ឧត្តរមានជ័យៈ ពលរដ្ឋនៅទូទាំងខេត្តឧត្តរមានជ័យនឹងមានអគ្គិសនីប្រើប្រាស់ទាំងអស់ក្នុងអំឡុងខែមិថុនាខាងមុខ ខណៈបច្ចុប្បន្នអាជ្ញាធរខេត្តប្តេជ្ញាថា នឹងជំរុញឱ្យពលរដ្ឋនៅថ្នាក់មូលដ្ឋានមានអគ្គិសនីប្រើប្រាស់គ្រប់ៗគ្នា ដើម្បីរួមចំណែកកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ។
លោក ប៉ែន កុសល្យ អភិបាលខេត្តឧត្តរមានជ័យបានលើកឡើងក្នុងសន្និសីទសារព័ត៌មានស្ដីពី «ភាពជោគជ័យក្នុងរយៈពេល ៥ ឆ្នាំកន្លងមក» របស់រដ្ឋបាលខេត្តឧត្តរមានជ័យនាថ្ងៃទី ២១ ខែមីនា ឆ្នាំ ២០២៣ ថា គិតមកទល់ពេលនេះប្រជាពលរដ្ឋរស់នៅទូទាំងខេត្តចំនួនជាង ៣ ម៉ឺនគ្រួសារមានអគ្គិសនីប្រើប្រាស់ ខណៈបច្ចុប្បន្នរដ្ឋបាលខេត្ត និងភាគីអ្នកពាក់ព័ន្ធកំពុងពន្លឿនការតភ្ជាប់បណ្តាញអគ្គិសនីបន្ថែមទៀត។
លោកបានឱ្យដឹងថា៖ «ជារួមក្នុងចំណោម ប្រជាពលរដ្ឋ ៦៤ ៦៥៦ គ្រួសារយើងមាន ៣៣ ០៩៣ គ្រួសារ ស្មើនឹង ៩០,៤៧ ភាគរយមានអគ្គិសនីប្រើប្រាស់ហើយចំនួនដែលនៅសល់តាមការរំពឹងទុកនឹងមានអគ្គិសនីប្រើប្រាស់ទាំងអស់ក្នុងអំឡុងខែមិថុនាខាងមុខ ដោយបច្ចុប្បន្នក្រុមការងារកំពុងធ្វើការពង្រីកការតភ្ជាប់បណ្តាញអគ្គិសនីបន្ថែមទៀតដល់គ្រប់មូលដ្ឋានភូមិឃុំ ជាពិសេសនៅតំបន់ជនបទដាច់ស្រយាល»។
ក្រៅពីនោះលោក ប៉ែន កុសល្យ បានអះអាងថា ចំពោះវិស័យទឹកស្អាតដែលជាការងារអាទិភាពមួយទៀត រដ្ឋបាលខេត្តក៏កំពុងបន្តខិតខំប្រឹងប្រែងកែលម្អនិងលើកកម្ពស់ជីវភាពរស់នៅរបស់បងប្អូនប្រជាពលរដ្ឋផងដែរតាមរយៈការកែលម្អហេដ្ឋារចនាសម្ព័ន្ធគមនាគមន៍ឱ្យកាន់តែប្រសើរថែមទៀតដូចជា ការស្តារប្រព័ន្ធធារាសាស្ត្រដែលមានសក្តានុពលនៅក្នុងខេត្តឡើងវិញបន្ថែមទៀត។
ទាក់ទិននឹងបញ្ហាអគ្គិសនី លោក ភុន ឡែន ប្រធានមន្ទីររ៉ែ និងថាមពលខេត្តឧត្តរមានជ័យបានបញ្ជាក់ដែរថា ដើម្បីសម្រេចបានលើកិច្ចការនេះ រដ្ឋបាលខេត្ត ពិសេសមន្ទីររ៉ែ និងថាមពល នឹងខិតខំផ្តល់យោបល់និងកំណត់ទិសដៅខេត្តដើម្បីឈានទៅពង្រីកបណ្តាញអគ្គិសនីនៅទូទាំងខេត្តឱ្យបានគ្រប់ជ្រុងជ្រោយ។
លោកបានថ្លែងថា៖« ជាងនេះទៀតមន្ទីរនឹងខំទាក់ទាញវិនិយោគឱ្យមកអភិវឌ្ឍមូលដ្ឋានពិសេសលើគម្រោងថាមពលឱ្យកាន់តែខ្លាំងទ្វេដងសំដៅធានាការប្រើប្រាស់អគ្គិសនីដោយពង្រឹងការគ្រប់គ្រង ការចាត់ចែង និងការប្រើប្រាស់អគ្គិសនីឱ្យបានល្អ និងមានបរិយាប័ន្ន»។
យោងតាមរបាយការណ៍របស់រដ្ឋបាលខេត្តឧត្តរមានជ័យបានបង្ហាញថា បច្ចុប្បន្ននៅទូទាំងខេត្តឧត្តរមានជ័យ មានក្រុមហ៊ុន និងសេវាករអគ្គិសនីចំនួន ១០ ក្នុងនោះមាន៖ ក្រុមហ៊ុនចំនួន ៤ និងសេវាករអគ្គិសនីចំនួន ៦ ដែលកំពុងផ្គត់ផ្គង់បណ្ដាញអគ្គិសនីក្នុងខេត្ត ក្នុងនោះក្នុងចំណោម ៣០៨ ភូមិនៃខេត្តនេះ នៅសល់តែ ៣២ ភូមិប៉ុណ្ណោះដែលមិនទាន់មានបណ្តាញអគ្គិសនីប្រើប្រាស់។
ជាងនេះទៀត ខេត្តក៏មានរោងចក្រអគ្គិសនីដើរដោយថាមពលធ្យូងថ្ម ១ កន្លែងផងដែរនៅក្នុងស្រុកត្រពាំងប្រាសាទដោយបានសាងសង់ខ្សែបញ្ជូនអគ្គិសនីពីខេត្តឧត្តរមានជ័យទៅកាន់អនុស្ថានីយខាងកើតសៀមរាបរួចរាល់ និងគ្រោងដំណើរការក្នុងពេលឆាប់ៗខាងមុខផងដែរ។
ដោយឡែក ការងារទឹកស្អាតវិញ បច្ចុប្បន្នខេត្តនេះមានក្រុមហ៊ុនទឹកស្អាតឯកជនចំនួន ៥ ប្រតិបត្តិករ គ្របដណ្តប់ការផ្គត់ផ្គង់ទឹកស្អាតបាន ៣៤ ភូមិលើ ៣០៨ ភូមិ ដោយមានពលរដ្ឋទទួលផលប្រមាណ ២៧ ៥៣៦ នាក់ និងកំពុងបង្កើនការផ្គត់ផ្គង់បន្ថែមជាបន្តបន្ទាប់។
សូមជម្រាបថា បើតាមអគ្គិសនីកម្ពុជាធ្លាប់បានឱ្យដឹងថា សព្វថ្ងៃនេះ អាជ្ញាធរអគ្គិសនី និងសេវាករឯកជនបានផ្គត់ផ្គង់អគ្គិសនីប្រមាណជាង ៩៩ ភាគរយនៃចំនួនភូមិសរុបនៅទូទាំងប្រទេសកម្ពុជាដោយសល់ ១ ភាគរយទៀត ឬភូមិចំនួន ៨៨ នៅពុំទាន់មានការផ្គត់ផ្គង់ពីបណ្តាញជាតិទៅដល់។ ភូមិដែលនៅសល់នោះភាគច្រើនមានសភាពលំបាកដែលអាជ្ញាធរអគ្គិសនីមិនអាចតភ្ជាប់បានភ្លាមៗ និងភូមិខ្លះនៅលើទឹកជាដើម៕