.jpg)
លោក ស ខេង រដ្ឋមន្ត្រីក្រសួងមហាផ្ទៃគោរពប្រជាពលរដ្ឋដែលចូលរួមក្នុងពិធីបញ្ចុះខណ្ឌសីមាព្រះវិហារ និងសម្ពោធសមិទ្ធផលនានា ក្នុងវត្តទឹកជុំមានជ័យ (វត្តកោះចារ) ស្រុកមោងឫស្សី ខេត្តបាត់ដំបង។ រូបថត FB
ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃ បានណែនាំជាថ្មីទៀតដល់សមត្ថកិច្ចគ្រប់លំដាប់ថ្នាក់ ត្រូវអនុវត្តគោលនយោបាយ ភូមិ ឃុំ-សង្កាត់មានសុវត្ថិភាព ឱ្យបានម៉ឺងម៉ាត់ដើម្បីធានា នូវសុវត្ថិភាពដល់ប្រជាពលរដ្ឋ។
លោក ស ខេង ថ្លែងថា អាជ្ញាធរ និងប្រជាពលរដ្ឋទាំងអស់ ត្រូវចូលរួមបង្ការ ទប់ស្កាត់ និងប្រឆាំងបទល្មើសនានានៅមូលដ្ឋានឱ្យកាន់តែមានប្រសិទ្ធភាពថែមទៀត។ យោងតាមការផ្សាយក្នុងផេចផ្លូវការរបស់លោកស ខេង ដែលបានស្រង់សម្ដីពីក្នុងពិធីបញ្ចុះខណ្ឌសីមាព្រះវិហារ និងសម្ពោធសមិទ្ធផលនានា ក្នុងវត្តទឹកជុំមានជ័យ (វត្តកោះចារ) ស្ថិតនៅស្រុកមោងឫស្សី ខេត្តបាត់ដំបង កាលពីចុងសប្ដាហ៍កន្លងទៅ។
លោក ស ខេង ថ្លែងថា អាជ្ញាធរ ជំរុញឱ្យមានការចូលរួមពីប្រជាពលរដ្ឋ ដើម្បីមានវិធានការគ្រប់ជ្រុងជ្រោយក្នុងការបង្ការ ទប់ស្កាត់ និងបង្ក្រាបបទល្មើសនានានៅមូលដ្ឋាន ដូចជាសកម្មភាពជួញដូរ ចែកចាយ ប្រើប្រាស់គ្រឿងញៀនខុសច្បាប់ បទល្មើសលួច ឆក់ ប្លន់ ល្បែងស៊ីសងខុសច្បាប់ អំពើហិង្សាក្នុងគ្រួសារ ក្រុមក្មេងទំនើង និងបទល្មើសផ្សេងទៀត។
ផេកដដែលនេះបានឱ្យដឹងថា លោក ស ខេង បានស្នើអាជ្ញាធរ ត្រូវបន្តខិតខំពង្រឹងកម្លាំងប្រជាការពារឱ្យមានចំនួនសមស្របតាមភូមិសាស្ត្រ និងប្រជាសាស្ត្រនៃមូលដ្ឋាននីមួយៗ ដោយត្រូវបំផុសលើកទឹកចិត្ត ប្រជាពលរដ្ឋឱ្យចូលរួមក្នុងចលនាប្រជាការពារ និងបំផុសចលនាឱ្យមានការចូលរួម ជួយឧបត្ថម្ភគាំទ្រទាំងខាងមធ្យោបាយ សម្ភារ ថវិកា និងការគាំទ្រខាងស្មារតីដល់ ប្រជាការពារនៅគ្រប់មូលដ្ឋានឱ្យមាននិរន្តរភាព។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បានថ្លែងថា យុវជនកម្ពុជាមួយចំនួនកំពុងទទួលរងឥទ្ធិពលនៃគ្រឿងស្រវឹងនិងគ្រឿងញៀន ដែលជាគ្រឿងបំផ្លាញអនាគតរបស់ពួកគេ បើសិនមិនមានការទប់ស្កាត់បានទាន់ពេលវេលាទេនោះ។
លោក ថ្លែងថា៖ «ដើម្បីបង្ក្រាបបទល្មើសបាន ទាមទារឱ្យពង្រឹងនូវការអនុវត្តច្បាប់របស់សមត្ថកិច្ច ជាពិសេសការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព ឱ្យកាន់តែល្អ និងមានប្រសិទ្ធភាពថែមទៀត និងត្រូវបង្កើនកិច្ចសហការល្អជាមួយភាគីពាក់ព័ន្ធ»។
យោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន កាលពីពេលថ្មីៗនេះ បានបង្ហាញថា ក្នុងឆ្នាំ២០២២ កងកម្លាំងអនុវត្តច្បាប់បានបង្ក្រាបបទល្មើសគ្រឿងញៀនបានចំនួន ៦ ៣៩០ ករណី ឃាត់ខ្លួនមនុស្ ស១៥ ០០២ នាក់ និងចាប់យកសារធាតុញៀនគ្រប់ប្រភេទទម្ងន់ ១៤ ៩១៩,៤៧ គីឡូក្រាម៕
