.jpg)
វគ្គបណ្ដុះបណ្ដាល គ្រូបង្គោលសុវត្ថិភាពចរាចរណ៍ ដើម្បីទប់ស្កាត់ការបើកបរក្រោមឥទ្ធិពលគ្រឿងស្រវឹងត្រូវបានធ្វើឡើងរយៈពេល ២ ថ្ងៃក្នុងខេត្តព្រះសីហនុ។ រូបថត កាកបាទក្រហមកម្ពុជា
ព្រះសីហនុៈ សាខាកាកបាទក្រហមកម្ពជា ខេត្តព្រះសីហនុ និងអង្គការទ្រទ្រង់សុវត្ថិភាពកម្ពុជា(CAMSAFE) បើកវគ្គបណ្ដុះបណ្ដាល “គ្រូបង្គោលសុវត្ថិភាពចរាចរណ៍ ផ្ដោតទៅលើសុជីវធម៌ផ្ទាល់ខ្លួនដើម្បីទប់ស្កាត់ការបើកបរក្រោមឥទ្ធិពលគ្រឿងស្រវឹងរយៈពេល ២ ថ្ងៃ គឺចាប់ពីថ្ងៃទី ២៣ ដល់ ថ្ងៃទី ២៤ ខែមីនា នៅវិទ្យាល័យចំណេះទូទៅ និងបច្ចេកទេសក្រុងព្រះសីហនុ។
វគ្គបណ្ដុះបណ្ដាលត្រូវបានធ្វើឡើងក្រោមអធិបតីភាព លោក កែវ ឡាយ សមាជិកគណៈកម្មាធិការសាខា និងមានការចូលរួមពីសំណាក់ លោកអនុប្រធានមន្ទីរអប់រំយុវជន និងកីឡាខេត្ត លោកប្រធានការិយាល័យចរាចរណ៍ខេត្ត នាយកវិទ្យាល័យក្រុង យុវជនកាកបាទក្រហម និងលោកគ្រូ អ្នកគ្រូ ដែលជាទីប្រឹក្សាយុវជន សរុបចំនួន ២០ នាក់ស្រី ៦ នាក់។ នេះបើយោងតាមកាកបាទក្រហមកម្ពុជា។
លោក កែវ ឡាយ បានសម្ដែងនូវមោទនភាព និងអំណរគុណចំពោះអង្គការទ្រទ្រង់សុវត្ថិភាពកម្ពុជា ក្រោមជំនួយឧបត្ថម្ភពីអង្គការ UNITAR សម្រាប់បើកវគ្គគ្រូបង្គោលសុវត្ថិភាពចរាចរណ៍នៅពេលនោះ ដើម្បីចូលរួមកាត់បន្ថយគ្រោះថ្នាក់ចរាចរណ៍នៅក្នុងខេត្តព្រះសីហនុ។
លោកបានផ្តាំផ្ញើដល់សិក្ខាកាមចូលរួមទាំងអស់ ឱ្យប្រឹងប្រែងក្រេបជញ្ជក់ចំណេះដឹង រួមទាំងការផ្លាស់ប្តូរបទពិសោធន៍ ជំនាញនិងចំណេះដឹងជាមួយក្រុមគ្រូឧទ្ទេសពីថ្នាក់ជាតិ ហើយក្រោយពីបញ្ចប់វគ្គបណ្តុះបណ្តាលត្រូវប្រើប្រាស់ចំណេះដឹងដែលទទួលបានពីវគ្គនេះយកទៅអនុវត្តបន្តនៅតាមសាលាគោលដៅរៀងៗខ្លួនឱ្យបានល្អប្រសើរ៕
