ភ្នំពេញៈ លោក​នាយក​រដ្ឋមន្រ្តី ហ៊ុន សែន បាន​អបអរសាទរ​ពូជ​ស្រូវ​បង្កាត់​ថ្មី ២ ប្រភេទ​គឺ​ពូជ​ចំប៉ី ស និង​ពូជ​កង្រី​របស់​ក្រសួង​កសិកម្ម ដែលអាច​ផ្តល់​ទិន្នផល​ខ្ពស់​ដោយ​ប្រើ​រយៈពេល​ដាំដុះ​ខ្លី ហើយបាន​ប្រកាស​ផ្តល់​ម៉ាស៊ីន​ស្ទូង​ស្រូវ​ចំនួន​ ១០០ គ្រឿង​ដល់​ក្រសួង​កសិកម្ម ដើម្បី​ចែកជូន​សហគមន៍​កសិកម្ម​ផងដែរ។

ការសាទរ​នេះ​ត្រូវបាន​ធ្វើ​ឡើង​ក្នុង​ពិធី​សន្និបាត​បូក​សរុប​ការងារ​កសិកម្ម រុក្ខាប្រមាញ់ និង​នេសាទ​ឆ្នាំ២០២២ និង​លើក​ទិសដៅ​ឆ្នាំ២០២៣ នៅរសៀល​ថ្ងៃ​ទី២៤​ ខែមីនា​នេះ។

លោក​នាយក​រដ្ឋមន្រ្តី​បានថ្លែង​ថា៖«ខ្ញុំ​សូមកោតសរសើរ​ចំពោះ របប​គំហើញ​ពូជ​ស្រូវ​ថ្មី​គឺ ពូជ​ចំប៉ី ស និង​ពូជ​កង្រី... ខ្ញុំ​ពិតជា​មាន​ការសាទរ​ជាមួយនឹង​ការស្រាវជ្រាវ​បច្ចេកទេស​ជាបន្តបន្ទាប់ ដែល​ផ្សារភ្ជាប់​ជាមួយនឹង​ការស្រាវជ្រាវ និង​ការដាំដុះ»។

លោកបាន​បន្ត​ថា ទាក់ទងនឹង​ពូជ​ថ្មី​ដែល​មាន​រយៈពេល​ខ្លី​នេះ វាជា​សមិទ្ធផល​ថ្មី​មួយ ដែល​កម្ពុជា​បានឈាន​មុខមួយ​នៅក្នុង​ការបង្កាត់​ពូជ​ខ្លួន​ឯង ហើយ​ជាប់​ចំណាត់​ថ្នាក់​ទៀតផង។ លោក​នាយក​រដ្ឋមន្រ្តី​បាន​បញ្ជាក់​ថា បើទោះបី​ស្ថានភាព​ពិភពលោក​ប្រែប្រួល​យ៉ាងណា​ក៏ដោយ ក៏​កម្ពុជា​មិនខ្វះ​ស្បៀង​អាហារ​ដូច​កាល​លើក​មុន​នោះដែរ។

ក្នុង​ឱកាស​នោះ លោក​នាយក​រដ្ឋមន្រ្តី​ក៏បាន​ប្រកាស​ផ្តល់​ម៉ាស៊ីន​ស្ទូង​ស្រូវ​ចំនួន ១០០ គ្រឿង​ដល់​ក្រសួង​កសិកម្ម ដើម្បី​ចែកជូន​សហគមន៍​កសិកម្ម ដែល​ផលិត​ស្រូវ​ពូជ។

ក្នុងឱកាស​នោះ លោក ឌិត ទីណា រដ្ឋមន្ត្រី ក្រសួង​កសិកម្ម រុក្ខាប្រមាញ់ និង​នេសាទ បានមាន​ប្រសាសន៍​ថា ក្រសួង​បាន​បញ្ចេញ​ពូជ​ស្រូវ​ថ្មី ២ ប្រភេទ គឺ​ចំប៉ី ស ៧០ និង​កង្រី ដែល​ទើប​នឹង​បង្កាត់​បាន​នោះ។ លោកបាន​បន្តថា ពូជ​ចំប៉ី ស ៧០ គឺ​ជាប្រភេទ​ស្រូវ​ស្រាល ដែលមាន​អាយុកាល​ពី ៩៣ ដល់ ៩៧ ថ្ងៃ ហើយវា​មាន​គ្រាប់​អង្ករ​ថ្លា និង​ក្លិន​ក្រអូប​ឆ្ងុយ និង​ផ្តល់​ទិន្នផល​ជាមធ្យម ពី ៣,២ ដល់ ៤,៩ តោន​ក្នុង ១ ហិកតា។

ដោយឡែក​ពូជ​ស្រូវ​ថ្មី កង្រី កាន់តែ​ស្រាល​ជាង​នោះ​ទៅ​ទៀត ដែលមាន​អាយុកាល​ខ្លី​បំផុត​គឺ​ត្រឹម ៧៨ ដល់ ៨៤ ថ្ងៃ​ប៉ុណ្ណោះ ហើយជា​ស្រូវ​មិន​ប្រកាន់​រដូវ ដែល​ផ្តល់​ទិន្នផល​មធ្យម ៤,៣ ដល់ ៧,១ តោន​ក្នុង ១ ហិកតា។

លោក​រដ្ឋមន្រ្តី​បានបញ្ជាក់​ថា ពូជ​ចំប៉ី ស ៧០ គឺ​ជាស្នាដៃ​បង្កាត់​របស់លោក អ៊ុក មករា អតីត​នាយក​វិទ្យាស្ថាន​ស្រាវជ្រាវ និង​អភិវឌ្ឍន៍​កសិកម្ម​កម្ពុជា (CARDI) ហើយ​ពូជ​កង្រី​វិញ​គឺ​ជាស្នាដៃ​របស់​លោក ឃុន លាងហាក់ ដែលធ្វើ​ការក្នុង​អង្គការ​អភិវឌ្ឍន៍​កសិកម្ម។ លោក​នាយក​រដ្ឋមន្រ្តី​ក៏បាន​បំពាក់​មេដៃ​ជូន​លោក​ទាំងពីរ​ផងដែរ៕