ភ្នំពេញៈ ​ប្រទេស​អូស្ត្រាលី​ជា​ដៃគូ​មួយ​យ៉ាងសំខាន់​ក្នុង​ការងារ​បោសសម្អាត​មីន​មនុស្សធម៌ ក្រៅពី​ការងារ​បោសសម្អាត​មីន ប្រទេស​អូស្ត្រាលី ក៏បាន​ចូលរួម​ដល់​កសាង​សមត្ថភាព និង​ការគាំទ្រ​ដល់​ការរៀបចំ​ផែនការ​យុទ្ធសាស្ត្រ​ជាតិ​សកម្មភាព​មីន ២០១៨-២០២៥ ផងដែរ​។​

​​អនុប្រធាន​ទី​១ អាជ្ញាធរ​មីន​កម្ពុជា លោក​ទេសរដ្ឋមន្ត្រី​លី ធុជ នា​ថ្ងៃទី​ ១៦ ខែមីនា ​បានអនុញ្ញាតឱ្យ លោក​ចា​ស្ទី​ន ខេ​វីន វ៉ា​យ​អេ​ត (Justin Kevin Whyatt)​ឯកអគ្គរាជទូត​អូ​ស្រា្ត​លី​ប្រចាំ​កម្ពុជា ចូលជួប​សម្តែង​ការគួរសម និង​ពិភាក្សា​ការងារ ស្តីពី​ភាពជា​ដៃគូ និង​កិច្ចសហប្រតិបត្តិការ​ស​កម្ម​ភាព​មីន​នៅ​កម្ពុជា នា​នៅ​ទី​ស្នាក់​អាជ្ញាធរ​មីន​។​

​លោក លី ធុជ បាន​វាយតម្លៃ​ខ្ពស់​ចំពោះ​ទំនាក់ទំនង​យ៉ាង​ជិតស្និទ្ធ​រវាង​ប្រទេស និង​ប្រជាជន​ទាំង២ ព្រមទាំង​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ​រដ្ឋាភិបាល និង​ប្រជាជន​អូស្ត្រាលី ដែល​បាន​ចូលរួម​ក្នុងការ​ស្វែងរក​សុខសន្តិភាព និង​ការអភិវឌ្ឍ​នៅ​កម្ពុជា ចាប់តាំងពី​ឆ្នាំ​១៩៩២ ក៏ដូចជា​ចូលរួម​ដល់​ការងារ​បោសសម្អាត​មីន​មនុស្សធម៌​នៅ​កម្ពុជា ផងដែរ​។

​លោក លី ធុជ ថ្លែងថា៖ «​ប្រទេស​អូស្ត្រាលី​គឺជា​ដៃគូ​មួយ​យ៉ាងសំខាន់​ក្នុង​ការងារ​បោសសម្អាត​មីន​មនុស្សធម៌ ដែល​បច្ចុប្បន្ននេះ​កំពុង​ចូលរួម​វិភាគទាន​តាម​រយៈ​គម្រោង​បោសសម្អាត​មីន​ដើម្បី​លទ្ធផល​»​។

​លោក​បាន​បន្តថា៖ «​ក្រៅពី​ការងារ​បោសសម្អាត​មីន ប្រទេស​អូស្ត្រាលី ក៏បាន​ចូលរួម​​កសាង​សមត្ថភាព និង​ការគាំទ្រ​ដល់​ការរៀបចំ​ផែនការ​យុទ្ធសាស្ត្រ​ជាតិ​សកម្មភាព​មីន ២០១៨-២០២៥ ផងដែរ​»​។​

​ជាមួយគ្នានេះ លោក​ទេសរដ្ឋមន្ត្រី ក៏បាន​លើកឡើង​អំពី​វឌ្ឍនភាព​នៃ​ការងារ​បោសសម្អាត​មីន និង​ការរៀបចំ​ផែនការ​បន្ត​ឆ្ពោះទៅរក​កម្ពុជា​គ្មាន​មីន​ឆ្នាំ​២០២៥ ចាប់ពី​ឆ្នាំ​២០២៣ ស្របតាម​ទស្សនវិស័យ​ដឹកនាំ​របស់លោក​នាយករ​ដ្ឋ​មន្ត្រី ហ៊ុន សែន​។

​មន្ត្រីជាន់ខ្ពស់​នៃ​អាជ្ញាធរ​មីន​រូបនេះ​ក៏បាន​បញ្ជាក់​បន្ថែមទៀត​ថា ទោះបី​សកម្មភាព​មីន​កម្ពុជា​ទទួលបាន​ជោគជ័យ​គួរ​ឱ្យកត់សម្គាល់​ពិតមែន តែ​កម្ពុជា​នៅតែ​បន្ត​ត្រូវការ​ការចូលរួម​ពី​ប្រទេស​អូស្ត្រាលី និង​ដៃគូ​អភិវឌ្ឍន៍​ដទៃទៀត ដើម្បី​សម្រេច​នូវ​គោលដៅ​របស់ខ្លួន​។​

​យោងតាម​អាជ្ញាធរ​មីន លោក Justin Kevin Whyatt​ ក៏បាន​លើកឡើង​ពី​ភាពជា​ដៃគូ និង​កិច្ចសហប្រតិបត្តិការ​រ​វាង​ប្រទេស​កម្ពុជា និង​អូស្ត្រាលី លើ​គ្រប់​វិស័យ​នៅ​កម្ពុជា​ផងដែ ក្នុងនោះ​រាប់បញ្ចូល​ទាំង​ការចូលរួម​ការងារ​បោសសម្អាត​មីនមនុស្សធម៌ អស់​រយៈពេល ៣០​ឆ្នាំ​មកនេះ​។

​ អាជ្ញាធរ​មីន​បាន​លើកឡើងថា ៖ «​ឯកអគ្គរាជទូត​អូ​ស្រា្ត​លី​ប្រចាំ​កម្ពុជា​បាន​វាយតម្លៃ​ខ្ពស់​ចំពោះ​វឌ្ឍនភាព​នៃ​សកម្មភាព​មីន​នៅ​កម្ពុជា ដោយ​ឃើញ​ពី​ការយកចិត្តទុកដាក់ និង​ការតាំង​ចិត្ត​ខ្ពស់​ពី​រាជរដ្ឋាភិបាល​កម្ពុជា ក្នុងការ​ដោះស្រាយ​បញ្ហា​មីន​ឱ្យអស់​ត្រឹម​ឆ្នាំ​២០២៥ ក៏ដូចជា​ការចូលរួម​យ៉ាង​ផុសផុល​ពី​វិស័យ​ឯកជន និង​សប្បុរសជន​នានា​»​។

​ ប្រទេស​អូស្ត្រាលី នឹង​បន្ត​ឈរ​ជាមួយ​រាជរដ្ឋាភិបាល​កម្ពុជា គាំទ្រ​ដល់​ការងារ​បោសសម្អាត​មីន​មនុស្សធម៌​រហូតដល់​ឆ្នាំ​២០២៥ និង​រីករាយ​ក្នុង​ភាពជា​ដៃគូ និង​កិច្ច​សហប្រតិបត្តិ​ការ​ជាមួយ​អាជ្ញាធរ​មីន​។ នេះ​បើតាម​អាជ្ញាធរ​មីន​។​

​ ដោយឡែក កាលពី​ថ្ងៃទី​១៥ ខែមីនា ក្នុងជំនួប​សម្តែង​ការគួរសម ជាមួយ​លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និង​សហប្រតិបត្តិការ​អន្តរជាតិ នា​ទីស្តីការក្រសួង លោក ចា​ស្ទី​ន ខេ​វីន វ៉ា​យ​អេ​ត (Justin Kevin Whyatt) ឯកអគ្គរាជទូត​ថ្មី​របស់​អូស្ត្រាលី​ប្រចាំ​កម្ពុជា បាន​លើកឡើងថា អូស្ត្រាលី បន្ត​កិច្ចសន្ទនា​ដោយ​ការគោរព ឈរលើ​មូលដ្ឋាន​ស្មើភាព និង​អធិបតេយ្យភាព សម្រាប់​ទំនាក់ទំនង​ប្រទេស​ទាំង២​។​

​លោក ចា​ស្ទី​ន ខេ​វីន វ៉ា​យ​អេ​ត ប្តេជ្ញា​ពង្រឹង​ទំនាក់ទំនង​ទ្វេភាគី​ជាមួយ​កម្ពុជា និង​ស្វែងរក​កាលា​នុ​វត្តភាព​នានា ដើម្បី​ពង្រឹង​ភាពជា​ដៃគូ ក្នុង​ក្របខ័ណ្ឌ​អាស៊ាន​-​អូស្ត្រាលី​។ នេះ​បើ​យោងតាម​សេចក្តីប្រកាស​ព័ត៌មាន​របស់​ក្រសួងការបរទេស និង​សហប្រតិបត្តិការ​អន្តរជាតិ​។​

​ សេចក្តីប្រកាស​ព័ត៌មាន​បាន​បញ្ជាក់ថា ខណៈពេលដែល​រដ្ឋាភិបាល​អូស្ត្រាលី កំពុង​រៀបចំ «​យុទ្ធសាស្ត្រ​សេដ្ឋកិច្ច​អាស៊ីអាគ្នេយ៍​រហូតដល់​ឆ្នាំ២០៤០» ឯកអគ្គរាជទូត​ថ្មី​រូបនេះ មានបំណង​លើកទឹកចិត្ត​ឱ្យមាន​ការវិនិយោគ​ប្រក​ប​ដោយ​គុណភាព មកកាន់​កម្ពុជា​ផងដែរ​។

​នាឱកាស​នោះ​លោក ប្រាក់ សុខុន ក៏បាន​ស្នើ​អូស្ត្រាលី បន្ត​ជួយ​គាំទ្រ​ការ​បោសសម្អាត​គ្រាប់មីន ដើម្បី​សម្រេចបាន​នូវ​គោលដៅ​កម្ពុជា​គ្មាន​គ្រាប់មីន​ត្រឹម​ឆ្នាំ​២០២៥​។ ក្រសួងការបរទេស​នៃ​ប្រទេស​ទាំង២ ទន្ទឹងរង់ចាំ «​កិច្ច​ពិគ្រោះ​យោបល់​ថ្នាក់​ឧ​ត្ត​ម​មន្ត្រី​» » លើក​ទី៤ ដែល​នឹង​ប្រព្រឹត្តទៅ​នៅ​ប្រទេស​កម្ពុជា នៅ​ឆ្នាំ​២០២៣ នេះ​៕