អ្នកចូលរួមនៅក្នុងពិធីបិទវគ្គបណ្តុះបណ្តាលនៅសាលាភូមិន្ទរដ្ឋបាល កាលពីថ្ងៃទី ២៧ មេសា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានរំឭកជាថ្មីឱ្យមន្ត្រីរដ្ឋាភិបាលក៏ដូចជា អាជ្ញាធរទាំងអស់ត្រូវអនុវត្តការងារ និងភារកិច្ចឱ្យមានប្រសិទ្ធភាពនៅក្នុងដែនសមត្ថកិច្ចរបស់ខ្លួនទៅតាមច្បាប់ ដោយកុំចាំតែមានបទបញ្ជារបស់លោក ខណៈអ្នកតាមដានសង្គមសម្តែងការគាំទ្រចំពោះការលើកឡើងនេះ។
នៅក្នុងពិធីបិទវគ្គបណ្តុះបណ្តាលឆ្នាំ ២០២២ និងបើកវគ្គបណ្តុះបណ្តាល ឆ្នាំ ២០២៣ របស់សាលាភូមិន្ទរដ្ឋបាល នៅថ្ងៃទី ២៧ ខែមេសា លោកនាយករដ្ឋមន្ត្រី ហ៊ុន សែន បានថ្លែងថា៖ «ខ្ញុំក៏សូមដាស់តឿនមន្ត្រីទាំងឡាយត្រូវធ្វើតាមច្បាប់ កុំចាំបទបញ្ជា រឿងនេះខ្ញុំតែងតែរំឭក កុំចាំតែស្អី ហ៊ុន សែន ស្រែកទៅបាននាំគ្នាធ្វើ កុំលេងរបៀបនេះ ខិតខំធ្វើទៅ»។
លើសពីនេះ លោកនាយករដ្ឋមន្ត្រីបានក្រើនរំឭកដល់បណ្តាមន្ត្រីទាំងឡាយពីវិធីសាស្ត្រដឹកនាំ និងធ្វើកិច្ចការងារដែលមាន៣ដំណាក់កាល។
លោកថា៖ «ដូចខ្ញុំធ្លាប់លើកឡើងមុនៗអ៊ីចឹង វិធីសាស្ត្រដឹកនាំ និងធ្វើការងារមាន ៣ ដំណាក់កាល គឺត្រូវត្រៀមបម្រុង ការរៀបចំផែនការជាក់លាក់មួយមានស្ថានភាពគ្រប់ជ្រុងជ្រោយ បន្ទាប់មករៀបចំផែនការសកម្មភាពចាត់តាំងអនុវត្ត ហើយជាមួយនោះ ត្រូវត្រៀមដោះស្រាយកត្តាចៃដន្យ ដែលវាលេចឡើងនៅក្នុងពេលដែលវាកើតឡើងដោយយើងប៉ាន់ស្មានមិនបាន»។
លោកបានបញ្ជាក់បន្ថែមថា ប្រសិនបើមន្ត្រីអាចដោះស្រាយបញ្ហាដែលកើតឡើងដោយកត្តាចៃដន្យបាន នោះក៏ជាការបង្ហាញពីសមត្ថភាពពិតប្រាកដរបស់មន្ត្រីរូបនោះដែរ។ តួយ៉ាងលោកប្រៀបធៀបនឹងចំណោទបញ្ហាដែលអាចកើតឡើងដោយកត្តាចៃដន្យក្នុងព្រឹត្តិការណ៍កីឡាស៊ីហ្គេមដែលកម្ពុជាជាម្ចាស់ផ្ទះដែលរដ្ឋាភិបាលកំពុងត្រៀមខ្លួនយ៉ាងសស្រោកសស្រាំ។
ជុំវិញបញ្ហានេះ លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាបានសាទរចំពោះការដាស់តឿនរបស់លោកនាយករដ្ឋមន្ត្រីដែលចង់បង្ក្រាបភាពស្ពឹកស្រពន់របស់មន្ត្រីនានាដែលមិនអនុវត្តការងារក្នុងដែនសមត្ថកិច្ចខ្លួនឱ្យបានត្រឹមត្រូវតាមច្បាប់ ពោលគឺរង់ចាំតែបទបញ្ជាពីនាយករដ្ឋមន្ត្រី។
លោក ពិសី បានថ្លែងថា៖ «ខ្ញុំសូមលើកទឹកចិត្តឱ្យសម្តេចបង្កើតនូវយន្តការត្រួតពិនិត្យតាមដានជាប្រព័ន្ធក្រោមក្របខ័ណ្ឌក្រសួងមុខងារសាធារណៈនិងសាមីក្រសួងនីមួយៗដើម្បីត្រួតពិនិត្យតាមដាន និងវាយតម្លៃប្រកបដោយវិជ្ជាជីវៈតាមប្រព័ន្ធគ្រប់គ្រងធនធានមនុស្ស ហើយមានការលើកទឹកចិត្ត និងដំឡើងឋានៈដល់មន្ដ្រីដែលអនុវត្តការងារបានល្អផង»។
លោក ប៉ិច ពិសី ដែលជាអ្នកតាមដានផ្នែកអភិបាលកិច្ចបានបន្ដថា តាមសង្កេតឃើញថា កន្លងមកមន្ត្រីរដ្ឋាភិបាលមួយចំនួនយកតំណែងរដ្ឋដើម្បីជាខ្នងបង្អែក ដើម្បីមុខរបរជំនួញខ្លួនជាជាងគិតពីតួនាទីត្រូវអនុវត្តបម្រើរាស្ត្រ។ បើតាមលោកពិសី រដ្ឋាភិបាលត្រូវពង្រឹងប្រសិទ្ធភាព និងប្រសិទ្ធផលការងារ និងការផ្តល់សេវាសាធារណៈ ជាជាងបរិមាណ និងចំនួនមន្ត្រីដែលមានចំនួនច្រើនលើសលប់ធ្វើឱ្យខ្ជះខ្ជាយថវិកាជាតិ។
ស្រដៀងគ្នានេះដែរ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បានគាំទ្រការណែនាំរបស់ប្រមុខរដ្ឋាភិបាលកម្ពុជាដើម្បីពង្រឹងតួនាទីរបស់មន្ត្រីរាជការឱ្យមានការទទួលខុសត្រូវខ្ពស់ក្នុងតួនាទី និងការងារខ្លួន ដែលមិនត្រូវរង់ចាំតែបទបញ្ជានាយករដ្ឋមន្ត្រី ដោយលោកថា ហាក់បីដូចជារង់ចាំការបង្គាប់ឱ្យធ្វើទៅហើយ។
លោក យង់ គិមអេង បានលើកជាឧទាហរណ៍ថា៖ «កន្លងមក រឿងខ្លះ ប្រមុខរដ្ឋាភិបាលដាក់ចេញវិធានការឱ្យអនុវត្តហើយ ហើយអនុវត្តបានមួយភ្លែតក៏ឈប់ទៅ ទាល់តែមានការបង្គាប់បញ្ជាទៀត បានប្រឹងធ្វើ ដល់ឈប់បញ្ជាពីនាយករដ្ឋមន្ត្រីឬថ្នាក់លើ ក៏ទុកចោលទៅ នេះជាបញ្ហា ប៉ុន្តែនៅក្នុងនោះក៏មានមន្ត្រីសកម្មដែរ»៕
.jpg)
