ភ្នំពេញៈ មន្ត្រីជំនាញក្រសួងពាណិជ្ជកម្ម និងក្រសួងសេដ្ឋកិច្ចនិងហិរញ្ញវត្ថុ បានជួបពិភាក្សាគ្នាលើសេចក្ដីព្រាងប្រកាសអន្តរក្រសួងក្រោមច្បាប់ស្ដីពីសុវត្ថិភាពម្ហូបអាហារ ជុំវិញការផាកពិន័យចំពោះបុគ្គលប្រព្រឹត្តល្មើស និងការបែងចែកចំណូលពីការពិន័យទាំងនេះ មុនឈានទៅរកការអនុវត្តច្បាប់ពេញលេញ។
ការជួបពិភាក្សាគ្នានេះបានធ្វើឡើងនៅថ្ងៃទី២២ ខែមីនា ឆ្នាំ២០២៣នេះ ប្រតិភូក្រសួងពាណិជ្ជកម្មដឹកនាំដោយលោក គឹម មាសសុខសីហា ដែលមានតួនាទីជាអនុរដ្ឋលេខាធិការក្រសួងពាណិជ្ជកម្ម និងប្រតិភូក្រសួងសេដ្ឋកិច្ចនិងហិរញ្ញវត្ថុដឹកនាំដោយលោក ជូ គឹមឡេង រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីតំណាង ស្ថាប័នពាក់ព័ន្ធផងដែរ។
ក្រសួងពាណិជ្ជកម្ម បានឱ្យដឹងថា កិច្ចពិភាក្សានេះ គឺបានពិភាក្សាទៅលើសេចក្ដីព្រាងប្រកាសអន្តរក្រសួងចំនួន២ គឺសេចក្ដីព្រាងប្រកាសអន្តរក្រសួងស្ដីពី ការផាកពិន័យចំពោះបុគ្គលប្រព្រឹត្តល្មើសនឹងបទប្បញ្ញត្តិនៃច្បាប់ស្ដីពីសុវត្ថិភាពម្ហូបអាហារ និងប្រកាសអន្តរក្រសួងស្ដីពីការបែងចែកចំណូលពីការពិន័យចំពោះបុគ្គលប្រព្រឹត្តល្មើសនឹងបទប្បញ្ញត្តិនៃច្បាប់ស្ដីពីសុវត្ថិភាពម្ហូបអាហារ ដែលបានដាក់ស្នើឡើងដោយក្រសួងពាណិជ្ជកម្ម។
យ៉ាងណាលោក ផាន អូន អគ្គនាយកនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប.) បានប្រាប់ភ្នំពេញប៉ុស្តិ៍នៅថ្ងៃទី២៣ មីនាថា កិច្ចប្រជុំក្នុងក្រមខណ្ឌតំណាងក្រសួងនេះ មិនទាន់ទទួលការសម្រេចឯកភាពគ្នានៅឡើយទេ។ លោក បានបន្តថា ក្រុមការងារនៃតំណាងក្រសួងនីមួយៗ នៅបន្តពិភាក្សាគ្នាបន្តទៀត ដើម្បីស្វែងរកចំណុចរួម និងធាតុចូលបន្ថែមក្នុងការដាក់បញ្ចូលក្នុងប្រកាសអន្តរក្រសួងទាំង២នេះ។
លោក បានបញ្ជាក់ថា៖«យើងនៅបន្តជជែកគ្នាជាលក្ខណៈទម្រង់ និងទស្សនទានអំពីប្រាក់ជាកម្រៃសេវា និងការពិន័យជាអន្តរការណ៍នៃការពិន័យជាអន្តរការណ៍។ យើងនៅមានការខ្ទាស់គ្នាត្រង់ចំណុចមួយចំនួន»។
ច្បាប់ស្តីពីសុវត្ថិភាពម្ហូបអាហារ ដែលរដ្ឋសភាបានអនុម័ត កាលពីថ្ងៃទី១១ ខែឧសភា នាសម័យប្រជុំរដ្ឋសភាលើកទី៧ នីតិកាលទី៦ ហើយព្រឹទ្ធសភាបានពិនិត្យចប់សព្វគ្រប់លើទម្រង់ និងគតិច្បាប់ទាំងស្រុងកាលពីថ្ងៃទី១៨ ខែឧសភាឆ្នាំ២០២២ នាសម័យប្រជុំជាវិសាមញ្ញ នីតិកាលទី ៤ ត្រូវបានព្រះមហាក្សត្រ ព្រះករុណា ព្រះបាទសម្តេច នរោត្តម សីហមុនី ឡាយព្រះហស្តលេខាដាក់ឱ្យប្រើប្រាស់នៅថ្ងៃទី៨ ខែមិថុនា ឆ្នាំ២០២។
ច្បាប់នេះមាន១១ជំពូក និង ៤៣មាត្រា រៀបចំឡើងដើម្បីឆ្លើយតបតាមតម្រូវការនៃពាណិជ្ជកម្មក្នុងស្រុក និង អន្តរជាតិ ការពារសុខុមាលភាពប្រជាពលរដ្ឋ និងទំនិញមានគុណភាព ព្រមទាំងសុវត្ថិភាពល្អ។ ច្បាប់នេះកំណត់អំពីក្របខ័ណ្ឌនិងយន្តការសម្រាប់គ្រប់គ្រង និងធានាសុវត្ថិភាព គុណភាព អនាម័យ និងភាពស្របច្បាប់ នៃម្ហូបអាហារ ក្នុងគ្រប់ដំណាក់កាល នៃខ្សែចង្វាក់ផលិតកម្មម្ហូបអាហារ ដើម្បីផ្តល់ការការពារសុខភាព និងសុវត្ថិភាពម្ហូបអាហារ សម្រាប់អ្នកប្រើប្រាស់ និងធានាឱ្យមានការធ្វើពាណិជ្ជកម្មម្ហូបអាហារប្រកបដោយភាពស្មោះត្រង់។
ច្បាប់នេះមានវិសាលភាពអនុវត្តចំពោះការគ្រប់គ្រងគុណភាពនិងសុវត្ថិភាពម្ហូបអាហារ ដែលគ្របដណ្តប់គ្រប់ដំណាក់កាលនៃខ្សែចង្វាក់ផលិតកម្មម្ហូបអាហារ និងលើអាជីវកម្មម្ហូបអាហារនៅព្រះរាជាណាចក្រកម្ពុជា សំដៅធានាកម្រិតនៃការការពារអាយុជីវិត និងសុខភាពប្រជាពលរដ្ឋ គ្រប់គ្រង ហានិភ័យម្ហូបអាហារ ដែលចរាចរលើទីផ្សារ និងម្ហូបអាហារនាំចូល និងធានាប្រសិទ្ធភាពនៃការការពារផលប្រយោជន៍អ្នកប្រើប្រាស់។
លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា បាននិយាយថា រាជរដ្ឋាភិបាល បានប្រឹងប្រែងយកចិត្តទុកដាក់ណាស់ ក្នុងការបង្កើតច្បាប់ស្តីពីសុវត្ថិភាពម្ហូបអាហារនេះឡើង សម្រាប់បម្រើផលប្រយោជន៍របស់ប្រជាពលរដ្ឋទូទៅ ជាពិសេសអ្នកបរិភោគឱ្យទទួលបានការផ្គត់ផ្គង់ចំណីអាហារប្រកបដោយសុវត្ថិភាព។ ប៉ុន្តែលោក មើលឃើញថា ការអនុវត្តច្បាប់នេះ នៅមានកម្រិតនៅឡើយ ដោយសារតែច្បាប់ទើបតែប្រកាសឱ្យអនុវត្តកាលពីពាក់កណ្តាលឆ្នាំមុន។
លោក បានបញ្ជាក់ថា៖«ការអនុវត្តច្បាប់នៅមានកម្រិតនេះ ដោយសារតែសហគ្រាសចំណីអាហារមួយចំនួនមិនទាន់បានចុះបញ្ជីនៅឡើយ។ ដោយឡែកការចុះបញ្ជីរបស់ហសគ្រាសចំណីអាហារនានានោះ អាចថាដោយសារតែភាពស្មុគស្មាញនៃនីតីវិធី ក្នុងការចុះបញ្ជី ដែលធ្វើឱ្យពួកគាត់រារែកមិនចង់ចុះបញ្ជី ជាហេតុធ្វើឱ្យការគ្រប់គ្រងនិងការយល់ដឹងពីច្បាប់ស្តីពីសុវត្ថិភាពម្ហូបអាហាររបស់ពួកគាត់នៅមានកម្រិត»៕