.jpg)
អ្នកទោសដែលជាប់ពន្ធនាគារនៅខេត្តកំពតកាលពីកន្លងទៅ។ រូបថត ពន្ធនាគារខេត្ត
ភ្នំពេញៈ លោកឧបនាយករដ្ឋមន្ដ្រី ស ខេង រដ្ឋមន្ត្រីក្រសួងមហាផ្ទៃបានណែនាំឱ្យក្រសួងយុត្តិធម៌ និងភាគីពាក់ព័ន្ធ ត្រូវសម្របសម្រួលជាមួយស្ថាប័នតុលាការដើម្បីពន្លឿនការជំនុំជម្រះក្ដីចំពោះបទល្មើសគ្រឿងញៀនឱ្យបានឆាប់រហ័ស និងទទួលបានប្រសិទ្ធភាព។
ការថ្លែងបែបនេះរបស់លោកធ្វើឡើងក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ ២០២២ និងលើកទិសដៅការងារត្រួតពិនិត្យគ្រឿងញៀនឆ្នាំ ២០២៣ របស់អាជ្ញាធរជាតិប្រយុទ្ធប្រឆាំងគ្រឿងញៀននៅថ្ងៃទី ២១ ខែមីនា ឆ្នាំ ២០២៣។
លោក ស ខេង បានថ្លែងថា ក្រសួងយុត្តិធម៌ និងភាគីពាក់ព័ន្ធត្រូវសម្របសម្រួលជាមួយតុលាការដើម្បីពន្លឿនការជំនុំជម្រះក្តី បទល្មើសគ្រឿងញៀនឱ្យបានឆាប់រហ័ស។
លោកបានបញ្ជាក់ថា៖ «សមត្ថកិច្ចពាក់ព័ន្ធពិសេសក្រសួងយុត្តិធម៌ត្រូវសម្របសម្រួលជាមួយស្ថាប័នតុលាការគ្រប់ជាន់ថ្នាក់ ដើម្បីពន្លឿនការជំនុំជម្រះក្តីនៃបទល្មើសគ្រឿងញៀនឱ្យបានឆាប់រហ័ស និងបន្តពន្លាតដែនសមត្ថកិច្ចស្រាវជ្រាវលើបទល្មើសគ្រឿងញៀនណាដែលសង្ស័យថា មានពាក់ព័ន្ធនឹងការសម្អាតប្រាក់ដើម្បីដកហូតបានទាន់ពេលវេលានូវទ្រព្យសម្បត្តិដែលបានមកពីផលនៃការប្រព្រឹត្តបទល្មើស»។
ជាមួយគ្នានេះក៏ត្រូវបង្ហាញពីឆន្ទៈកិច្ចសហប្រតិបត្តិការចូលរួមស៊ើបអង្កេតស្រាវជ្រាវប្រឆាំងការសម្អាតប្រាក់ហិរញ្ញប្បទានភេរវកម្ម និងហិរញ្ញប្បទានគាំទ្រដល់ការរីកសាយភាយអាវុធមហាប្រល័យនៅក្នុងក្របខ័ណ្ឌសកលលោកផងដែរ។
ក្នុងឱកាសនោះ លោក ស ខេង ក៏បានណែនាំដល់អាជ្ញាធរជាតិប្រយុទ្ធប្រឆាំងគ្រឿងញៀនត្រូវសម្របសម្រួលជាមួយក្រសួង-សា្ថប័នជំនាញពាក់ព័ន្ធដើម្បីពន្លឿនការធ្វើវិសោធនកម្មច្បាប់ស្ដីពីការត្រួតពិនិត្យគ្រឿងញៀន និងរៀបចំតាក់តែងគោលនយោបាយឬលិខិតបទដ្ឋានគតិយុត្តផ្សេងទៀត ដើម្បីបម្រើដល់ការអនុវត្តសកម្មភាពប្រយុទ្ធប្រឆាំងគ្រឿងញៀននៅកម្ពុជា។ ជាពិសេសការរៀបចំច្បាប់ថ្មីពាក់ព័ន្ធនឹងការគ្រប់គ្រងត្រួតពិនិត្យ ការប្រើប្រាស់សារធាតុគីមីផ្សំសំដៅដល់ការទប់ស្កាត់ ការបង្វែរយកទៅផលិតគ្រឿងញៀនឱ្យកាន់តែមានប្រសិទ្ធភាព។
លើសពីនេះទៀត លោកបានលើកឡើងថា គ្រប់ក្រសួង-ស្ថាប័ន វិស័យឯកជន វិស័យសាសនា កងកម្លាំងប្រដាប់អាវុធគ្រប់ប្រភេទត្រូវបង្កើនការអប់រំផ្សព្វផ្សាយអំពីផលប៉ះពាល់ និងគ្រោះថ្នាក់កើតចេញពីការប្រើប្រាស់គ្រឿងញៀនដល់គ្រប់ស្រទាប់មហាជនមុខសញ្ញាប្រឈម និងជនងាយរងគ្រោះ។
រដ្ឋមន្ត្រីក្រសួងមហាផ្ទៃបានបន្ថែមថា ជាពិសេសគឺពង្រឹងការអនុវត្តគោលនយោបាយសម្រាប់ព្យាបាល និងស្ដារនីតិសម្បទា អ្នកញៀនគ្រឿងញៀនប្រកបដោយលក្ខណៈបច្ចេកទេស និងវិទ្យាសាស្ត្រ នៅតាមមជ្ឈមណ្ឌលជាតិ មណ្ឌលបណ្តោះអាសន្ន និងតាមសហគមន៍ សំដៅគាំទ្រដល់យុទ្ធសាស្ត្រកាត់បន្ថយតម្រូវការប្រើប្រាស់ និងឈានទៅកាត់ផ្តាច់ទីផ្សារផ្គត់ផ្គង់គ្រឿងញៀនឱ្យខាងតែបាន។
ជុំវិញករណីនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ថ្លែងថា បើពិនិត្យលើបញ្ហាសំណុំរឿងបទល្មើសគ្រឿងញៀនឃើញថា ទាក់ទងនឹងពន្ធនាគារចង្អៀតនៅមិនទាន់អាចដោះស្រាយបាននៅឡើយ។លោកបន្តថាហេតុនេះទោះបីកន្លងមកក្រសួងយុត្តិធម៌មានយុទ្ធនាការពន្លឿននីតិវិធីសំណុំរឿងនៅតាមតុលាការ ដើម្បីកុំឱ្យកកស្ទះយ៉ាងណាក្ដី ប៉ុន្តែលោកមើលឃើញថា ប្រភេទនៃបទល្មើសគ្រឿងញៀនក្នុងពន្ធនាគារ គឺវាច្រើនជាងបទល្មើសផ្សេងៗដែលស្ទើរតែជាងពាក់កណ្ដាលទៅហើយ។
លោកបានសម្តែងក្ដីបារម្ភថា បញ្ហាគ្រឿងញៀន ប្រសិនបើត្រូវអូសបន្លាយពេល នោះភាពកកស្ទះសំណុំរឿងក៏វាច្រើនផងដែរ ហេតុនេះទើបក្រសួងមហាផ្ទៃមើលឃើញបញ្ហា ហើយជំរុញឱ្យក្រសួងយុត្តិធម៌សម្រួលជាមួយតុលាការដើម្បីឆាប់ដោះស្រាយបាន។
លោក អំ សំអាត បានបញ្ជាក់ថា៖ «ខ្ញុំយល់ថា ការស្នើរបស់សម្ដេចក្រឡាហោម ស ខេង ទៅក្រសួងយុត្តិធម៌នេះវាជារឿងមួយ ប៉ុន្តែក្រសួងយុត្តិធម៌កាលពីលើកមុននេះ លោកក៏មានយុទ្ធនាការពន្លឿនសំណុំរឿងកកស្ទះ គឺយើងឃើញថាមានប្រសិទ្ធភាព។ អ៊ីចឹងនៅពេលដែលពន្លឿនសំណុំរឿងគ្រឿងញៀនបើក្រសួងយុត្តិធម៌លោកគឺជាអ្នកសម្របសម្រួល ហើយជំរុញឱ្យមានការពន្លឿននីតិវិធី ក៏អាចនឹងមានប្រសិទ្ធភាពផងដែរ»។
សូមបញ្ជាក់ថា បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀននៅឆ្នាំ ២០២២ គឺមានអ្នកញៀននិងអ្នកប្រើប្រាស់គ្រឿងញៀនដែលគ្រប់គ្រងបានដោយអាជ្ញាធរមានចំនួន ២២ ២១៣នាក់ បើធៀបនឹងឆ្នាំ ២០២១ មានចំនួន ១៦ ២៦៤ នាក់ គឺមានការកើនឡើង ៥ ៩៤៩ នាក់។
របាយការណ៍ដដែលបន្ថែមថា ក្នុងឆ្នាំ ២០២២ អាជ្ញាធរជាតិប្រយុទ្ធប្រឆាំងគ្រឿងញៀនបង្ក្រាបបទល្មើសគ្រឿងញៀនបានចំនួន ៦ ៣៩០ ករណីស្មើនឹង ១០១,៣០ ភាគរយ ធៀបនឹងឆ្នាំ ២០២១ (៦ ៣០៨ ករណី) ឃាត់ខ្លួនជនសង្ស័យ ១៥ ០០២ នាក់ស្មើនឹង ១០៧,៣២ ភាគរយបើធៀបនឹងឆ្នាំ ២០២១ (១៣ ៩៧៩ នាក់)។ដោយឡែកគ្រឿងញៀនសរុបដែលរឹបអូសបានក្នុងឆ្នាំ ២០២២ មានជាង ១៤ តោនស្មើនឹង ៣១៨,១៤ ភាគរយប្រៀបធៀបនឹងឆ្នាំ ២០២១៕
