កំពង់ឆ្នាំងៈ កងទ័ពកម្ពុជា និងកងទ័ពចិននាថ្ងៃទី ២៣ ខែមីនា បានចាប់ផ្តើមធ្វើសមយុទ្ធយោធារួមគ្នា ដោយភាគីចិនបញ្ជាក់ថា សមយុទ្ធនេះអាចពង្រឹងនិងពង្រីកមិត្តភាពប្រពៃណីចិននិងកម្ពុជាឱ្យកាន់តែត្រចះត្រចង់។
លោក ឈិន មិនធាន នាយរងសេនាធិការកងទ័ពជើងគោកតំបន់ខាងត្បូងនៃកងទ័ពរំដោះប្រជាជនចិន ថ្លែងក្នុងពិធីបើក «សមយុទ្ធរួមនាគមាសឆ្នាំ២០២៣» នៅខេត្តកំពង់ឆ្នាំងថា ចិន និងកម្ពុជាជាអ្នកជិតខាងល្អដែលមានមិត្តភាពយូរលង់ជាដៃគូល្អដែលជឿទុកចិត្តគ្នាទៅវិញទៅមក។ កងទ័ពចិន និងកម្ពុជាជាបងប្អូនប្រៀបដូចដៃជើង ជាមិត្តភកិ្តស្គាល់ចិត្តស្គាល់ថ្លើមគ្នា។
លោកថា តាំងពីបង្កើតទំនាក់ទំនងការទូតអស់រយៈពេល ៦៥ ឆ្នាំរៀងមកមិត្តភាពប្រពៃណីចិននិងកម្ពុជាដែលពូនជ្រំដោយមេដឹកនាំជំនាន់មុនកាន់តែយូរកាន់តែរឹងមាំ បានក្លាយទៅជាគំរូនៃទំនាក់ទំនងអន្តរជាតិបែបថ្មី។ ក្នុងយុគសម័យថ្មី ក្រោមការជំរុញដោយមេដឹកនាំប្រទេសទាំង ២ ទំនាក់ទំនងចិននិងកម្ពុជាបានទទួលការអភិវឌ្ឍថ្មី។
លោក ឈិន មិនធាន ថ្លែងថា៖ «សមយុទ្ធលើកនេះ កងទ័ពទាំង ២ មិនត្រឹមតែអាចដកបទពិសោធន៍និងលើកកម្ពស់ជាមួយគា្នលើមុខជំនាញប្រតិបត្តិការការពារសន្តិសុខក្នុងព្រឹត្តិការណ៍ធំៗ និងសកម្មភាពយោធាតែប៉ុណ្ណោះទេ ថែមទាំងត្រូវបង្កើនការស្វែងយល់គ្នាទៅវិញទៅមក លើគោលគំនិត និងវប្បធម៌ ពង្រឹងនិងពង្រីកមិត្តភាពប្រពៃណីចិននិងកម្ពុជាឱ្យកាន់តែត្រចះត្រចង់»។
លោកថ្លែងថា សមយុទ្ធរួមនាគមាស គឺជាគម្រោងគំរូនៃកិច្ចសហប្រតិបត្តិការយោធាចិន និងកម្ពុជា បានរៀបចំដោយជោគជ័យចំនួន ៤ លើករួចមកហើយ។ សមយុទ្ធលើកនេះ ភាគីចិន ចាត់នាវាដឹកជញ្ជូន ០៧១ នៃកងទ័ពជើងទឹកទទួលខុសត្រូវដឹកជញ្ជូនកងកម្លាំងនិងយុទ្ធោបករណ៍ ធ្វើលំហាត់នាវាចរណ៍និងទូរគមនាគមន៍លើផ្ទៃសមុទ្រជាមួយកងទ័ពជើងទឹកកម្ពុជា។
លោកបន្ថែមថា ភាគីចិនបានចាត់ជំនាញទ័ព តួយ៉ាងដូចជាកងប្រតិបត្តិការយោធាពិសេស កងដោះមីន និងកងសុខាភិបាលជាដើម ចូលរួមញ៉ាំងឱ្យសមយុទ្ធកាន់តែមានធាតុសម្បូរបែប វិសាលភាពកាន់តែធំធេងនិងយុទ្ធោបករណ៍កាន់តែទំនើប ហើយថា៖ «សូមអ្នកទាំងអស់គ្នារក្សាថា្នក់ថ្នមឱកាសមួយនេះ បង្កើនការផ្លាស់ប្តូរ រួមចំណែកសម្រាប់ពង្រឹងនិងពង្រីកមូលដ្ឋានគ្រឹះ នៃកិច្ចសហប្រតិបត្តិការ និងការជឿទុកចិត្តគ្នារវាងកងទ័ពចិននិងកម្ពុជា»។
លោក ឈិន មិនធាន ថ្លែងថា សមយុទ្ធនឹងផ្តោតសំខាន់ទៅលើប្រធានបទប្រតិបត្តិការការពារសន្តិសុខក្នុងព្រឹត្តិការណ៍ធំៗ តាមរយៈលំហាត់រួម លំហាត់សហការ និងផ្លាស់ប្ដូរបទពិសោធន៍។ ភាគីទាំង ២ នឹងហ្វឹកហ្វឺនលើវិញ្ញាសាយាមកាមនិងហ៊ុមព័ទ្ធ បង្ការនិងគ្រប់គ្រងជំងឺឆ្លង ដោះមីននិងយុទ្ធភណ្ឌមិនទាន់ផ្ទុះ ការពារឥស្សរជននយោបាយជាដើម។
លោកថ្លែងថា៖ «សូមយើងទាំងអស់គា្ន ពួតដៃប្រកៀកស្មា ខិតខំជំរុញការកសាងសហគមន៍ជោគវាសនារួមចិននិងកម្ពុជានាយុគសម័យថ្មី ដែលមានគុណភាពខ្ពស់ កម្រិតខ្ពស់ និងស្តង់ដាខ្ពស់ រួមចំណែកកាន់តែច្រើនសម្រាប់ការគាំពារសន្តិភាព តំបន់និងជំរុញការអភិវឌ្ឍរួម»។
ជាមួយគ្នានេះ គេហទំព័រក្រសួងព័ត៌មានបានស្រង់សម្តី លោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងទ័ពជើងគោក ដែលបានថ្លែងនៅក្នុងពិធីនេះថា ការចាត់តាំងធ្វើសមយុទ្ធលើកនេះ ពិតជាឆ្លើយតបទៅនឹងគោលបំណង និងសំណូមពរភារកិច្ចចំពោះមុខរបស់កងទ័ពនៃប្រទេសទាំង ២ រួមទាំងតម្រូវការនៃកិច្ចសហប្រតិបត្តិការដើម្បីថែរក្សាសន្តិសុខនៅក្នុងតំបន់។
លោកត្រូវបានស្រង់សម្តីថា៖ «យើងមិនអាចប្រមើលមើលឃើញជាមុនអំពីការកើតឡើងនូវគ្រោះមហន្តរាយ ឬជំងឺឆ្លងរាតត្បាតថ្មីទៀត នៅពេលខាងមុខឡើយ ជាពិសេសក្នុងបរិការណ៍នៃការប្រែប្រួលប្រព័ន្ធអេកូឡូហ្ស៊ី និងការកើនកម្តៅនៃអាកាសធាតុពិភពលោក។ កត្តានេះបានតម្រូវឱ្យកម្ពុជា ក៏ដូចជាប្រទេសក្នុងតំបន់ និងសកលលោក ត្រូវត្រៀមខ្លួនជានិច្ចក្នុងការបង្ការទប់ស្កាត់ និងឆ្លើយតប»។
លោកបន្ថែមថា អនុលោមតាមស្ថានភាពនេះ សមត្ថភាពប្រុងប្រៀបត្រៀមលក្ខណៈរបស់កងកម្លាំងប្រដាប់អាវុធក្នុងការឆ្លើយតបចំពោះស្ថានភាពជាយថាហេតុនានាឱ្យបានទាន់ពេលវេលា និងប្រកបដោយប្រសិទ្ធភាព គឺជាអាទិភាពដ៏សំខាន់មួយនៃផែនការយុទ្ធសាស្ត្ររបស់កម្ពុជា។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ នាថ្ងៃទី ២៣ ខែមីនា ថា ផ្អែកទៅលើកិច្ចសហប្រតិបត្តិការរវាងរដ្ឋនិងរដ្ឋ ឥឡូវនេះប្រទេសទាំង ២ ស្ថិតក្នុងនយោបាយនៃមិត្តភាពដែកថែប និងបានវិវត្តទៅកាន់កិច្ចសហប្រតិបត្តិការត្បូងពេជ្រ។
លោកថា៖ «អ៊ីចឹងដូច្នេះរាល់កិច្ចសហប្រតិបត្តិការផ្សេងៗទៀតរវាងប្រទេសទាំង ២ សុទ្ធតែត្រូវបានផ្ចុងផ្ដើមក្នុងការពង្រឹងកិច្ចសហប្រតិបត្តិការដើម្បីស្វែងយល់គ្នា ទាំងវប្បធម៌ ទាំងប្រពៃណីអីជាដើម ដូចដែលបានលើកឡើងហ្នឹងគឺពិតជាត្រឹមត្រូវហើយ ពីព្រោះផ្អែកទៅលើនយោបាយកិច្ចសហប្រតិបត្តិការត្បូងពេជ្ររបស់ប្រទេសទាំង ២ ហ្នឹង»៕