អដ្ឋិធាតុកងទ័ពស្ម័គ្រចិត្ត និងជំនាញការវៀតណាមចំនួន ២១ បន្ថែមទៀតត្រូវបានរកឃើញ។
មណ្ឌលគិរីៈអដ្ឋិធាតុកងទ័ពស្ម័គ្រចិត្តវៀតណាមចំនួន ២១ អដ្ឋិធាតុបន្ថែមទៀតត្រូវបានរកឃើញ ហើយគណៈកម្មការជំនាញខេត្តមណ្ឌលគិរី និងខេត្តដាក់ឡាក់បានជួបពិភាក្សាលើការងារត្រៀមរៀបចំពិធីបង្សុកូល ដើម្បីធ្វើមាតុភូមិនិវត្តន៍អដ្ឋិធាតុទាំងនោះទៅកាន់មាតុប្រទេសវិញ។ នេះបើយោងតាមមន្ទីរព័ត៌មានខេត្តមណ្ឌលគិរីនៅថ្ងៃទី២៨ខែមេសា។
ការជួបពិភាក្សានេះត្រូវបានធ្វើឡើងនៅថ្ងៃទី២៨ខែមេសានេះនៅសាលប្រជុំសាលាខេត្តមណ្ឌលគិរី ក្រោមវត្តមានលោកស្រី វិន ស៊ីធួន អភិបាលរងខេត្តមណ្ឌលគិរី និងលោកស្រី ហឺយីម កាដត អនុប្រធានគណៈកម្មាធិការប្រជាជនខេត្ត និងជាប្រធានគណៈកម្មការជំនាញខេត្តដាក់ឡាក់ វៀតណាម។
ភាគីទាំងពីរបានពិភាក្សាគ្នាពីការងារត្រៀមរៀបចំពិធីបង្សុកូល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តនិងជំនាញការវៀតណាម ដែលបានពលីកាលពីសម័យសង្គ្រាមក្នុងទឹកដីខេត្តមណ្ឌលគិរី សម្រាប់រដូវប្រាំងឆ្នាំ ២០២២-២០២៣។
ក្នុងឱកាសនោះលោកស្រី វិន ស៊ីធួន បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់គណៈកម្មការជំនាញនៃខេត្តទាំងពីរមណ្ឌលគិរី-ដាក់ឡាក់ ដែលកន្លងមកបានរួមសហការអនុវត្តការងារ និងទទួលបានលទ្ធផលយ៉ាងល្អប្រសើរលើការងារជីកគាស់ រុករក ប្រគល់-ទទួល និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីកាលពីសម័យសង្គ្រាមលើទឹកដីខេត្តមណ្ឌលគិរីនៃព្រះរាជាណាចក្រកម្ពុជា។
លោកស្រី អភិបាលរងខេត្ត ក៏បានសំណូមពរដល់គណៈកម្មការជំនាញនៃខេត្តដាក់ឡាក់ឱ្យបន្តកិច្ចសហប្រតិបត្តិការល្អប្រសើរជាមួយ អាជ្ញាធរដែនដីសមត្ថកិច្ចពាក់ព័ន្ធ ប្រជាពលរដ្ឋមូលដ្ឋាន ត្រូវគោរពឱ្យបានម៉ឺងម៉ាត់នូវទំនៀមទម្លាប់ប្រពៃណីរបស់ប្រជាជន ទំនៀមទម្លាប់បងប្អូនជនជាតិដើមភាគតិច និងជាពិសេសគឺច្បាប់របស់កម្ពុជា។ ម្យ៉ាងទៀតអាជ្ញាធរមូលដ្ឋាន និងសមត្ថកិច្ចពាក់ព័ន្ធក្នុងខេត្តត្រូវផ្ដល់កិច្ចសហការ និងជួយសម្របសម្រួលដល់ក្រុមការងារជំនាញខេត្តដាក់ឡាក់ ដើម្បីបង្កលក្ខណៈងាយស្រួលដល់ក្រុមការងារក្នុងការស្វែងរក ជីកគាស់និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តនិងជំនាញការវៀតណាម ទៅកាន់មាតុប្រទេសវិញ។ នេះបើយោងតាមប្រភពដដែលនេះ៕
.jpg)
