុកផុយ ប្រជាពលរដ្ឋមិនអាចឆ្លងកាត់ស្ពាននេះបានទេក្នុងរដូវវស្សា។
លោកបន្តថា សម្រាប់គម្រោងទី២ ដែលមានថវិកាចំនួន ១០៨ ៨០៣ដុល្លារ គឺជាគម្រោងពង្រឹងខ្សែចង្វាក់តម្លៃផលិតកម្មមាន់ស្រែខ្មែរ ក្នុងខេត្តចំនួន២ គឺខេត្តកំពង់ឆ្នាំង និងខេត្តសៀមរាប ដែលថវិកានេះត្រូវផ្តល់ជូនអង្គការហេហ្វឺអន្តរជាតិកម្ពុជា(Heifer International Cambodia) ដែលគម្រោងនេះផ្តោតលើបរិក្ខារចិញ្ចឹមមាន់នឹងត្រូវបានដំឡើង និងជួសជុលសម្រាប់កសិករចិញ្ចឹមមាន់ចំនួន ១៧នាក់។
គម្រោងនេះនឹងផ្តល់ប្រយោជន៍ដល់អ្នកទទួលផលផ្ទាល់ទាំងនេះ ក៏នឹងទទួលបានជំនួយបច្ចេកទេសពីអង្គការហេហ្វឺអន្តរជាតិកម្ពុជា និងសហគមន៍កសិកម្មផងដែរ។
លោកឯកអគ្គរាជទូតជប៉ុនក៏បានលើកឡើងដែរថា សមាជិកសហគមន៍កសិកម្មសរុបចំនួន ៥៦នាក់ នៅក្នុងខេត្តកំពង់ឆ្នាំង និង ២២៧នាក់ នៅក្នុងខេត្តសៀមរាប នឹងទទួលបានចំណេះដឹងពីបច្ចេកទេសចិញ្ចឹមមាន់ ការអនុវត្តអនាម័យ ប្រកបដោយសុវត្ថិភាព និងប្រសិទ្ធភាព។
សូមបញ្ជាក់ថា ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្ដល់ថវិកាជាង ៦៦លានដុល្លារ ដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងគូសាណូណិ ចំនួន៧០៥គម្រោង នៅទូទាំងប្រទេសកម្ពុជា ហើយជំនួយឥតសំណងគូសាណូណិរបស់ជប៉ុននេះ បានចាប់ផ្តើមនៅកម្ពុជា ក្នុងឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញ នៅតាមកម្រិតមូលដ្ឋាន៕
.jpg)
