ភ្នំពេញៈ កាកបាទក្រហមកម្ពុជា បានរៀបចំកិច្ចពិភាក្សាស្តីពី «រួមគ្នាជាមួយកាកបាទក្រហមកម្ពុជា ដើម្បីបរិយាប័ន្នសង្គម» ដើម្បីអបអរខួបទី ១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣ ដែលនឹងប្រព្រឹត្តឡើងនៅពេលខាងមុខនេះ។
លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានថ្លែងនៅក្នុងកិច្ចពិភាក្សានោះ ថា កាកបាទក្រហមកម្ពុជា គឺជាសមាជិកទី ៨៥ របស់ចលនាកាកបាទក្រហម អឌ្ឍចន្ទក្រហម ដូចនេះកាកបាទក្រហមកម្ពុជាមានគោលការណ៍គ្រឹះជាមូលដ្ឋាន។
គោលការណ៍គ្រឹះសំខាន់ទាំង ៧ គឺ ភាពមនុស្សធម៌ ភាពមិនលម្អៀង អព្យាក្រឹតភាព ឯករាជភាព គោលការណ៍ស្ម័គ្រចិត្ត ឯកភាព និងសកលភាព។
លោកស្រីថ្លែងថា៖ «នៅក្នុងការបំពេញការងាររបស់យើង នៅក្នុងគោលការណ៍នេះ យើងអត់មានការរើសអើង បែងចែកឋានៈ វណ្ណៈ ពូជសាសន៍ ឬនិន្នាការនយោបាយនៅក្នុងការជួយបងប្អូនប្រជាពលរដ្ឋនោះទេ»។
នៅក្នុងការបំពេញការងាររបស់កាកបាទក្រហមកម្ពុជា ក៏មានការងារជាក់លាក់មួយចំនួនដែលតម្រូវឱ្យធ្វើការគូសបញ្ជាក់ពីភាពបរិយាប័ន្ននៅក្នុងសង្គមដូចជា គោលនយោបាយគាំពារសង្គម រួមជាមួយនឹងសមធម៌យេនឌ័រ ដោយមិនទុកនរណាម្នាក់ចោល និងការងារសំខាន់ៗមួយចំនួនទៀត។ នេះបើតាមការបញ្ជាក់ពីលោកស្រី ម៉ែន នារីសោភ័គ។
ប្រធានការិយាល័យការពារជំងឺឆ្លង និងមិនឆ្លងនៃកាកបាទក្រហមកម្ពុជា លោក វ៉ា សុភ័ក្ត បានលើកឡើងផងដែរថា កាកបាទក្រហមកម្ពុជាបានជួយជាច្រើនទៅដល់ប្រជាពលរដ្ឋ ជាពិសេសការលើកកម្ពស់ជីវភាពអ្នកទីទ័លក្រជួបការលំបាក ដោយបានផ្តល់ជាផ្ទះ ផ្តល់ជាប្រាក់កម្ចី ជាពិសេសដល់ជនពិការសម្រាប់ប្រកបអាជីវកម្មផងដែរ។
លោក វ៉ា សុភ័ក្ត បានថ្លែងថា៖ «នេះជាការយកចិត្តទុកដាក់របស់កាកបាទក្រហមកម្ពុជា ដោយបន្ថែមពីការជួយទាំងអស់នេះ យើងក៏បានផ្តល់នូវការអប់រំផងដែរ ដូចជាការអប់រំ ផ្សព្វផ្សាយឱ្យមានការយល់ដឹងពីគ្រោះថ្នាក់ដោយសារមីន រួមនឹងការចូលរួមផ្តល់ជាថវិកាដល់អាជ្ញាធរមីនផងដែរ ដើម្បីឈានឆ្ពោះទៅរកកម្ពុជាគ្មានមីននៅឆ្នាំ ២០២៥ ខាងមុខ»។
ក្នុងកិច្ចពិភាក្សានោះដែរ លោក រឿត សុខុន ប្រធានការិយាល័យអភិវឌ្ឍន៍ នៃកាកបាទក្រហមកម្ពុជា បានថ្លែងថា កាកបាទក្រហមកម្ពុជាបានផ្តល់ឱកាសឱ្យយុវជន និងអ្នកស្ម័គ្រចិត្តបានចូលជាសមាជិកក្នុងការបំពេញការងារមនុស្សធម៌នៅក្នុងគ្រឹះស្ថានសិក្សា និងសហគមន៍របស់ពួកគាត់។
លោកបានបន្តថា ការផ្តល់ឱកាសនេះដែរ កាកបាទក្រហមកម្ពុជាក៏បានផ្តោតសំខាន់លើសមត្ថភាពយេនឌ័រ ដែលក្នុងនោះ យុវជនស្ម័គ្រចិត្តដែលជានារីបានចូលរួមចំណែកយ៉ាងសកម្មប្រមាណជាង ៥០% ជាមួយនឹងកាកបាទក្រហមកម្ពុជា។
លោក រឿង សុផុន បានថ្លែងថា៖ «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាប្រធានកាកបាទក្រហមកម្ពុជា និងជាប្រធានក្រុមការងារទ្រទ្រង់សកម្មភាព និងអ្នកស្ម័គ្រចិត្ត បានផ្តល់ឱកាសឱ្យមានសំឡេងយុវជន និងអ្នកស្ម័គ្រចិត្តបានចូលរួមចំណែកក្នុងការកសាងយុទ្ធសាស្ត្រកាកបាទក្រហមកម្ពុជា ២០២១-២០៣០»។
លោកបានបន្តថា៖ «នេះគឺជាយន្តការមួយដ៏សំខាន់ដើម្បីឱ្យកាកបាទក្រហមកម្ពុជាកសាងភាពធន់នៅក្នុងសហគមន៍ប្រកបដោយចីរភាពផងដែរ ហើយកាកបាទក្រហមកម្ពុជាក៏បានបង្កើតជាគោលនយោបាយយុវជន និងអ្នកស្ម័គ្រចិត្ត សេចក្តីណែនាំដើម្បីបង្ហាញឱ្យដឹងពីតួនាទីរបស់ខ្លួនផងដែរ»។
សូមបញ្ជាក់ផងដែរថា កិច្ចពិភាក្សាស្តីពី «រួមគ្នាជាមួយកាកបាទក្រហមកម្ពុជា ដើម្បីបរិយាប័ន្នសង្គម» នេះក៏មានការចូលរួមពីថ្នាក់ដឹកនាំ មន្ត្រីនៃទីស្នាក់ការកណ្តាល ទីប្រឹក្សាយុវជន និងយុវជនកាកបាទក្រហមកម្ពុជា នៃគ្រឹះស្ថានឧត្តមសិក្សាចំនួន ២៤ ក្នុងរាជធានីភ្នំពេញ និងមន្ត្រីប្រចាំការនៃអនុសាខាកាកបាទក្រហមកម្ពុជា ខណ្ឌទាំង ១៤ ក្នុងរាជធានីភ្នំពេញ សរុបប្រមាណ ១០០ នាក់។
ខួបទី ១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភានេះ កាកបាទក្រហមកម្ពុជា បានអំពាវនាវឱ្យមានការចូលរួមបរិច្ចាគថវិកាតាមសទ្ធាជ្រះថ្លាដល់កាកបាទក្រហមកម្ពុជា ដើម្បីសមាគមជាតិមានធនធានបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា ជួយសម្រាលទុក្ខលំបាកពលរដ្ឋរងគ្រោះ និងងាយរងគ្រោះបំផុត តាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម៕