.jpg)
បន្ទាយមានជ័យៈ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា កម្ពុជាបានខិតខំបញ្ចប់សង្គ្រាមបានដោយខ្លួនឯង ហើយបានអំពាវនាវឱ្យមានការរៀបចំផែនការសន្តិសុខ សណ្តាប់ធ្នាប់ និងវិធានសុខាភិបាលនៅតាមវត្តអារ៉ាមក្នុងសង្ក្រាន្តឆ្នាំថ្មី។
ការលើកឡើង និងអំពាវនាវនេះត្រូវបានធ្វើឡើងក្នុងឱកាសដែលលោកធ្វើអធិបតីក្នុងពិធីសាសនាក្នុងស្រុកថ្មពួក ខេត្តបន្ទាយមានជ័យនាថ្ងៃទី២៣ ខែមីនា ដែលមានពលរដ្ឋចូលរួមរាប់ពាន់នាក់។ នេះបើយោងតាមអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន (NACD)។
លោកបានអំពាវនាវ និងណែនាំឱ្យរួមគ្នាការពារដាច់ខាតសុខសន្តិភាព ស្ថិរភាពនយោបាយ សណ្តាប់ធ្នាប់សង្គម បន្តរួមគ្នាអភិវឌ្ឍ និងធ្វើសុខដុមនីយ៍កម្មគ្រប់ជំនឿ សាសនា ដើម្បីសុខសន្តិភាព និងការអភិវឌ្ឍមូលដ្ឋាន និងបន្តអនុវត្តគោលនយោបាយអភិវឌ្ឍឃុំ សង្កាត់ឆ្នាំ២០២២-២០២៧។
ក្នុងឱកាសនោះលោកក៏បានអំពាវនាវដល់អាជ្ញាធរដែនដី ប្រជាពលរដ្ឋគ្រប់រូបវិស័យពាក់ព័ន្ធទាំងអស់ឱ្យសហការគ្នារៀបចំផែនការសន្តិសុខ សណ្តាប់ធ្នាប់ វិធានសុខាភិបាលនៅតាមវត្តអារ៉ាម និងគោលដៅទេសចរណ៍ ដើម្បីត្រៀមទទួលប្រជាពលរដ្ឋ និងអ្នកទេសចរណ៍មកពីខេត្តនានាទៅកម្សាន្តក្នុងសង្ក្រាន្តឆ្នាំថ្មីខេត្តបន្ទាយមានជ័យ ដែលនឹងចូលមកដល់នៅថ្ងៃទី១៤ ដល់១៦ ខែមេសា ឆ្នាំ២០២៣។
ក្រៅពីនោះលោកឧបនាយករដ្ឋមន្ត្រីក៏បានស្នើព្រះសង្ឃគ្រប់ព្រះអង្គបន្តបញ្ជ្រាបការយល់ដឹងពីបញ្ហាគ្រឿងញៀនទាំងក្នុងទីវត្តអារាម និងការសម្តែងធម៌ទេសនាតាមពិធីបុណ្យសាសនានានា បន្តចូលរួមអនុវត្តគោលនយោបាយភូមិ ឃុំ មានសុវត្ថិភាព និងផែនការយុទ្ធនាការប្រយុទ្ធប្រឆាំងគ្រឿងញៀន របស់រាជរដ្ឋាភិបាលកម្ពុជាផងដែរ៕
