.jpg)
លោក ផាន អូន ដឹកនាំមន្ត្រីទៅចូលរួមក្នុងកិច្ចប្រជុំប្រធានស្ថាប័នប្រកួតប្រជែងអាស៊ានលើកទី៤ នៅប្រទេសហ្វីលីពីន កាលពីថ្ងៃទី ១៣ មីនា។ រូបថត CCF
ភ្នំពេញៈ កិច្ចប្រជុំប្រធានស្ថាប័នប្រកួតប្រជែងអាស៊ានលើកទី ៤ នៅទីក្រុងផាឡាវ៉ាន់ ប្រទេសហ្វីលីពីន បានពិភាក្សាលើគោលការណ៍ណែនាំក្នុងការចែករំលែក ទៅលើករណីនៃការរួមបញ្ចូលគ្នានៃធុរកិច្ច អាស៊ាន និងប្រព័ន្ធព័ត៌មាន ហើយកិច្ចប្រជុំក៏ពិភាក្សាអំពីផែនការសកម្មភាពប្រកួតប្រជែងសម្រាប់ក្រោយឆ្នាំ ២០២៥ ដែលគ្រោងកំណត់សកម្មភាពពាក់ព័ន្ធកិច្ចការប្រកួតប្រជែងសម្រាប់ ២០ ឆ្នាំខាងមុខ។
លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) និងជាប្រធានលេខាធិការដ្ឋាននៃគណៈកម្មាធិការប្រកួតប្រជែងកម្ពុជា (គ.ប.ក) បានដឹកនាំមន្ត្រីទៅចូលរួមក្នុងកិច្ចប្រជុំប្រធានស្ថាប័នប្រកួតប្រជែងអាស៊ានលើកទី៤ នៅប្រទេសហ្វីលីពីន កាលពីថ្ងៃទី ១៣ មីនា។
កិច្ចប្រជុំនេះ គឺជាកិច្ចប្រជុំប្រចាំឆ្នាំដែលអនុញ្ញាតឱ្យប្រធានស្ថាប័នប្រកួតប្រជែងអាស៊ានទាំងអស់ បានជួបជុំគ្នាពិភាក្សាពាក់ព័ន្ធនឹងរបៀបវារៈចំនួន ៣ ដែលមានដូចជាលទ្ធផលនៃកិច្ចប្រជុំចរចាលើកិច្ចព្រមព្រៀងក្របខ័ណ្ឌប្រកួតប្រជែងអាស៊ានលើកទី ១ និងផែនការការងារបន្ត។ វឌ្ឍនភាពនៃសកម្មភាពដែលជាអាទិភាព ក្រោមផែនការសកម្មភាពប្រកួតប្រជែងឆ្នាំ ២០២៥ និងផែនការសកម្មភាពប្រកួតប្រជែងសម្រាប់ក្រោយឆ្នាំ ២០២៥។ នេះបើតាមអគ្គនាយកដ្ឋាន ក.ប.ប ។
លោក ផាន អូន ប្រាប់ ភ្នំពេញ ប៉ុស្តិ៍ នៅថ្ងៃទី ១៤ មីនាថា មានលទ្ធផលជាច្រើនដែលភាគីប្រធានស្ថាប័នប្រកួតប្រជែងអាស៊ានរួមទាំងកម្ពុជាបានសម្រេចឯកភាព និងបានដាក់ផែនការក្នុងការជួបពិភាក្សាគ្នាបន្តទៀតក្នុងពេលខាងមុខ។
លោកថា ជាក់ស្តែង កិច្ចព្រមព្រៀងក្របខ័ណ្ឌអាស៊ានស្តីពីការប្រកួតប្រជែងនេះ កំពុងត្រូវបានធ្វើការចរចានៅក្នុងកម្រិតបច្ចេកទេសដោយក្រុមជំនាញការប្រកួតប្រជែង (AEGC) ដែលគ្រោងនឹងបញ្ចប់ និងដាក់ឆ្លងក្នុងកិច្ចប្រជុំប្រធានស្ថាប័នប្រកួតប្រជែងអាស៊ាន (AHCA) នៅក្នុងត្រីមាសទី ២ នៃឆ្នាំ ២០២៤។
លោកបញ្ជាក់ថា៖ «គោលបំណងនៃការបង្កើតកិច្ចព្រមព្រៀងនេះគឺដើម្បីបម្រើជាយន្តការសហប្រតិបត្តិការដែលមានលក្ខណៈជាផ្លូវការមួយក្នុងការជួយសម្រួលដល់កិច្ចសហប្រតិបត្តិការនៅពេលមានករណីឆ្លងដែនសមត្ថកិច្ច និងការសម្របសម្រួល លើបញ្ហាគោលនយោបាយ និងច្បាប់ស្តីពីការប្រកួតប្រជែងនៅក្នុងចំណោមរដ្ឋជាសមាជិកអាស៊ាន»។
កិច្ចប្រជុំប្រធានស្ថាប័នប្រកួតប្រជែងអាស៊ាន គឺជាកិច្ចប្រជុំប្រចាំឆ្នាំដែលអនុញ្ញាតឱ្យប្រធានស្ថាប័នប្រកួតប្រជែងអាស៊ាន បានជួបជុំពិភាក្សាលើវឌ្ឍនភាពនៃសកម្មភាពដែលជាអាទិភាពក្រោមផែនការសកម្មភាពប្រកួតប្រជែងឆ្នាំ២០២៥។
លោកបានបញ្ជាក់ថា៖ «យើងបានពិភាក្សាលើគោលការណ៍ណែនាំក្នុងការចែករំលែកទៅលើករណីនៃការរួមបញ្ចូលគ្នានៃធុរកិច្ច និងប្រព័ន្ធព័ត៌មានលើករណីការរួមបញ្ចូលគ្នានៃធុរកិច្ចអាស៊ាន ហើយកិច្ចប្រជុំក៏បានពិភាក្សាអំពីផែនការសកម្មភាពប្រកួតប្រជែងសម្រាប់ក្រោយឆ្នាំ ២០២៥ ដែលគ្រោងកំណត់សកម្មភាពពាក់ព័ន្ធកិច្ចការប្រកួតប្រជែងសម្រាប់ ២០ ឆ្នាំខាងមុខ គឺរហូតដល់ឆ្នាំ ២០៤៥ ដែលជាក់ស្តែងក្រុមជំនាញការអាសាន និងលេខាធិការដ្ឋានអាស៊ាននឹងធ្វើការពិភាក្សាបន្ថែមលើការកំណត់សកម្មភាពទាំងនេះជាមួយភាគីពាក់ព័ន្ធ»។
ទន្ទឹមនឹងនេះ លោក ផាន អូន ឱ្យដឹងថា ក្នុងអំឡុងពេលនោះមន្ត្រីកម្ពុជាក៏បានជួបពិភាក្សាជាមួយដៃគូសន្ទនា ដើម្បីទទួលបានកិច្ចជំនួយបចេ្ចកទេសពីប្រទេសមួយចំនួន ដូចជាអូស្ត្រាលី និងប្រទេសអាល្លឺម៉ង់ បន្ទាប់ពីកម្ពុជា មានលិខិតបទដ្ឋានច្បាប់ និងក្រោមច្បាប់ ដើម្បីធានាដល់ការប្រកួតប្រជែងនៅក្នុងប្រទេស។
សូមបញ្ជាក់ផងដែរថា ច្បាប់ស្តីពីការប្រកួតប្រជែង របស់កម្ពុជា ត្រូវបានអនុម័ត និងត្រូវបានប្រកាសដាក់ឱ្យប្រើប្រាស់កាលពីឆ្នាំ ២០២១៕
