ភ្នំពេញៈប្រមុខរាជរដ្ឋាភិបាលមានឆន្ទៈនយោបាយនិងការប្តេជ្ញាចិត្តក្នុងការប្រយុទ្ធជាមួយនឹងជំងឺកូវីដ១៩ ដែលធ្វើឱ្យកម្ពុជាអាចគ្រប់គ្រងស្ថានភាពបានល្អ តែមិនត្រូវភ្លេចខ្លួននិងកុំជឿតាមការផ្សាយព័ត៌មានមិនត្រឹមត្រូវពីវ៉ាក់សាំងកូវីដ១៩ឬការបកប្រែមិនត្រឹមត្រូវតាមបច្ចេកទេស។
នេះជាការលើកឡើងរបស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេស ក្នុងពេលចុះពិនិត្យដំណើរការចាក់វ៉ាក់សាំងកូវីដ១៩ ដូសជំរុញតាមបណ្តាខេត្តចំនួន៣ កាលពីចុងខែមីនា ។
លោកស្រី ក៏បានលើកទឹកចិត្ត និងជំរុញដល់មន្ត្រីសុខាភិបាល អាជ្ញាធរ និងមន្ត្រីពាក់ព័ន្ធ ត្រូវបន្តកិច្ចខិតខំប្រឹងប្រែងអប់រំផ្សព្វផ្សាយ ការការពារសុខភាព និងបន្តចាក់វ៉ាក់សាំងកូវីដ១៩ ដូសជំរុញជូនប្រជាជន ដើម្បីរក្សាបាននិរន្តរភាពនៃដំណើរការសេដ្ឋកិច្ច-សង្គម ជំរុញកំណើនសេដ្ឋកិច្ចគ្រួសារនិងសេដ្ឋកិច្ចជាតិ។
លោកស្រី បានថ្លែងថា៖«ថ្វីដ្បិតរាជរដ្ឋាភិបាលកម្ពុជាមានឆន្ទៈនយោបាយ និងការប្ដេជ្ញាចិត្តច្បាស់លាស់ក្នុងការប្រយុទ្ធប្រឆាំងនឹងជំងឺកូវីដ១៩ ធ្វើឱ្យកម្ពុជានាពេលបច្ចុប្បន្ន អាចគ្រប់គ្រងស្ថានភាពបានល្អ និងបន្តរស់នៅជាមួយវត្តមានវីរុសកូវីដ តែយើងទាំងអស់គ្នាមិនត្រូវភ្លេចខ្លួនឡើយ»។
លោកស្រី ឱ វណ្ណឌីន បានបញ្ជាក់ថា ៖ «មួយវិញទៀត សូមកុំជឿតាមការផ្សាយព័ត៌មានមិនត្រឹមត្រូវពីវ៉ាក់សាំងកូវីដ១៩ ឬការបកប្រែមិនត្រឹមត្រូវតាមលក្ខណ:បច្ចេកទេស និងសេចក្តីណែនាំនានានៃការចាក់វ៉ាក់សាំងកូវីដ១៩របស់អង្គការសុខភាពពិភពលោកនាពេលថ្មីៗនេះ»។
យោងតាមក្រសួងសុខាភិបាល បានឱ្យដឹងថា ការចុះពិនិត្យដំណើរការចាក់វ៉ាក់សាំងកូវីដ១៩ ដូសជំរុញនៅខេត្តចំនួន៣នោះ រួមមាន ខេត្តបន្ទាយមានជ័យ,ខេត្តប៉ៃលិន និងខេត្តបាត់ដំបង ចាប់ពីថ្ងៃទី២៨ ដល់ថ្ងៃទី៣១ខែមីនា ឆ្នាំ២០២៣កន្លងទៅ។
លោកស្រី បានសង្កត់ធ្ងន់ថា ប្រសិនបើថ្នាក់ដឹកនាំនិងមន្ត្រីពាក់ព័ន្ធខិតខំអនុវត្តទៅតាមទិសដៅដែលបានដាក់ចេញ ប្រាកដណាស់ការប្រយុទ្ធប្រឆាំងនឹងជំងឺកូវីដ១៩ ពោលគឺការចាក់វ៉ាក់សាំងបង្ការជំងឺកូវីដ១៩ នៅកម្ពុជា នឹងទទួលបានលទ្ធផលកាន់តែល្អប្រសើរឡើងៗ ក្នុងទិសដៅធានាបាននូវសន្តិសុខ និងសុវត្ថិភាពសុខភាពធារណ:។
លោកស្រី មានប្រសាសន៍ថា៖«ការផ្សព្វផ្សាយព័ត៌មានមិនពិត ព័ត៌មានមិនត្រឹមត្រូវ ឬព័ត៌មានប្រឌិតណាមួយនឹងអាចនាំមកនូវមហន្តរាយសុខភាពសាធារណ: ដែលយើងទាំងអស់គ្នាត្រូវតែនាំគ្នាចៀសវាង និងរួមគ្នាបំបាត់នូវទង្វើអសកម្មបែបនេះ ដើម្បីសេចក្តីសុខ សន្តិសុខ និងសុវត្ថិភាពសុខភាពសាធារណ: និងការរស់នៅជាប្រក្រតីធម្មតារបស់យើងទាំងអស់គ្នា»។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី១ ខែមេសា ឆ្នាំ២០២៣ លទ្ធផលចាក់វ៉ាក់សាំងធៀបនឹងចំនួនប្រជាជនសរុប១៦លាន នាក់ មាន ៩៥,៥១%។ របាយការណ៍បានបន្តទៀតថា អត្រាចាក់ដូសទី៣មានជាង១០លាននាក់ អត្រាចាក់ដូសទី៤មានចំនួនជាង៥លាននាក់ អត្រាចាក់ដូសទី៥ មានចំនួនជិត២លាននាក់ និងអត្រានៃការចាក់ដូសទី៦ មានចំនួនជាង ៣៤ម៉ឺននាក់៕