លោក លី ធុជ អនុប្រធានទី១ អាជ្ញាធរមីន ថ្លែងនៅខេត្តសៀមរាប កាលពីថ្ងៃទី ២៦ ខែមេសា។ រូបថត CMAA
ភ្នំពេញៈ អាជ្ញាធរមីនកម្ពុជា (CMAA) និងក្រុមហ៊ុនអាល្លឺម៉ង់ Vallon GmbH កាលពីម្សិលមិញបានសិក្សារួមគ្នាក្នុងសិក្ខាសាលាថ្នាក់តំបន់លើកទី១ រយៈពេល ២ ថ្ងៃ ពាក់ព័ន្ធនឹងដំណោះស្រាយដ៏មានប្រសិទ្ធភាពសម្រាប់កិច្ចការរាវរកគ្រាប់មីន និងយុទ្ធភណ្ឌមិនទាន់ផ្ទុះ ក្នុងការស្វែងយល់ពីការវិវត្តចុងក្រោយបង្អស់នៃបច្ចេកវិទ្យារាវរកគ្រាប់មីន និងយុទ្ធភណ្ឌមិនទាន់ផ្ទុះ ដើម្បីចូលរួមកែលម្អប្រតិបត្តិការសកម្មភាពមីន។
សិក្ខាសាលាថ្នាក់តំបន់នេះចាប់ផ្ដើម កាលពីថ្ងៃទី ២៦ ដល់ថ្ងៃទី ២៧ ខែមេសា ឆ្នាំ ២០២៣ នៅខេត្តសៀមរាប មានការចូលរួមដោយអ្នកជំនាញ និងអ្នកពាក់ព័ន្ធមកពីសហគមន៍សកម្មភាពមីន រួមទាំងប្រតិបត្តិករសកម្មភាពមីន អង្គការក្រៅរដ្ឋាភិបាល ទីភ្នាក់ងាររដ្ឋាភិបាល និងអង្គការអន្តរជាតិ។
យោងតាមអាជ្ញាធរមីនបានឱ្យដឹងថា សិក្ខាសាលានេះធ្វើឡើងក្នុងគោលដៅប្រមូលផ្តុំអ្នកជំនាញដើម្បីស្វែងយល់ពីការវិវត្តចុងក្រោយបង្អស់នៃបច្ចេកវិទ្យារាវរកគ្រាប់មីន និងយុទ្ធភណ្ឌមិនទាន់ផ្ទុះ ដើម្បីកែលម្អ ស្ថាបនាប្រតិបត្តិការសកម្មភាពមីន និងផ្តល់ជាយុទ្ធសាស្ត្រពន្លឿនឆ្ពោះទៅរកគោលដៅកម្ពុជា តំបន់អាស៊ាន និងពិភពលោកគ្មានមីន។
លោក លី ធុជ អនុប្រធានទី១ អាជ្ញាធរមីន ថ្លែងថា៖ «ការប្រើប្រាស់ឧបករណ៍បច្ចេកវិទ្យាទំនើបក្នុងប្រតិបត្តិការរាវរកគ្រាប់មីន និងយុទ្ធភណ្ឌមិនទាន់ផ្ទុះបានដើរតួនាទីយ៉ាងសំខាន់ដើម្បីសម្រេចទស្សនវិស័យរបស់រដ្ឋាភិបាលកម្ពុជាដើម្បីកម្ពុជាគ្មានមីនឆ្នាំ ២០២៥»។ «បច្ចុប្បន្ននេះ បច្ចេកវិទ្យាបានក្លាយទៅជាឧបករណ៍ដ៏មានប្រសិទ្ធភាពក្នុងការប្រយុទ្ធប្រឆាំងនឹងគ្រាប់មីន និងយុទ្ធភណ្ឌមិនទាន់ផ្ទុះ ដូចជា ការកំណត់ទីតាំង និងការកំណត់អត្ត-សញ្ញាណគ្រាប់មីននិងយុទ្ធភណ្ឌមិនទាន់ផ្ទុះបានកាន់តែត្រឹមត្រូវ និងមានប្រសិទ្ធភាពជាងមុន»។
លោកលី ធុជ ថ្លែងថា ក្រុមហ៊ុន Vallon GmbH ជាដៃគូសំខាន់បំផុតក្នុងការងារបោសសម្អាតមីននៅប្រទេសកម្ពុជា ហើយជាក្រុមហ៊ុនដែលឈានមុខគេក្នុងពិភពលោកក្នុងការផលិត និងការអភិវឌ្ឍបច្ចេកវិទ្យាទំនើបកម្រិតខ្ពស់ក្នុងប្រតិបត្តិការរាវរកគ្រាប់មីន និងយុទ្ធភណ្ឌមិនទាន់ផ្ទុះ ផ្សារភ្ជាប់ទង្វើមនុស្សធម៌។
លោក Markus Vallon នាយកគ្រប់គ្រងក្រុមហ៊ុន Vallon GmbH របស់អាល្លឺម៉ង់ថ្លែងថា ក្រុមហ៊ុនបានផលិតនូវឧបករណ៍រាវរកគ្រាប់មីនជាច្រើនប្រភេទប្រកបដោយប្រសិទ្ធភាព និងសុវត្ថិភាពខ្ពស់ ព្រមទាំងបានទទួលបានការកែលម្អជាច្រើនពីកម្ពុជា ក្នុងការធ្វើទំនើបកម្មបច្ចេកវិទ្យាឱ្យកាន់តែប្រសើរឡើង ហើយបច្ចុប្បន្ន ក្រុមហ៊ុនបានដាក់បញ្ចូលភាសាខ្មែរក្នុងឧបករណ៍នេះដើម្បីផ្តល់ភាពកាន់តែងាយស្រួល៕
.jpg)
