ភ្នំពេញៈ លោក ស ខេង ឧបនាយករដ្ឋមន្ដ្រី រដ្ឋមន្ដ្រី​ក្រសួងមហាផ្ទៃ បានធ្វើ​ការណែនាំ​ដល់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន ឱ្យ​សហការ​ជាមួយ​រដ្ឋបាល​រាជធានី-ខេត្ត ដើម្បី​ស្រង់​ស្ថិតិ​ជនរងគ្រោះ​ដោយសារ​គ្រឿងញៀន នៅតាម​មូលដ្ឋាន​នីមួយៗ ដើម្បី​ដឹង​តួលេខ​ជាក់លាក់។​

​លោក​បាន​ថ្លែង​បែបនេះ នាឱកាស​អញ្ជើញ​ជា​អធិបតី​ក្នុង​ពិធី​បូកសរុប​លទ្ធផល​ការងារ​អនុវត្ត​ផែនការ​ប្រយុទ្ធប្រឆាំង​គ្រឿងញៀន​ខុសច្បាប់ លើកទី ៧ និង​ផ្សព្វផ្សាយ​ផែនការ​យុទ្ធនាការ ប្រយុទ្ធប្រឆាំង​គ្រឿងញៀន​ខុសច្បាប់ លើកទី ៨ នា​ថ្ងៃទី ២២ ខែមីនា ឆ្នាំ ២០២៣​។ នេះ​បើ​យោងតាម​ផេក​ហ្វេសប៊ុក​ក្រសួង​មហាផ្ទៃ​ចុះផ្សាយ​នៅ​ថ្ងៃទី ២៣ មីនា។​

​លោក​ថ្លែងបន្តថា ការ​ស្រង់​ស្ថិតិ​ជនរងគ្រោះ​ដោយសារ​គ្រឿងញៀន គឺធ្វើឡើង​តាមរយៈ ភូមិ-ឃុំ-ស្រុក រួចហើយ​ត្រូវ​បញ្ជូន​មក​ខេត្ត ដើម្បី​បូកសរុប​បញ្ចូលគ្នា។​

​លោក​ឧបនាយករដ្ឋមន្ត្រី មានប្រសាសន៍ថា​៖ «​ខ្ញុំ សូម​ស្នើ​អាជ្ញាធរ​គ្រឿងញៀន សហការ​ជាមួយនឹង​រដ្ឋបាល​រាជធានី-ខេត្ត​ពាក់ព័ន្ធ ដើម្បី​ធ្វើការ​ស្រង់​ស្ថិតិ​ជនរងគ្រោះ​ដោយសារ​គ្រឿងញៀន ឱ្យមាន​តួលេខ​។ ឥឡូវ​យើង​គ្រាន់តែ​ស្មានថា ប្រហែល​ប៉ុណ្ណេះ ប៉ុណ្ណោះ ដោយ​យើង​អត់​បាន​សិក្សា​។ យើង​សិក្សា​ធ្វើពី​ភូមិ​មក ឱ្យ​មេភូមិ​រាយការណ៍​មក មាន​ប៉ុន្មាន​នាក់​ប្រើប្រាស់​គ្រឿងញៀន អ៊ីចឹង​យើង​ប្រមូល​ពី ភូមិ-ឃុំ-ស្រុក មកឱ្យ​ខេត្ត ហើយ​បូក​បញ្ចូល​គ្នា យើង​ឃើញ​ហើយ ទោះ​វា​មិនត្រូវ ១០០% ក៏ដោយ តែ​គ្រាន់បើ​ជាង​អង្គុយ​ស្មាន»។​

​បន្ថែម​ពីនេះ​លោក ស ខេង បាន​លើកឡើងថា រាជរដ្ឋាភិបាល បាន​តាំងចិត្ត​ប្ដេជ្ញា​យ៉ាង​មោះមុត ដើម្បី​ប្រយុទ្ធ​ប្រឆាំង​គ្រឿងញៀន​នេះ ដូច្នេះ​សូម​អំពាវនាវ​ដល់​ប្រជាពលរដ្ឋ ក្រុមហ៊ុន និង​វិស័យ​ឯកជន ចូលរួម​ប្រយុទ្ធ​ប្រឆាំង​គ្រឿងញៀន ដើម្បី​ចូលរួម​ការពារ​សុវត្ថិភាព​សង្គម​របស់​កម្ពុជា៕