ភ្នំពេញៈ លោក​វីន ហេនដឺសាន់ ​(Vince Henderson) ​រដ្ឋមន្ត្រី​ការបរទេស ​ធុរកិច្ច​អន្តរជាតិ ​ពាណិជ្ជកម្ម ​និង​ថាមពល ​នៃ​ប្រទេស​ខមម៉ិនវ៉ែល​ដូមីនីក​ បានមក​បំពេញ​ទស្សនកិច្ច​ផ្លូវការ​នៅ​ព្រះរាជា​ណាចក្រ​កម្ពុជា ​រយៈពេល​ ៣ ថ្ងៃ ​ចាប់ពី​ថ្ងៃទី ២២-២៤ ​ខែមីនា ​ឆ្នាំ ២០២៣ ​ដើម្បី​ពង្រឹង​បន្ថែមទៀត​នូវ​ទំនាក់​ទំនង​ការទូត ​និង​ពង្រីក​កិច្ចសហ​ប្រតិបត្តិការ ​រវាង​ព្រះរាជា​ណាចក្រ​កម្ពុជា ​និង​ប្រទេស​ខមម៉ិន​វ៉ែល​ដូមីនីក ។

តាម​សេចក្តី​ប្រកាសព័ត៌មាន​របស់​ក្រសួង​ការបរទេស ​និង​សហប្រតិបត្តិការ​អន្តរជាតិ ​កាលពី​ថ្ងៃទី ២១ ​ខែមីនា ​កម្ពុជា​ស្វា​គមន៍​យ៉ាងកក់​ក្ដៅ​ចំពោះ​ដំណើរ​ទស្សនកិច្ច​ផ្លូវការ ​លើក​ដំបូង​របស់​រដ្ឋមន្ត្រី​ការបរទេស ​នៃ​ប្រទេស​ខមម៉ិនវ៉ែល​ដូមីនីក ​មកកាន់​ព្រះរាជា​ណា​ចក្រ​កម្ពុជា​។

សេចក្តី​ប្រកាស​ព័ត៌មាន ​បញ្ជាក់ថា ​ក្នុង​អំឡុង​ពេល​នៃ​ដំណើរ​ទស្សនកិច្ច​នេះ ​លោក​វីន ហេនដឺសាន់ ​នឹង​អញ្ជើញ​ចូលជួប​សម្តែង​ការគួរ​សម​ជាមួយ​លោក​ ហ៊ុន សែន ​នាយករដ្ឋមន្ត្រី​នៃ​ព្រះរាជា​ណាចក្រ​កម្ពុជា។

ប្រភព​ដដែល​បន្តថា ​លោក​រដ្ឋមន្ត្រី​ការបរទេស​ដូមីនីក ​នឹង​ជួប​ប្រជុំ​ទ្វេភាគី​ជាមួយ ​លោក​អ៊ុច បូររិទ្ធ ​រដ្ឋមន្ត្រី​ស្តីទី ​នៃ​ក្រសួង​ការបរទេស ​និង​សហប្រតិបត្តិការ​អន្តរជាតិ ​និង​ជារដ្ឋមន្ត្រី​ប្រតិភូ​អម​នាយក​រដ្ឋមន្ត្រី។ ក្នុង​ឱកាស​នោះ ​វិស័យ​ផ្សេងៗ ​នៃ​កិច្ចសហប្រតិបត្តិការ​ទ្វេភាគី ​តំបន់ ​និង​អន្តរជាតិ ​នឹង​ត្រូវ​លើក​យកមក​ពិភាក្សា។ បន្ទាប់ពី​ជំនួប​ទាំងនោះ ​ភាគី​ទាំង២ ​នឹង​ចុះហត្ថលេខា​លើ​កិច្ចព្រមព្រៀង​ រវាង​រដ្ឋាភិបាល​នៃ​ព្រះរាជា​ណាចក្រ​កម្ពុជា ​និង​រដ្ឋាភិបាល​នៃ​ប្រទេស​ខមម៉ិនវ៉ែល​ដូមីនីក ​ស្តីពី​ការលើកលែង​ទិដ្ឋាការ ​សម្រាប់​អ្នកកាន់​លិខិត​ឆ្លងដែន​ការទូត ​និង​ផ្លូវការ។

បើ​តាម​ក្រសួង​ការបរទេស ​ដំណើរ​ទស្សនកិច្ច​ផ្លូវការ​ជាលើក​ដំបូង​របស់ ​លោក​វីន ហេនដឺសាន់ ​មកកាន់​ព្រះរាជាណា​ចក្រ​កម្ពុជា ​នឹង​ពង្រឹង​បន្ថែម​ទៀត​នូវ​ទំនាក់​ទំនង​ការទូត ​និង​ពង្រីក​កិច្ចសហប្រតិបត្តិការ ​រវាង​ព្រះរាជា​ណាចក្រ​កម្ពុជា ​និង​ប្រទេស​ខមម៉ិនវ៉ែល​ដូមីនីក​ សម្រាប់​ផល​ប្រយោជន៍​ទៅវិញ​ទៅមក​ នៃ​ប្រទេស​ទាំង​២។

លោក ​យង់ ពៅ ​អគ្គលេខាធិការ​នៃ​រាជបណ្ឌិត្យ​សភា​កម្ពុជា ​បានថ្លែងថា ​ លោក​គាំទ្រ​ចំពោះ​ការមក​បំពេញ​ទស្សនកិច្ច ​លោក​ វីន ហេនដឺសាន់​ (Vince Henderson) ​រដ្ឋមន្ត្រី​ការបរទេស ​ធុរកិច្ច​អន្តរជាតិ ​ពាណិជ្ជកម្ម ​និង​ថាមពល ​នៃ​ប្រទេស​ខមម៉ិនវ៉ែល​ដូមីនីក​ នៅ​ប្រទេស​កម្ពុជា​នា​ពេល​នេះ ​ដែល​ជាផ្នែក​មួយ​នៃ​ការពង្រឹង​ការទូត​រវាង​ភាគី​ទាំង២។

លោក​បន្តថា ​ប្រទេស​ខមម៉ិនវ៉ែល​ដូមីនីក​ស្ថិតក្នុង​មហាសមុទ្រ​ប៉ាស៊ីហ្វិក​នៃ​ទ្វីប​អាហ្វ្រិក​ខាងជើង ​ និង​ជាប្រទេស​តូច​មួយ។ ទោះជា​យ៉ាងណា​ នេះ​គឺជា​ការបោះ​ជំហាន​របស់​កម្ពុជា ​ទៅរក​បណ្តា​ប្រទេស​នានា ​នៅលើ​សកលលោក ​ ដើម្បី​ពង្រីក​ទំនាក់ទំនង ​និង​កិច្ចសហប្រតិបត្តិការ​លើស​ពី​អ្វី​ដែល​មាន​ស្រាប់ ​ដោយ​មិន​គិតថា​ ប្រទេស​តូច ​ឬ​ប្រទេស​ធំ​នោះ​ទេ។

លោក​ថ្លែងថា​៖«យើង​បោះជំហាន​ទៅ​មុខ​ជានិច្ច ​នេះ​ជាការផ្សារ​ភ្ជាប់​នៃ​ការពង្រីក​ទំនាក់​ទំនង​ការបរទេស​របស់​កម្ពុជា ​ នៅលើ​ពិភពលោក​ទាំង​មូល។ បើទោះ​បីជា​នៅ​ទីណា​កន្លែងណា ​ប្រទេស​យ៉ាង​ណា​ក៏ដោយ​ចុះ ​កម្ពុជា​ត្រូវតែ​ពង្រឹង ​និង​ពង្រីក​ទំនាក់​ទំនង​នេះ»។

បើ​តាម​លោក​យង់ ពៅ ​ការបោះ​ជំហាន​របស់​កម្ពុជា ​ជាមួយ​នឹង​ប្រទេស ​ខមម៉ិនវ៉ែល​ដូមីនីក​នេះ ​ គឺជា​ការល្អ​មួយ​សម្រាប់​ផ្សារភ្ជាប់​ទៅកាន់​ទ្វីប​ អាហ្វ្រិក​ខាងជើង ​ក៏ដូច​បណ្តា​រដ្ឋ​កោះ​នៅ​ក្នុង​តំបន់​មហាសមុទ្រ​នេះ​ផងដែរ ​ដើម្បី​ជាការតភ្ជាប់​ទាំង​សេដ្ឋកិច្ច ​នយោបាយ ការទូត ​និង​ទេស​ចរណ៍​ជាដើម ​ព្រោះ​តំបន់​នេះ ​លោក​នាយករដ្ឋមន្ត្រី​ហ៊ុន សែន ​ក៏ធ្លាប់​បាន​ទៅ​បំពេញ​ទស្សនកិច្ច​នៅ​ប្រទេស​មួយ​ ដែល​មាន​សក្តានុ​ពល​ទេសចរណ៍​ផង​ដែរ ។

លោក​លើកឡើង​ថា​៖«ដូច្នេះ ​ខ្ញុំ​យល់​ឃើញថា ​ប្រទេស​ខមម៉ិនវ៉ែល​ដូមីនីក ​ក៏​មាន​សក្តានុពល​ខ្លាំង​ផងដែរ ​ព្រោះ​បានតភ្ជាប់​ជាមួយ​បណ្តា​ប្រទេស​នានា​នៅ​ក្នុង​តំបន់​នោះ»៕