លោកហ៊ុន សែន និងលោកហ៊្វូមីអាគិ តាកាហាស្ស៊ី ក្នុងជំនួបកាលពីថ្ងៃទី២៦មេសា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន និងប្រធានសមាគមជប៉ុន-កម្ពុជា លោក ហ៊្វូមីអាគិ តាកាហាស្ស៊ី (Fumiaki TAKAHASHI) ជួបពិភាក្សាការងារពាក់ព័ន្ធវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងកម្ពុជា និងជប៉ុន ខណៈភាគីជប៉ុនបានស្នើសុំកិច្ចសហការពីកម្ពុជា ដើម្បីរៀបចំព្រឹត្តិការណ៍ធំសម្រាប់ខួប ៧០ ឆ្នាំនៃទំនាក់ទំនងរវាងប្រទេសទាំង ២ នៅខែវិច្ឆិកាខាងមុខ។
ជំនួបពិភាក្សាការងារនេះ ធ្វើឡើងនៅវិមានសន្តិភាព នៅរសៀលថ្ងៃទី ២៦ ខែមេសា ឆ្នាំ ២០២៣ ដែលមានការជជែកលើការងារធំៗ ចំនួន ៥។ នេះបើយោងតាមការប្រកាសពីទំព័រ Facebook ផ្លូវការរបស់លោកនាយករដ្ឋមន្ត្រី។
ការងារធំៗចំនួន ៥ ក្នុងរបៀបវារៈនោះ រួមមាន ទី១ ការរៀបចំវេទិកាព័ត៌មានអំពីសក្តានុពលផ្នែកវិនិយោគនៅកម្ពុជាដើម្បីផ្សព្វផ្សាយដល់ប្រទេសជប៉ុន ជាពិសេសសហគ្រាសខ្នាតតូច និងមធ្យមជប៉ុន ដែលកំពុងស្វែងរកការវិនិយោគនៅក្រៅប្រទេស។
ទី២ ការជំរុញការការអភិវឌ្ឍធនធានមនុស្សលើវិស័យកែសម្ផស្ស, លើវិស័យជួសជុលយានយន្ត និងលើវិស័យបដិសណ្ឋារកិច្ច។ ទី៣ ការរៀបចំខួប ៧០ឆ្នាំ នៃទំនាក់ទំនងការទូតរវាងប្រទេសទាំង២ ដែលក្នុងនោះនឹងមានការអុជកាំជ្រួចអបអរសាទរផងដែរ នៅថ្ងៃទី១៩ ខែវិច្ឆិកា ឆ្នាំ២០២៣។
ទី៤ ជំរុញការនាំចេញផលិតផលពីកម្ពុជាទៅជប៉ុន និងកែច្នៃផលិតផលកម្ពុជា សម្រាប់ដាក់លក់លើទីផ្សារ និងទី៥ អបអរសាទរចំពោះលោកហ៊ុន សែន ដែលទទួលបានជោគជ័យលើការរៀបចំ និងដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធកន្លងទៅ។
ក្នុងនោះ លោកហ៊ុន សែន បានផ្តាំផ្ញើតាមរយៈប្រធានសមាគមជប៉ុន-កម្ពុជា ដោយលើកទឹកចិត្តឱ្យភាគីជប៉ុនមកវិនិយោគនៅកម្ពុជា ស្របពេលកម្ពុជាមានច្បាប់វិនិយោគថ្មី ដែលផ្ដល់នូវភាពអនុគ្រោះច្រើនសម្រាប់ការវិនិយោគ ។ ជាពិសេសលោកស្នើឱ្យភាគីជប៉ុនបន្តជួយកម្ពុជាលើការអភិវឌ្ឍធនធានមនុស្ស ព្រមទាំងជំរុញការនាំចេញផលិតផលកម្ពុជាទៅកាន់ជប៉ុន។
ជាមួយគ្នានេះ ក្នុងជំនួបជាមួយលោកឃួង ស្រេង អភិបាលរាជធានីភ្នំពេញ កាលពីថ្ងៃទី២៥ ខែមេសា ឆ្នាំ២០២៣ លោកហ៊្វូមីអាគិ តាកាហាស្ស៊ី បានស្នើសុំកិច្ចការសហការជាមួយអាជ្ញាធររាជធានីភ្នំពេញ ដើម្បីរៀបចំខួបឆ្នាំ៧០ នៃទំនាក់ទំនងការទូតកម្ពុជា-ជប៉ុន ដែលសមាគមជប៉ុន-កម្ពុជា និងស្ថានទូតជប៉ុនប្រចាំកម្ពុជាគ្រោងរៀបចំជាព្រឹត្តិការណ៍ធំ ដោយមានការបាញ់កាំជ្រួច ការម្តែងសិល្បៈបង្ហាញពីវប្បធម៌ អារ្យធម៌ប្រទេសជប៉ុន និងកម្មវិធីផ្សេងៗទៀត។
ជាការឆ្លើយតប លោកឃួង ស្រេង បានផ្តល់យោបល់ឱ្យភាគីសមាគមជប៉ុន-កម្ពុជា ធ្វើការទាក់ទងទៅកាន់ក្រសួងការបរទេស ក៏ដូចជាក្រសួងការពារជាតិ និងក្រសួងមហាផ្ទៃដើម្បីសុំការអនុញ្ញាតជាមុនសិន ពាក់ព័ន្ធនឹងការបាញ់កាំជ្រួចក្នុងព្រឹត្តិការណ៍ខួបនោះ ខណៈរដ្ឋបាលរាជធានីភ្នំពេញ ត្រៀមសហការយ៉ាងពេញទំហឹង។
លោកគូសបញ្ជាក់ថា៖«រដ្ឋបាលរាជធានីភ្នំពេញ ក៏ដូចជារាជរដ្ឋាភិបាលកម្ពុជា គឺបានយកចិត្តទុកដាក់យ៉ាងខ្លាំងចំពោះអ្នកវិនិយោគរបស់ជប៉ុន ក៏ដូចជាអ្នកទេសចរ និងប្រជាពលរដ្ឋជប៉ុន ដែលមកស្នាក់នៅកម្ពុជាដែលធ្វើឱ្យគាត់មានភាពកក់ក្តៅក្នុងចិត្ត»។
គួរជម្រាបជូនថា លោក ហ៊្វូមីអាគិ តាកាហាស្ស៊ី ប្រធានសមាគមជប៉ុន-កម្ពុជា ធ្លាប់បម្រើការជាឯកអគ្គរាជទូតជប៉ុនប្រចាំកម្ពុជាពីឆ្នាំ២០០៣ ដល់ឆ្នាំ២០០៧។
ពាក់ព័ន្ធនឹងព្រឹត្តិការណ៍នេះ លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លើកឡើងថា ទំនាក់ទំនងកម្ពុជា-ជប៉ុន ឈានដល់ក្របខ័ណ្ឌយុទ្ធសាស្រ្តគ្រប់ជ្រុងជ្រោយ ដែលជាការបើកទំព័រប្រវត្តិសាស្រ្តថ្មីសម្រាប់ខួប៧០ឆ្នាំ។
លោកថា៖«នយោបាយការបរទេសជប៉ុនមកលើកម្ពុជា ជានយោបាយការបរទេសដែលគោរពគ្នាទៅវិញទៅមក នូវឯករាជភាព អធិបតេយ្យភាព បូរណភាពនៃប្រទេសផងគ្នាទៅវិញទៅមក។ ជប៉ុនមិនដែលដាក់សម្ពាធមកកាន់កម្ពុជា ហើយក្នុងក្របខ័ណ្ឌតំបន់និងពិភពលោក ក៏ជប៉ុនប្រើការទូតត្រជាក់ស្រទន់ ដែលគិតគូរពីវិបុលភាព និងការអភិវឌ្ឍ»។
សម្រាប់លោកសេង វណ្ណលី សាស្ត្រាចារ្យផ្នែកទំនាក់ទំនងអន្តរជាតិលើកឡើងថា ទំនាក់ទំនងកម្ពុជា-ជប៉ុន បានឈានមកដល់កិច្ចសហប្រតិបត្តិការគ្រប់ជ្រុងជ្រោយ មិនត្រឹមតែជាទំនាក់ទំនងល្អរវាងថ្នាក់ដឹកនាំកំពូលនៃប្រទេសទាំង២ឡើយ ក៏ជាទំនាក់ទំនងគំរូល្អមួយ។
លោកថា៖«ជប៉ុនកំពុងយកចិត្តទុកដាក់ពង្រឹងកិច្ចសហប្រតិបត្តិការជាមួយបណ្តាប្រទេសទំនាក់ទំនងជាប្រពៃណី ដើម្បីបង្កើនកិច្ចសហការ ការគាំទ្រគ្នានៅលើឆាកតំបន់និងអន្តរជាតិ។ កន្លងមក មិនថា មានការប្រែប្រួលស្ថានការណ៍នយោបាយផ្ទៃក្នុងកម្ពុជាយ៉ាងណាឡើយ ជប៉ុននៅតែដើរតួនាទីជាភាគីសម្របសម្រួលខ្ពស់ ជាសន្ធានការីក្នុងការសម្របសម្រួល ផ្សះផ្សា ទំនាស់នយោបាយនៅកម្ពុជា»។
សម្រាប់លោកយល់ថា ជប៉ុនជាប្រទេសស្មោះត្រង់ជាងគេបំផុតមួយរបស់កម្ពុជា ដែលតែងបកស្រាយ ការពារ និងផ្តល់អនុសាសន៍ប្រកបដោយភាពទន់ភ្លន់ដើម្បីកម្ពុជាអាចរកច្រកចេញ និងអាចឱ្យកម្ពុជាពង្រីកកិច្ចសហប្រតិបត្តិការជាមួយប្រទេសដទៃ។
គួរបញ្ជាក់ថា នៅឆ្នាំ២០២៣ នេះ ជាឆ្នាំខួប៧០ឆ្នាំ នៃទំនាក់ទំនងទ្វេភាគីកម្ពុជា-ជប៉ុន ប្រទេសទាំង២ បានព្រមព្រៀងគ្នាយកជាឆ្នាំសម្រាប់បើកទំព័រទំនាក់ទំនងក្នុងក្របខ័ណ្ឌយុទ្ធសាស្រ្តគ្រប់ជ្រុងជ្រោយ៕
.jpg)
