.jpg)
លោក ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក្នុងកិច្ចប្រជុំនៅថ្ងៃទី២៧មីនា។ រូបថត កបប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ និងទីភ្នាក់ងារសហប្រតិបត្តិការអាល្លឺម៉ង់ (GIZ) គ្រោងរៀបចំសន្នីសីទអ្នកប្រើប្រាស់ថ្នាក់ជាតិ នៅដើមខែមេសាខាងមុខ ក្រោមប្រធានបទ «ពង្រឹងសិទិ្ធអំណាចអ្នកប្រើប្រាស់ ដើម្បីជំរុញការអនុវត្តដោយសុចរិតលើទីផ្សារ»។
សេចក្ដីប្រកាសព័ត៌មានរបស់អ្នករៀបចំបានបង្ហាញថា សន្និសីទអ្នកប្រើប្រាស់ថ្នាក់ជាតិនេះ នឹងត្រូវប្រព្រឹត្តឡើងជាទម្រង់ចូលរួមដោយផ្ទាល់ និងតាមប្រព័ន្ធអនឡាញ នៅថ្ងៃទី៤ ខែមេសា ឆ្នាំ២០២៣ ក្នុងគោលបំណងដើម្បីទទួលស្គាល់ និងលើកកម្ពស់ការយល់ដឹងអំពីសិទ្ធិរបស់អ្នកប្រើប្រាស់នៅកម្ពុជា ទាក់ទាញការយកចិត្តទុកដាក់ចំពោះបញ្ហាដែលកំពុងកើតមានសម្រាប់ការការពារអ្នកប្រើប្រាស់នៅក្នុងសេដ្ឋកិច្ចដែលកំពុងវិវឌ្ឍន៍ ទាំងការអនុវត្ត និងគោលនយោបាយ។
សន្និសីទនេះក៏ធ្វើឡើងដើម្បីផ្តល់ឱកាសក្នុងការចែករំលែកបទពិសោធន៍ និងទស្សនៈផ្សេងគ្នាពីរដ្ឋាភិបាល វិស័យឯកជន បណ្ឌិត្យសភា និងអង្គការដទៃទៀត ជាពិសេសលើការបង្កើតសមាគមអ្នកប្រើប្រាស់។ សន្និសីទក៏ធ្វើឡើងក្នុងបំណងកសាងភាពជាដៃគូរវាងស្ថាប័នសាធារណៈ និងវិស័យឯកជន ដើម្បីធានាការអនុវត្តប្រកបដោយប្រសិទ្ធភាព នៃកម្មវិធីជាតិការពារអ្នកប្រើប្រាស់ (NCPP
លោក ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឱ្យដឹងថា អ្នកប្រើប្រាស់នៅគ្រប់ប្រទេសគួរតែមានសុវត្ថិភាពពីការអនុវត្តអាជីវកម្មដែលគ្មានសីលធម៌ ឬអយុត្តិធម៌។ ទោះបីជាមានក្របខ័ណ្ឌច្បាប់ និងយន្តការសម្រាប់ដោះស្រាយពាក្យបណ្តឹងក៏ដោយ តែការប្រកបអាជីវកម្មនានាត្រូវធ្វើដោយការទទួលខុសត្រូវ។
លោកបញ្ជាក់ថា៖«សន្និសីទអ្នកប្រើប្រាស់ថ្នាក់ជាតិជាលើកដំបូងនេះ ដើម្បីទទួលស្គាល់ និងលើកកម្ពស់ការយល់ដឹងអំពីសិទ្ធិអ្នកប្រើប្រាស់នៅកម្ពុជា និងចូលរួមជាមួយពិភពលោក ក្នុងការប្រារព្ធទិវាសិទ្ធិអ្នកប្រើប្រាស់ពិភពលោកផងដែរ»។
លោក ផាន អូន បន្ថែមថា៖ «ព្រឹត្តិការណ៍នេះទាក់ទាញការយកចិត្តទុកដាក់ចំពោះបញ្ហាដែលកំពុងកើតមានសម្រាប់ការការពារអ្នកប្រើប្រាស់នៅក្នុងសេដ្ឋកិច្ចដែលកំពុងវិវឌ្ឍន៍ ទាំងការអនុវត្ត និងគោលនយោបាយ ហើយវាផ្តល់ឱកាសមួយ ដើម្បីស្តាប់ទស្សនៈផ្សេងគ្នាពីរដ្ឋាភិបាល វិស័យឯកជន និងអង្គការផ្សេងៗទៀត។ ដូចនេះ វាគឺជាការរួមចំណែកយ៉ាងសំខាន់ដល់ការចូលរួមពីភាគីពាក់ព័ន្ធជាច្រើនសម្រាប់ការអនុវត្តកម្មវិធីជាតិគាំពារអ្នកប្រើប្រាស់»។
លោកលើកឡើងថា សន្និសីទអ្នកប្រើប្រាស់ថ្នាក់ជាតិឆ្នាំ២០២៣នេះ គ្រោងនឹងមានអ្នកចូលរួមចំនួន ១៦៥នាក់ មកពីបណ្ដាមន្ត្រីរដ្ឋាភិបាល ក្រសួង និងស្ថាប័នពាក់ព័ន្ធ មន្ត្រី ក.ប.ប តំណាងសមាគមអាជីវកម្ម និងម្ចាស់អាជីវកម្ម ទីភ្នាក់ងារសហប្រតិបត្តិការអាល្លឺម៉ង់ (GIZ)អ្នកដឹកនាំ និងអ្នកតំណាងដៃគូអភិវឌ្ឍន៍ដែលពាក់ព័ន្ធ មន្ត្រីអង្គការមិនមែនរដ្ឋាភិបាល ថ្នាក់ដឹកនាំសាកលវិទ្យាល័យ និងរួមទាំងអ្នកប្រើប្រាស់ផងដែរ។ សន្និសីទនេះ ក៏អនុញ្ញាតឱ្យសាធារណជនអាចចូលរួមតាមអ៊ីនធឺណិតតាមរយៈប្រព័ន្ធ ZOOM បានផងដែរ។
លោក ផាន អូន បន្ថែមថា សន្និសីទនេះ នឹងមានការរៀបចំបែងចែកជា២ផ្នែកគឺផ្នែកទី១ កម្មវិធីពេលព្រឹក ជាវេទិកាបង្ហាញពីទិដ្ឋភាពទូទៅនៃការអនុវត្តកិច្ចការពារអ្នកប្រើប្រាស់ និងការពិភាក្សាលើបញ្ហាចម្បងៗ នាពេលបច្ចុប្បន្ន រួមជាមួយនឹងសកម្មភាពដែលអាចធ្វើទៅបាននាពេលអនាគត ។ ផ្នែកទី២ កម្មវិធីពេលរសៀល ជាសិក្ខាសាលា ពិភាក្សាលើ «ការលើកតម្កើងសិទ្ធិអ្នកប្រើប្រាស់»។
សូមបញ្ជាក់ថា នៅក្នុងសមាគមអាស៊ាន គណៈកម្មាធិការអាស៊ានស្តីពីការការពារអ្នកប្រើប្រាស់ (ACCP) បានកំណត់ផែនការសកម្មភាពយុទ្ធសាស្ត្រអាស៊ានសម្រាប់ការការពារអ្នកប្រើប្រាស់ឆ្នាំ២០១៦-២០២៥ (ASAPCP) ដើម្បីគាំទ្រដល់រដ្ឋសមាជិកអាស៊ាន (AMS) ក្នុងការបង្កើតក្របខ័ណ្ឌនីតិប្បញ្ញត្តិ។ ស្របតាមគំនិតផ្តួចផ្តើមរបស់ ACCPកម្ពុជាបានអនុម័តច្បាប់ស្តីពីការការពារអ្នកប្រើប្រាស់នៅចុងឆ្នាំ២០១៩៕
