ភ្នំពេញៈ ពុទ្ធិកសាកលវិទ្យាល័យព្រះសីហនុរាជ (ព.ស.ស.) ដែលជាស្ថាប័នអប់រំបណ្តុះបណ្តាលកម្រិតឧត្តមសិក្សាដ៏មានវ័យចំណាស់បំផុតនៅកម្ពុជា គ្រោងបើកបង្រៀនថ្នាក់បណ្ឌិតភាសាបាលី នៅពេលខាងមុខ ដើម្បីជំរុញការសិក្សារបស់សមណនិស្សិត និងនិស្សិតបន្តទៅមុខទៀត។
ព្រះតេជគុណ យ៉ន សេងយៀត សាកលវិទ្យាធិការរងទទួលបន្ទុកសាកលវិទ្យាល័យព្រះសីហនុរាជ មានថេរដីកាប្រាប់ភ្នំពេញប៉ុស្តិ៍ថា ដោយសារមានធនធានមនុស្សមួយចំនួន បានបញ្ចប់ការសិក្សាកម្រិតបណ្ឌិតពីសាកលវិទ្យាល័យពីប្រទេសស្រីលង្កា និងប្រទេសភូមា ពុទ្ធិកសាកលវិទ្យាល័យព្រះសីហនុរាជ អាចមានលទ្ធភាពបើកថ្នាក់កម្រិតបណ្ឌិតលើមុខវិជ្ជាភាសាបាលី បន្តពីថ្នាក់អនុបណ្ឌិតដែលកំពុងបណ្តុះបណ្តាលសព្វថ្ងៃនេះ។ ព្រះអង្គ មានថេរដីកាថា៖ «យើងកំពុងរៀបចំចាប់ផ្តើមបង្កើតថ្នាក់បណ្ឌិតទៀត»។
ក្នុងរយៈពេលចុងក្រោយនេះ ពុទ្ធិកសាកលវិទ្យាល័យព្រះសីហនុរាជ បានបង្កើនកិច្ចសហប្រតិបត្តិការជាមួយស្ថាប័នអប់រំនៅក្រៅប្រទេសមានដូចជាប្រទេសឥណ្ឌាជាដើម។ ជាក់ស្តែង កាលពីថ្ងៃទី ១៥ ខែមីនា ឆ្នាំ ២០២៣ ពុទ្ធិកសាកលវិទ្យាល័យព្រះសីហនុរាជ បានចុះហត្ថលេខាលើអនុស្សរណៈនៃការយោគយល់គ្នាជាមួយ សាកលវិទ្យាល័យសោមៃយ វិទ្យាវិហារ ប្រទេសឥណ្ឌា (Somaiya Vidyavihar University,Mumbai,lndia) ដោយមានគោលបំណងបង្កើតវេទិកាសិក្សាមួយ ដើម្បីចូលរួមជាមួយនិស្សិត និងសាស្ត្រាចារ្យវ័យក្មេង ដើម្បីបង្កើតសមត្ថភាពសម្រាប់គាំទ្រដល់ការអភិវឌ្ឍរួមនៃគុណភាព និងប្រព័ន្ធអប់រំទំនើប។
យោងតាមខ្លឹមសារអនុស្សរណៈនៃការយោគយល់គ្នា ភាគីទាំង ២ នឹងផ្តោតសំខាន់លើការផ្តាស់ប្តូរនិស្សិត (Students Exchange) ការផ្តាស់ប្តូរទស្សនកិច្ចសិក្សា (Faculty Visit and Exchange) ការសិក្សាឆ្លងស្ថាប័ន (Cross institutional Study) ការលើកកម្ពស់មុខវិជ្ជាសិក្សា (Promotion of Courses and Pathway) ការចែករំលែកព័ត៌មាន និងសេវាកម្មជាដើម។
ព្រះតេជគុណ យ៉ន សេងយៀត បានឱ្យដឹងថា ព្រះអង្គកំពុងសិក្សាបង្កើតកិច្ចសហប្រតិបត្តិការជាមួយបណ្តាសាកលវិទ្យាល័យមួយចំនួន នៅក្នុងប្រទេសថៃ ស្រីលង្កា និងមីយ៉ាន់ម៉ា សម្រាប់ពុទ្ធសាសនាថេរវាទ និងពុទ្ធសាសនាមហាយាន ដោយមានកិច្ចសហប្រតិបត្តិការជាមួយសាកលវិទ្យាល័យនៅប្រទេសកូរ៉េ ចិន និងកោះតៃវ៉ាន់។ ក្រៅពីនោះ ក៏មានសាកលវិទ្យាល័យ នៅសហរដ្ឋអាមេរិកផងដែរ។
ព្រះអង្គបញ្ជាក់ថា៖ «ដោយផ្អែកលើមូលដ្ឋានរបស់យើងដែលមានឯកទេសស្នូលនៃការបណ្តុះបណ្តាលលើបាលីសំស្ក្រឹត និងព្រះពុទ្ធសាសនា យើងផ្តោតលើឯកទេសទាំងនេះនៅពេលយើងចុះ MoU ជាមួយប្រទេសខាងក្រៅ។ យើងក៏នឹងមានការសហការលើឯកទេសផ្សេងៗដែរ ប៉ុន្តែជាចម្បងអាត្មាព្យាយាមធ្វើការជាមួយសាកលវិទ្យាល័យដទៃ ដោយផ្តើមចេញពីឯកទេសពុទ្ធសាសនានេះ»។
ព្រះតេជគុណ សែម ឈុនលី ដែលជាព្រះសង្ឃខ្មែររៀនចប់ថ្នាក់បណ្ឌិតភាសាបាលី ពីប្រទេសស្រីលង្កាកាលពីឆ្នាំ ២០២២ និងជាប្រធានសមាគមទ្រទ្រង់បាលីដែលទើបបង្កើតឡើងនៅកម្ពុជា បានមានថេរដីកាថា រហូតដល់ពេលបច្ចុប្បន្ននេះ ព.ស.ស បានបណ្តុះបណ្តាលថ្នាក់បរិញ្ញបត្រជាន់ខ្ពស់ភាសាបាលីចំនួន ២ ជំនាន់ ហើយជំនាន់ទី ១ នឹងត្រូវការពារសារណាបញ្ចប់ថ្នាក់បរិញ្ញាបត្រជាន់ខ្ពស់នៅចុងខែមេសាខាងមុខ។
ព្រះតេជគុណ សែម ឈុនលី បច្ចុប្បន្នក៏កំពុងបំពេញតួនាទីជាអនុប្រធាននៃការិយាល័យក្រោយឧត្តមសិក្សានៅពុទ្ធិកសាកលវិទ្យាល័យព្រះសីហនុរាជផងដែរនោះ លើកឡើងថា ដោយមានការលើកទឹកចិត្តពីថ្នាក់ដឹកនាំស្ថាប័នព្រះពុទ្ធសាសនាគ្រូភាសាបាលីបញ្ចប់បរិញ្ញាបត្រមុខវិជ្ជាផ្សេងៗ ប៉ុន្តែបានបង្រៀនយូរឆ្នាំក៏អាចមានសិទ្ធិចូលរៀនថ្នាក់បរិញ្ញាបត្រជាន់ខ្ពស់ភាសាបាលីបានផងដែរ។
ព្រះអង្គបញ្ជាក់ថា៖ «យើងមានសមត្ថភាពបើកបាន ប៉ុន្តែយើងត្រូវរៀបចំដំណើរការលិខិតគតិយុត្តនានា ហើយម្យ៉ាងទៀត យើងនៅខ្វះកញ្ចប់ថវិកា ព្រោះការបើកថ្នាក់បណ្ឌិត ការប្រើប្រាស់ថវិកាកាន់តែច្រើន»។
លោកវេជ្ជបណ្ឌិត គួច ម៉េងលី ដែលជាធុរជនកំពុងដឹកនាំក្រុមហ៊ុនឯកជនក្នុងវិស័យអប់រំ និងក្នុងវិស័យផ្សេងៗទៀត ប្រាប់ភ្នំពេញប៉ុស្តិ៍ថា លោកបានផ្តល់អាហារូបករណ៍អស់ជាង ២០ ០០០ ដុល្លារសម្រាប់ព្រះសង្ឃក្នុងវិស័យពុទ្ធសាសនា ដែលសិក្សានៅពុទ្ធិកសាកលវិទ្យាល័យព្រះសីហនុរាជ។
លោកបញ្ជាក់ថា៖ «ការផ្តល់អាហារូបករណ៍នោះ គោលដៅតែមួយទេ គឺជួយពង្រឹងគ្រឹះនៃសាសនា ពង្រឹងគ្រឹះនៃអក្សរសាស្ត្រ អក្សរសិល្ប៍របស់ខ្មែរយើង ឱ្យមានភាពរឹងមាំ ឱ្យមានការជ្រោមជ្រែងភាសានៃសាសនាជាតិយើង ដែលជាភាសាគ្រឹះនៃជាតិយើងដែរ»។
យោងតាមរបាយការណ៍របស់ក្រសួងធម្មការ និងសាសនា កម្ពុជាមានវត្ត សរុបចំនួន ៥ ១៣៣ និងព្រះសង្ឃសរុប ៦៨ ៩៦៧ អង្គ គិតត្រឹមដំណាច់ឆ្នាំ ២០២២៕