ព្រះវិហារៈ មេបញ្ជាការ​រង​យោធា​ខេត្ត​បារៀវង់តាវ យោធភូមិភាគ​ទី៧ កងទ័ព​ប្រជាជន​វៀតណាម លោក ផាម ហ្វាំងតឹង និងថ្នាក់​ដឹកនាំ​អង្គភាព​កងពល​ធំ​អន្តរាគមន៍​លេខ៣​នៃ​កងទ័ពជើងគោក​កម្ពុជា​បានធ្វើ​ការប្តេជ្ញា​ចិត្ត​រួមគ្នា​ក្នុង​ការរឹត​ចំណង​មិត្តភាព សាមគ្គីភាព និងកិច្ចសហ​ប្រតិបត្តិការ​ល្អ​រវាង​រដ្ឋាភិបាល ប្រជាជន និង​កងទ័ព​នៃ​ប្រទេស​ទាំង​២​ឱ្យ​ស្ថិតស្ថេរជាអមតៈ។ នេះបើតាម​ការបញ្ជាក់​របស់​ទ័ពជើងគោក​កម្ពុជា។

ការប្តេជ្ញា​នេះ​ធ្វើឡើង​ក្នុង​ពិធី​សំណេះសំណាល​សាកសួរ​សុខទុក្ខ និង​ចុះហត្ថលេខា​ប្រចាំ​ឆ្នាំ២០២៣ លើ​អនុស្សរណៈនៃការ​យោគយល់គ្នា​ចងសម្ព័ន្ធ​មេត្រីភាព រវាង​ទីបញ្ជាការ​យោធាខេត្ត​បារៀ-វង់តាវ និង​ទីបញ្ជាការ​កងពល​ធំ​អន្តរាគមន៍​លេខ៣ កាលពី​ថ្ងៃទី២៩ ខែមីនា នៅខេត្ត​ព្រះវិហារ។

ហ្វេសប៊ុក​កងទ័ពជើងគោក​កម្ពុជា​បញ្ជាក់ថា លោក ស្រី ឌឹក មេបញ្ជាការ​រង​កងទ័ពជើងគោក និង​ជាមេបញ្ជាការ​កងពល​ធំ​អន្តរាគមន៍​លេខ៣ បាន​សម្ដែង​ការដឹង​គុណ​ដល់​វៀតណាម ដែលតែង​បាន​ជួយ​ឧបត្ថម្ភ​គាំទ្រ​យ៉ាងច្រើន​ដល់​កងទ័ព​កម្ពុជា​ជារៀង​រហូតមក។

ហ្វេសប៊ុក​ដដែលបាន​ដកស្រង់​សម្ដី​លោក ស្រី ឌឹក ថ្លែង​ក្នុង​ពិធី​នេះ​ថា ប្រជាជន​កម្ពុជា​មិនអាច​ភ្លេច​បាន​នូវ «គុណូប្បការៈ​ដ៏ធំធេង» របស់​កងទ័ព​ប្រជាជន​វៀតណាម ក្នុង​ការលះបង់ «សាច់​ស្រស់ ឈាម​ស្រស់» ក្នុង​បុព្វហេតុ​សង្គ្រោះ​ប្រជាជន​កម្ពុជា​ឱ្យ​រួចផុត​ពី​របប​ខ្មែរ​ក្រហម។

លោក​ថ្លែង​ថា៖ «ដំណើរ​ទស្សនកិច្ច​របស់​គណៈ​ប្រតិភូ​នាឱកាស​នេះ​ ពិតជា​មាន​អត្ថន័យយ៉ាង​ធំធេង និង​ជាការសបញ្ជាក់​ឱ្យ​ឃើញ​យ៉ាងច្បាស់​អំពី​កិច្ចសហ​ប្រតិបត្តិការ​ល្អ ទំនាក់ទំនង​ល្អ អំពី​ចំណង​មិត្តភាព សាមគ្គីភាព យ៉ាងជិតស្និទ្ធ រវាង​កងទ័ព​ទាំង​២ រដ្ឋាភិបាល​នៃប្រទេស​ទាំង២ កម្ពុជា-វៀតណាម ដែលធ្លាប់​មាន​ប្រវត្តិ​តស៊ូ និងមាន​ប្រពៃណី​សាមគ្គីគ្នា​ជាបង​ប្អូន ក្នុង​នាម​ភូមិ​ផង​របង​ជាមួយ​ក្នុង​ភូមិសាស្ត្រ ឥណ្ឌូចិន ជាយូរលង់ ណាស់​មកហើយ»។

ហ្វេសប៊ុក​ដដែល​បន្ត​ថា លោក ស្រី ឌឹក សង្ឃឹម​យ៉ាងមុតមាំ​ថា ចំណង​សម្ព័ន្ធ​មេត្រីភាព និងកិច្ចសហ​ប្រតិបត្តិការ​រវាង ទីបញ្ជាការ​យោធា​ខេត្ត​បារៀវង់តាវ និង​ទីបញ្ជាការ​កងពល​ធំអន្តរាគមន៍​លេខ៣​ស្ថិតស្ថេរ និង​រឹងមាំ​ជាអមតៈ៕