.jpg)
លោក ព្រុំ សុខា នៅក្នុងពិធីបូកសរុបការងារនាថ្ងៃទី ២១ មីនា។ ហុង មិនា
ភ្នំពេញៈ លោក ព្រុំ សុខា រដ្ឋមន្ត្រីក្រសួងមុខងារសាធារណៈ បានជំរុញឱ្យមានយុទ្ធសាស្ត្រកែទម្រង់រដ្ឋបាលសាធារណៈដើម្បីបន្តកសាងអភិវឌ្ឍន៍សមត្ថភាពធនធានមនុស្ស និងស្ថាប័នសំដៅឆ្លើយតបនឹងការវិវឌ្ឍរីកចម្រើនក្នុងយុគសម័យឌីជីថល ខណៈក្រសួងបានបង្ហាញសមិទ្ធផលការងារមួយចំនួនក្នុងរយៈពេល ៥ ឆ្នាំកន្លងមកនេះ។
នៅថ្ងៃទី ២១ ខែមីនា ឆ្នាំ ២០២៣ ក្រសួងមុខងារសាធារណៈ បានរៀបចំពិធីបើកសន្និបាតបូកសរុបសមិទ្ធផលការងាររយៈពេល ៥ ឆ្នាំចាប់ពីឆ្នាំ ២០១៨ ដល់ឆ្នាំ ២០២២ និងលើកទិសដៅបន្ត។ កម្មវិធីនេះ មានការចូលរួមពីតំណាងក្រសួង ស្ថាប័នថ្នាក់ជាតិ រដ្ឋបាលថ្នាក់ក្រោមជាតិ ក្នុងគោលបំណងបង្ហាញបេសកកម្ម និងភារកិច្ច ដែលក្រសួងសម្រេចបានក្នុងការងារកំណែទម្រង់រដ្ឋបាលសាធារណៈរបស់ខ្លួន។
ក្រសួងមុខងារសាធារណៈបានប្រកាសថា ក្រសួងបានខិតខំពុះពារសម្រេចបានសមិទ្ធផលសំខាន់ៗជាច្រើន ដូចជា ការគ្រប់គ្រងវិស័យមុខងារសាធារណៈត្រូវបានកែលម្អជាលំដាប់តាមរយៈការត្រួតពិនិត្យចំណុចឆកល្វែង ចន្លោះប្រហោងដែលនៅសេសសល់ក្នុងនីតិវិធីនៃការអនុវត្តច្បាប់ និងលិខិតបទដ្ឋាននានាកន្លងមក ដោយបានសិក្សាលើការធ្វើវិសោធនកម្មច្បាប់សហលក្ខន្តិកៈមន្ត្រីរាជការស៊ីវិល និងបានកែសម្រួល កែលម្អលិខិតបទដ្ឋានគតិយុត្តជាធរមាន និងរៀបចំតាក់តែងលិខិតូបករណ៍ថ្មី។
ជាមួយគ្នានោះក្រសួងបានរៀបចំសេចក្តីព្រាងព្រះរាជក្រឹត្យស្តីពីការប្រឡងជ្រើសរើសមន្ត្រីរាជការស៊ីវិល ដែលកំពុងត្រូវបានជំរុញបញ្ចប់ដំណើរការពិគ្រោះយោបល់ ដើម្បីដាក់ឆ្លងការពិនិត្យសម្រេចរបស់គណៈរដ្ឋមន្ត្រី ខណៈក្រសួងក៏បានបញ្ចប់ការសិក្សាគម្រោងមូលនិធិគាំពារសុខុមាលភាពមន្ត្រីរាជការដើម្បីស្នើសុំគោលការណ៍សម្រេចពីរាជរដ្ឋាភិបាលផងដែរ។
ទន្ទឹមនឹងនោះ ក្រសួងមុខងារសាធារណៈបានប្រមូលផ្តុំបង្កើនសមត្ថភាពអភិវឌ្ឍន៍ផ្នែករឹង និងផ្នែកទន់នៃប្រព័ន្ធគ្រប់គ្រងមន្ត្រីរាជការតាមព័ត៌មានវិទ្យា (HRMIS) និងបានយកចិត្តទុកដាក់ពង្រឹងអធិការកិច្ចមុខងារសាធារណៈ និងបានពង្រីកទំនាក់ទំនងអន្តរជាតិលើវិស័យមុខងារសាធារណៈទៀតផង។
ក្រសួងបានបញ្ជាក់ថា៖ «ការកែសម្រួលរចនាសម្ព័ន្ធ និងការកំណត់ឡើងវិញមុខងាររបស់អង្គភាព និងស្ថាប័ននៅថ្នាក់ជាតិ និងថ្នាក់ក្រោមជាតិដើម្បីសម្រួលសង្គតិភាពសកម្មភាព និងប្រសិទ្ធភាពការងារ។ គណៈកម្មាធិការកែទម្រង់រដ្ឋបាលសាធារណៈ និងរចនាសម្ព័ន្ធជាយន្តការគាំទ្រត្រូវបានរៀបចំកែសម្រួលបំពេញបន្ថែមឱ្យស្របតាមគោលនយោបាយកែទម្រង់របស់រាជរដ្ឋាភិបាល»។
ក្រៅពីនេះ នៅទីស្តីការក្រសួងមុខងារសាធារណៈ ក៏បានរៀបចំកែសម្រួលរចនាសម្ព័ន្ធ និងតួនាទីភារកិច្ចរបស់អង្គភាពចំណុះក្រសួងដោយបានបង្កើតថ្មីនូវអគ្គនាយកដ្ឋានកិច្ចការទូទៅ (នាយកដ្ឋាននីតិកម្ម នាយកដ្ឋានទំនាក់ទំនងសាធារណៈ នាយកដ្ឋានទំនាក់ទំនងអន្តរជាតិ..) ខណៈអគ្គនាយកដ្ឋាន IT ក៏បានសម្រួល (នាយកដ្ឋានផែនការ និងស្ថិតិមន្ត្រីរាជការ នាយកដ្ឋានគ្រប់គ្រងបៀវត្សរ៍មន្ត្រីរាជការ មជ្ឈមណ្ឌលគ្រប់គ្រងទិន្នន័យមន្ត្រីរាជការ និងបណ្តុះបណ្តាលIT...)។
ថ្លែងក្នុងឱកាសនោះ លោក ព្រុំ សុខា រដ្ឋមន្ត្រីក្រសួងមុខងារសាធារណៈ អះអាងថា ក្រៅពីសមិទ្ធផលការងារទាំងនេះ ការប្រើប្រាស់បច្ចេកវិទ្យាទំនើបឌីជីថលតាមរយៈម៉ាស៊ីនហាតវែរថ្មីសម្រាប់អភិវឌ្ឍប្រព័ន្ធគ្រប់គ្រងមន្ត្រីរាជការតាមព័ត៌មានវិទ្យា(HRMIS) បានលើកកម្ពស់ប្រសិទ្ធភាពនៃការគ្រប់គ្រងទិន្នន័យមន្ត្រីរាជការ ការបើកប្រាក់បៀវត្សរ៍ ការរៀបចំឡើងវិញនូវប្រព័ន្ធគ្រប់គ្រងសលាកបត្រព័ត៌មាន ការចូលនិវត្តន៍របស់មន្ត្រីរាជការ ការគ្រប់គ្រងមន្ត្រីជាប់កិច្ចសន្យា គ្រូបង្រៀនជាប់កិច្ចសន្យា និងប្រភេទបុគ្គលិកអណ្តែតដទៃទៀត។
លោកបានបញ្ជាក់ថា៖ «យើងក៏បានអភិវឌ្ឍប្រព័ន្ធនេះសម្រាប់គោលដៅផ្សេងទៀតរួមមាន៖ ការរៀបចំអត្តសញ្ញាណប័ណ្ណមន្ត្រីរាជការប្រភេទថ្មីជាទម្រង់ស្មាតកាត (Smart Card) ដែលអាចប្រើបានជាអត្តសញ្ញាណប័ណ្ណមន្ត្រីរាជការផង និងជាបណ្ណអេធីអឹមសម្រាប់បើកប្រាក់បៀវត្សរ៍ផង។ បន្ទាប់មក យើងបានដាក់ឱ្យដំណើរការកម្មវិធីផ្សេងទៀតដែលអាចឱ្យមន្ត្រីរាជការប្រើប្រាស់ជាមធ្យោបាយសម្រាប់ការពិនិត្យផ្ទៀងផ្ទាត់ព័ត៌មានផ្ទាល់ខ្លួន ដូចជា កម្មវិធី Mobile App (MCS Mobile) ជាដើម»។
លោកបានបន្ថែមថា៖ «យើងបានបង្កើតថ្មីនូវនាយកដ្ឋានគាំពារសុខុមាលភាពមន្ត្រីរាជការចំណុះអគ្គនាយកដ្ឋានគ្រប់គ្រងមុខងារសាធារណៈ និងបង្កើតនាយកដ្ឋានមួយចំនួនទទួលបន្ទុកអធិការកិច្ចថ្នាក់ជាតិ និងថ្នាក់ក្រោមជាតិ និងនាយកដ្ឋានដោះស្រាយវិវាទមុខងារសាធារណៈចំណុះអគ្គាធិការដ្ឋាន។ល»។
ជាមួយនឹងសមិទ្ធផល និងស្នាដៃទាំងនេះ លោក ព្រុំ សុខា ក៏ជំរុញឱ្យមន្ត្រីពាក់ព័ន្ធ មិនត្រូវបំភ្លេចមេរៀនពិសោធន៍រយៈពេលកន្លងទៅ និងបញ្ហាប្រឈមយ៉ាងស្រួចស្រាល់ចំពោះមុខ ក៏ដូចជាយូរអង្វែង ដើម្បីជាទិសដៅបន្តក្នុងការប្រមូលផ្តុំខិតខំសម្រេចភារកិច្ចការងារសំខាន់ៗបន្តទៀតនោះដែរ។ លោកបានជំរុញឱ្យមានយុទ្ធសាស្ត្រកែទម្រង់រដ្ឋបាលសាធារណៈដើម្បីបន្តកសាងអភិវឌ្ឍន៍សមត្ថភាពធនធានមនុស្ស និងស្ថាប័ន សំដៅឆ្លើយតបបានទាន់ពេលការវិវឌ្ឍក្នុងយុគសម័យឌីជីថលផងដែរ។
លោកបានបញ្ជាក់ថា៖ «សកម្មជំរុញអនុវត្តផែនការសកម្មភាពការងារកំណែទម្រង់សាធារណៈ និងគ្រប់គ្រងមុខងារសាធារណៈ ផ្តោតសំខាន់លើមុខសញ្ញាអាទិភាពរួមជាមួយការបន្តយកចិត្តទុកដាក់កិច្ចការលើកកម្ពស់ជីវភាព និងសុខុមាលភាពមន្ត្រីរាជការ ដើម្បីរួមចំណែកដល់ជោគជ័យនៃការអនុវត្តយុទ្ធសាស្ត្រចតុកោណរបស់រាជរដ្ឋាភិបាល»។
ក្រសួងបានប្រកាសថា គណៈកម្មាធិការកែទម្រង់រដ្ឋបាលសាធារណៈ នឹងរៀបចំវេទិកាជាតិមួយនៅមុនដំណាច់អាណត្តិទី៦ ស្តីពីបូកសរុបសមិទ្ធផលកែទម្រង់រដ្ឋបាលសាធារណៈរយៈពេល ៣០ ឆ្នាំកន្លងមកនេះ ដើម្បីត្រៀមលក្ខណសម្បត្តិល្អ គាំទ្រយុទ្ធសាស្ត្របញ្ចកោណរបស់រាជរដ្ឋាភិបាលសម្រាប់អាណត្តិខាងមុខ៕
