បន្ទាយមានជ័យៈ នគរបាលប្រឆាំងការជួញដូរមនុស្ស និងការពារអនីតិជនខេត្តបន្ទាយមានជ័យនៅថ្ងៃទី ២៩ មីនា កំពុងសាកសួរបុរសម្នាក់ ពាក់ព័ន្ធនឹងការគំរាមចែកចាយរូបភាពអាសអាភាសរបស់ក្មេងស្រីអាយុ ១៤ ឆ្នាំម្នាក់ ប្រព្រឹត្តកាលពីដើមខែមីនា ឆ្នាំ ២០២៣។
លោកស្រី រស់ សុជាតិ ស្នងការរងទទួលផែននគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបន្ទាយមានជ័យ បានឱ្យដឹងនៅថ្ងៃទី ២៩ មីនាថា បុរសសង្ស័យម្នាក់កំពុងត្រូវបានសមត្ថកិច្ចជំនាញរបស់លោកស្រី សាកសួរពាក់ព័ន្ធនឹងការគំរាមចែកចាយរូបភាពអាសអាភាស របស់ក្មេងស្រីម្នាក់អាយុ១៤ឆ្នាំ។ ប៉ុន្តែលោកស្រីមិនអាចប្រាប់ពីអត្តសញ្ញាណរបស់ជនសង្ស័យបានទេ ព្រោះស្ថិតនៅក្នុងនីតិវិធីកំពុងស៊ើបសួរនៅឡើយ។
លោកស្រីប្រាប់ថា៖ «រឿងនេះស្ថិតក្នុងនីតិវិធីស៊ើបអង្កេត ដូច្នេះខ្ញុំមិនអាចផ្តល់ឈ្មោះរបស់ជនសង្ស័យបានទេ។ម៉្យាងរឿងនេះ ទាក់ទងនឹងក្មេងស្រីជាអនីតិជនផង»។
ចំណែកលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ បានប្រាប់ភ្នំពេញប៉ុស្តិ៍នៅថ្ងៃទី២៩មីនាថា សមត្ថកិច្ចជំនាញព្រហ្មទណ្ឌរបស់លោក បានឃាត់ខ្លួនបុរសម្នាក់កាលពីយប់ថ្ងៃទី២៨មីនា នៅក្នុងរាជធានីភ្នំពេញ ទីដែលជនសង្ស័យកំពុងរស់នៅ។
ប៉ុន្តែទោះយ៉ាងណា លោកមិនបានប្រាប់ពីអត្តសញ្ញាណរបស់បុរសសង្ស័យនោះទេ ហើយលោកថា បានប្រគល់ជនសង្ស័យឱ្យទៅនគរបាលខេត្តបន្ទាយមានជ័យហើយនៅថ្ងៃទី២៩មីនា ដោយសារតែក្មេងស្រីរងគ្រោះរស់នៅទីនោះ។
លោកប្រាប់យ៉ាងខ្លីថា៖«កម្លាំងជំនាញព្រហ្មទណ្ឌរបស់យើង បានឃាត់ខ្លួនបុរសនោះ ហើយយើងប្រគល់គាត់ទៅឱ្យនគរបាលខេត្តបន្ទាយមានជ័យវិញ ព្រោះជាខេត្តសាមីដែលជនរងគ្រោះរស់នៅ»។
ពាក់ព័ន្ធករណីនេះដែរបើតាមកញ្ញា សោម វឌ្ឍនា មន្រ្តីនៃអង្គភាពការពារកុមារ Child ProtectionUnit(CPU)
បានឱ្យដឹងនៅថ្ងៃទី២៩មីនាថា ករណីនេះក្មេងស្រីរងគ្រោះមានអាយុ១៤ឆ្នាំ រស់នៅខេត្តបន្ទាយមានជ័យ រីឯបុរសសង្ស័យរស់នៅក្នុងរាជធានីភ្នំពេញ។ ទោះយ៉ាងណា កញ្ញាសោម វឌ្ឍនា មិនបានបញ្ជាក់ពីអត្តសញ្ញាណក្មេងស្រីរងគ្រោះ និងជនសង្ស័យដល់ភ្នំពេញប៉ុស្តិ៍ឡើយ។
បើយោងតាមផេកហ្វេប៊ុករបស់អង្គភាពការពារកុមារ(CPU)បានសរសេរថា កាលពីវេលាម៉ោងប្រហែល៨និង៣០នាទីយប់ ថ្ងៃទី២៨មីនា នគរបាលនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ សហការជាមួយអង្គភាពការពារកុមារ(CPU) បានឃាត់ខ្លួនបុរសអាយុ៣០ឆ្នាំម្នាក់ នៅក្នុងរាជធានីភ្នំពេញ ពាក់ព័ន្ធករណីប៉ុនប៉ងគំរាមបង្ហោះរូបភាពអាសអាភាសរបស់ក្មេងស្រីអាយុ១៤ឆ្នាំ រស់នៅខេត្តបន្ទាយមានជ័យ។
បទល្មើសខាងលើនេះ បានកើតឡើងនៅខេត្តបន្ទាយមានជ័យ កាលពីដើមខែមីនា ឆ្នាំ២០២៣។
នៅក្នុងផេកហ្វេប៊ុកដដែលនេះ បានដកស្រង់សម្តីរបស់លោក James McCabe ប្រធានអង្គភាពការពារកុមារថា៖«ខ្ញុំចង់អបអរសាទរ ដល់ភ្នាក់ងារទាំងអស់ ដែលពាក់ព័ន្ធនឹងការចាប់ខ្លួន។ នេះជាការបង្ហាញនិងព្រមានយ៉ាងច្បាស់ ដល់ជនដែលបញ្ជូនរូបភាពអាសអាភាស ប៉ុនប៉ងគំរាមកំហែង និងបង្កាច់បង្ខូចកុមារ។ អ្នកនឹងត្រូវបានរកឃើញ ហើយអ្នកនឹងត្រូវចាប់ខ្លួន។ កិច្ចសហប្រតិបត្តិការដ៏ល្អនៅទូទាំងស្ថាប័ន និងខេត្តមួយចំនួនបានឈានដល់ការចាប់ខ្លួននេះ»៕