.jpg)
រថយន្ដខូចខាត ក្រោយបុកជាមួយរថភ្លើងកាលពីថ្ងៃទី ២១ មីនា ។ រូបថត PNN
ព្រះសីហនុៈ មន្ត្រីនគរបាលមូលដ្ឋានបានឱ្យដឹងថា មនុស្ស ៤ នាក់បានរងរបួសធ្ងន់ និងស្រាល ដោយសារគ្រោះថ្នាក់ចរាចរណ៍រវាងរថភ្លើងដឹកអ្នកដំណើរបុកជាមួយរថយន្តដឹកដីនៅលើកំណាត់ផ្លូវដែកពីភ្នំពេញ-ក្រុងព្រះសីហនុ ត្រង់ភូមិសាស្ត្រ ឃុំទឹកថ្លា ស្រុកព្រៃនប់ ខេត្តព្រះសីហនុ កាលពីល្ងាចថ្ងៃទី ២១ ខែមីនា ឆ្នាំ ២០២៣។
លោក ទ្រី ផល ណារិន នាយផ្នែកសណ្ដាប់ធ្នាប់ចរាចរណ៍នៃអធិការដ្ឋាននគរបាលស្រុកព្រៃនប់ បានប្រាប់ភ្នំពេញថា អ្នកបើកបររថយន្តដឹកដីឈ្មោះ រើ ជីវ័ន អាយុ៣៣ឆ្នាំ បានរងរបួសធ្ងន់ និងអ្នករួមដំណើរឈ្មោះ កែវ ពិសិដ្ឋ អាយុ៤០ឆ្នាំ បានរងរបួសមធ្យម។ អ្នកទាំង២ មានលំនៅក្នុងក្រុងបូកគោ ខេត្តកំពត ត្រូវបានសមត្ថកិច្ច និងក្រុមគ្រួសារសាច់ញាតិនាំយកទៅព្យាបាលនៅមន្ទីរពេទ្យឯកជនមួយក្នុងក្រុងបូកគោ។
ចំណែកអ្នកបើកបររថភ្លើងឈ្មោះ អ៊ុំ សម្បត្តិ អាយុ៥៥ឆ្នាំ មានលំនៅក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ បានរងរបួសភ្លៅខាងឆ្វេង ត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត ក្នុងរាជធានីភ្នំពេញ។ រីឯជំនួយការរបស់គាត់ឈ្មោះ រុំ អាយុ៣៩ឆ្នាំ បានរងរបួសស្រាល។
លោកបានបញ្ជាក់ថា៖«គ្រោះថ្នាក់ចរាចរណ៍នេះ គឺបណ្ដាលមកពីអ្នកបើកបររថយន្តព្យាយាមបើកឆ្លងកាត់ផ្លូវរថភ្លើងក្នុងស្ថានភាពគ្រោះថ្នាក់»។
បើតាមលោកណារិន រថភ្លើងដឹកអ្នកដំណើរនោះ មានផ្ទុកអ្នកដំណើរទាំងខ្មែរ និងបរទេសសរុបចំនួន២២នាក់។ក្នុងហេតុការណ៍នេះ មិនបណ្ដាលឱ្យអ្នកដំណើរណាម្នាក់រងរបួសទេ។ ក្រោយកើតហេតុ ភាគីខាងក្រុមហ៊ុនរថភ្លើងបានដឹកអ្នកដំណើរទៅកាន់ស្ថានីយ និងដើម្បីជួសជុលរថភ្លើង។ ចំណែករថយន្តដឹកដី ត្រូវបានសមត្ថកិច្ចស្ទូចអូសយកទៅរក្សាទុកនៅអធិការដ្ឋាននគរបាលស្រុកព្រៃនប់ ដើម្បីរង់ចាំតំណាងភាគីទាំងសងខាងចូលមកសម្របសម្រួលដំណោះស្រាយតាមនីតិវិធី។
ចាប់តាំងពីដើមខែមករា ឆ្នាំ២០២៣ មកដល់ពេលនេះ មានគ្រោះថ្នាក់ចរាចរណ៍រវាងរថភ្លើង និងរថយន្តចំនួន៣លើក ដែលលើកទី១ បានកើតឡើងកាលពីថ្ងៃទី១៧ ខែមករា ដោយរថភ្លើងដឹកប្រេងបុករថយន្តដឹកថ្មនៅចំណុចផ្លូវហាយវ៉េ ក្នុងភូមិអូរដំបង ឃុំអូរដំបង២ ស្រុកសង្កែ ខេត្តបាត់ដំបង។ ក្នុងហេតុការណ៍នោះទាំងរថយន្ត និងរថភ្លើងបានក្រឡាប់ ប៉ុន្តែមិនបង្កគ្រោះថ្នាក់ដល់អ្នកបើកបរ ទាំងរថភ្លើង និងរថយន្តនោះទេ។ ចំណែកមូលហេតុ គឺបណ្ដាលមកពីអ្នកបើកបរថយន្ត បើកបំពានស្លាកសញ្ញា និងបទបញ្ជារបស់មន្ត្រីដែលប្រចាំការនៅទីតាំងនោះ។ រីឯលើកទី២ បានឡើងនៅថ្ងៃទី១៥ ខែមីនា ឆ្នាំ២០២៣ នៅចំណុចភូមិព្រែកអម្ពិល សង្កាត់កោះតូច ក្រុងបូកគោ ខេត្តកំពត ដោយរថភ្លើងបានបុកលើរថយន្តព្រុសបណ្ដាលឱ្យភាគីខាងរថយន្តរងរបួសធ្ងន់-ស្រាលចំនួន៣នាក់ ដែលហេតុការណ៍នេះក៏ជាកំហុសរបស់អ្នកបើកបររថយន្តផងដែរ។
ជុំវិញករណីគ្រោះថ្នាក់ចរាចរណ៍រវាងរថភ្លើង និងរថយន្តដែលត្រូវបានគេរកឃើញកំហុសបង្កឡើងពីអ្នកបើកបររថយន្តខ្វះការប្រុងប្រយ័ត្ននេះ លោក ណារិន បានពន្យល់ថា៖«ជាទូទៅ រាល់គ្រោះថ្នាក់ចរាចរណ៍លើកំណាត់ផ្លូវដែក មិនមែនជាកំហុសរបស់អ្នកបើកបររថភ្លើងទេ ប៉ុន្តែវាជាកំហុសរបស់អ្នកបើកបររថយន្ត ម៉ូតូ កង់ ឬ អ្នកថ្មើរជើង ដែលព្យាយាមឆ្លងកាត់ផ្លូវរថភ្លើង ក្នុងស្ថានភាពគ្រោះថ្នាក់ ឬ ដោយខ្វះការប្រុងប្រយ័ត្នប៉ុណ្ណោះ»។
លោកបានបន្តថា នៅគ្រប់ចំណុចទីតាំងទាំងអស់នៃផ្លូវរថភ្លើងត្រូវឆ្លងកាត់ផ្លូវជាតិឬផ្លូវលំគឺមានដាំបង្គោលស្លាកសញ្ញារថភ្លើងឆ្លងកាត់ និងភ្លើងសញ្ញាប្រុងប្រយ័ត្ន ហើយមុនពេលរថភ្លើងមកដល់ចំណុចឆ្លងកាត់ផ្លូវជាតិឬផ្លូវលំទាំងនោះក្នុងរយៈចម្ងាយប្រមាណ២០០ម៉ែត្រ គឺតែងតែបន្លឺសំឡេងស៊ីផ្លេ ដើម្បីឱ្យអ្នកធ្វើដំណើរទាំងអស់ដែលត្រូវឆ្លងកាត់ផ្លូវរថភ្លើងបានដឹងនឹងឈប់ចត។ ជាពិសេសនៅតាមផ្លូវជាតិ ដែលមានរថយន្តតូច-ធំ ឆ្លងកាត់ច្រើន គឺមានដាក់របាំងការពារសុវត្ថិភាពកាត់ទទឹងផ្លូវជាតិ និងមានទាំងមន្ត្រីជំនាញឈរបញ្ជាចរាចរណ៍ និងបិទ-បើករបាំងសុវត្ថិភាពនោះ ផងដែរ ។
លោក គង់ សុវណ្ណ ប្រធានគម្រោងអប់រំផ្សព្វផ្សាយសុវត្ថិភាពចរាចរណ៍នៃក្រសួងអភិវឌ្ឍនជនបទ បានថ្លែងថា ដើម្បីបង្ការទប់ស្កាត់គ្រោះថ្នាក់ចរាចរណ៍នៅតាមកំណាត់ផ្លូវដែក អ្នកប្រើប្រាស់យានជំនិះគ្រប់ប្រភេទ ត្រូវបន្ថយល្បឿននៅពេលជិតដល់ផ្លូវរថភ្លើង។
លោកបានបន្តថា នៅកន្លែងផ្លូវថ្នល់កាត់ផ្លូវរថភ្លើងដែលមានដាក់របារ ឬរបាំង អ្នកបើកបរមិនត្រូវបើកបរចូលទៅទីនោះ នៅពេលរបាំងបិទឬកំពុងបិទ ឬកំពុងបើកឡើយ និងត្រូវស្តាប់បញ្ជាឆ្មាំហើយ មិនត្រូវបង្កឱ្យមានឧបសគ្គដល់ការបិទបើករបារ ឬរបាំងឡើយ។ ជាពិសេស «ត្រូវឈប់ជាបន្ទាន់ ក្នុងចម្ងាយយ៉ាងតិចពី២-៥ម៉ែត្រ កាលបើឃើញមានរថភ្លើងមកជិតដល់ ឬបន្លឺសញ្ញាថាជិតមកដល់» ដើម្បីទុកផ្លូវឱ្យរថភ្លើងធ្វើចរាចរណ៍ទៅមុន។ ក្នុងស្ថានភាពដូចគ្នានេះគង្វាលសត្វទាំងអស់ត្រូវរកវិធីទប់ស្កាត់ហ្វូងសត្វពាហនៈរបស់ខ្លួន កុំឱ្យឆ្លងកាត់ផ្លូវរថភ្លើងជាដាច់ខាត។
លោកបានបន្ថែមថា ក្នុងករណីដែលយានជំនិះគាំងដំណើរ ឬហ្វូងសត្វ ធ្វើដំណើរចូលមកជ្រុលទៅលើផ្លូវរថភ្លើង អ្នកបើកបរ ឬគង្វាលសត្វ ត្រូវរិះរកមធ្យោបាយកុំឱ្យមានកើតជាឧបសគ្គដល់រថភ្លើង ឬត្រូវឱ្យដំណឹងដល់ភ្នាក់ងារទទួលខុសត្រូវផ្លូវរថភ្លើង ដែលនៅជិតបំផុតអំពីគ្រោះថ្នាក់ដែលនឹងអាចកើតឡើង ប្រសិនបើខ្លួនមិនអាចបញ្ចៀសឧបសគ្គលើផ្លូវរថភ្លើងដោយខ្លួនឯងបាន៕
