មន្រ្តីប្រយុទ្ធប្រឆាំងអំពើជួញដូរមនុស្សជំរុញបន្តការគាំទ្រដល់ក្រុមកុមាររងគ្រោះ និងលើកកម្ពស់ប្រសិទ្ធភាពការងារ។
សៀមរាបៈ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានស្នើឱ្យមានការចូលរួមគាំទ្របន្តដល់កុមារចំនួន ៩០ នាក់ ដែលទប់ស្កាត់ពីការប្រើប្រាស់កម្លាំងពលកម្មនៅក្នុងសិប្បកម្មផលិតឥដ្ឋ ដែលមន្ទីរការងារបានធ្វើការគាំទ្រកាលពីឆ្នាំ២០២២មកនោះ។
ការស្នើនេះត្រូវបានធ្វើឡើងក្នុងកិច្ចប្រជុំប្រចាំខែមេសារបស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាបជាមួយនឹងភាគីពាក់ព័ន្ធ ស្តីពីអនុវត្តការងារប្រយុទ្ធប្រឆាំងអំពើជួញដូរមនុស្សកាលពីថ្ងៃទី២៧ខែមេសានេះ។ នេះបើយោងតាមរដ្ឋបាលខេត្តសៀមរាប។
កិច្ចប្រជុំបានពិនិត្យ និងពិភាក្សាតាមរបៀបវារ:រួមមាន៖១. ពិនិត្យលើសេចក្តីរបាយការណ៍លទ្ធផលការងារប្រយុទ្ធប្រឆាំងអំពើជួញដូរមនុស្សប្រចាំខែមេសា ឆ្នាំ២០២៣ និង២. ពិនិត្យនិងពិភាក្សាលើបញ្ហាប្រឈម ពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស។
កិច្ចប្រជុំបានផ្តោតសំខាន់ទៅលើ ការគាំទ្របន្តដល់កុមារដែលទប់ស្កាត់ពីការប្រើប្រាស់កម្លាំងពលកម្ម នៅក្នុងសិប្បកម្មផលិតឥដ្ឋចំនួន ៩០ នាក់ ដែលមន្ទីរការងារបានធ្វើការគាំទ្រកាលពីឆ្នាំ២០២២ និងស្នើឱ្យមានការចូលរួមគាំទ្របន្តនៅក្នុងឆ្នាំ២០២៣ ទៅលើសម្ភារសិក្សា សម្លៀកបំពាក់ និងការរៀនបំប៉នបន្ថែម។
ក្រៅពីនោះក៏មានការពិភាក្សាទៅលើករណីគ្រួសារទារកអាយុ ១ ខែ ដែលម្តាយពុំមានលទ្ធភាពចិញ្ចឹម និងមានបំណងប្រគល់ទៅឱ្យគ្រួសារផ្សេងដើម្បីចិញ្ចឹមជំនួស ព្រោះម្តាយពុំមានទឹកដោះនិងពុំមានលទ្ធភាពទិញទឹកដោះគោ។ កិច្ចប្រជុំក៏បានជំរុញដល់មន្ទីរសង្គមកិច្ច មន្ទីរកិច្ចការនារីខេត្ត ស្នងការដ្ឋាននគរបាលខេត្ត និងអង្គការដៃគូពាក់ព័ន្ធ ត្រូវពិនិត្យឡើងវិញ និងសហការគ្នាក្នុងការប្រមូលព័ត៌មាន និងផ្តល់ប្រឹក្សាយោបល់ទៅដល់កុមារីដែលសង្ស័យរងគ្រោះដោយការរំលោភបំពានតាមប្រព័ន្ធអនឡាញ និងដាក់ពាក្យបណ្តឹងមកសមត្ថកិច្ច ដើម្បីអនុវត្តតាមនីតិវិធី។
អាជ្ញាធរក្រុង ស្រុក និងអ្នកពាក់ព័ន្ធក៏ត្រូវបានជំរុញឱ្យពិនិត្យ និងផ្សព្វផ្សាយឱ្យបានទូលំទូលាយបន្ថែមទៀតពីកលល្បិចរបស់ជនខិលខូចដែលបានចុះជ្រើសរើសប្រជាពលរដ្ឋដើម្បីរៀនភាសាជប៉ុន សម្រាប់នាំចេញទៅធ្វើការដោយខុសច្បាប់។
បន្ថែមពីនោះក៏មានការជំរុញឱ្យមានការចូលរួមពីដៃគូពាក់ព័ន្ធ ក្នុងការរួមបណ្តុះបណ្តាលពង្រឹងសមត្ថភាពដល់មន្រ្តីនគរបាល អាជ្ញាធរមូលដ្ឋាន លើការអនុវត្តច្បាប់ស្តីពី ការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទ ច្បាប់ស្តីពី យុត្តិធម៌អនីតិជន កិច្ចការពារកុមារ ការកំណត់អត្តសញ្ញាណជនរងគ្រោះ និងការផ្តល់សេវាសមស្រប៕
.jpg)
