ព្រះអគ្គិជ័យកីឡា ធ្វើដំណើរចាកចេញពីខេត្តស្ទឹងត្រែង ឆ្ពោះមកកាន់រាជធានីភ្នំពេញ។
ភ្នំពេញ/ស្ទឹងត្រែងៈ ព្រះអគ្គិជ័យកីឡា នៃស៊ីហ្គេម លើកទី ៣២ និងអាស៊ានប៉ារ៉ាហ្គេម លើកទី ១២ បានចាកចេញពីខេត្តស្ទឹងត្រែង ឆ្ពោះមកកាន់រាជធានីភ្នំពេញហើយ ដោយបានដង្ហែចេញពីវត្តស្រះកែវមុន្នីវណ្ណ (វត្តលើ) នាព្រឹកថ្ងៃទី ២៨ ខែមេសា ឆ្នាំ ២០២៣ ក្រោយពីបានត្រឡប់មកដល់ទឹកដីកម្ពុជាវិញកាលពី ១ ថ្ងៃមុន។
ក្នុងដំណើរឆ្ពោះមកកាន់រាជធានីភ្នំពេញនោះគឺមានអមជាមួយរថយន្ដ និងម៉ូតូធំជាច្រើនគ្រឿងដែលដឹកនាំដោយលោក នី ផល្លី រដ្ឋលេខាធិការក្រសួងទេសចរណ៍ និងជាតំណាង CAMSOC។ នេះបើយោងតាមក្រសួងព័ត៌មាន។
ក្នុងពិធីដង្ហែព្រះអគ្គិជ័យនេះ រដ្ឋបាលខេត្តត្បូងឃ្មុំក៏បានចេញសេចក្តីជូនដំណឹងពីការបញ្ចៀសចរាចរណ៍យានយន្តគ្រប់ប្រភេទជាបណ្តោះអាសន្នផងដែរ។ រដ្ឋបាលខេត្តបានជូនដំណឹងថា គណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍លើកទី ៣២ ឆ្នាំ ២០២៣ នឹងមានក្បួនពិធីដង្ហែព្រះអគ្គិជ័យកីឡា សម្រាប់ការប្រកួតកីឡាអាស៊ីអាគ្នេយ៍លើកទី ៣២ និងកីឡាអាស៊ានប៉ារ៉ាហ្គេមលើកទី ១២ ឆ្នាំ ២០២៣ ដែលធ្វើដំណើរចេញពីសាធារណរដ្ឋប្រជាមានិតឡាវ កាត់តាមខេត្តស្ទឹងត្រែង ខេត្តក្រចេះ ឆ្ពោះមកកាន់ខេត្តត្បូងឃ្មុំ តាមផ្លូវជាតិលេខ ៧៣ និងផ្លូវជាតិលេខ ៧ បន្តទៅរាជធានីភ្នំពេញ នៅថ្ងៃទី ២៨ ខែមេសានេះ។
ដូចនេះ ដើម្បីឱ្យក្បួនពិធីដង្ហែព្រះអគ្គិជ័យកីឡាប្រព្រឹត្តទៅដោយរលូន រក្សាបាននូវសន្តិសុខសណ្តាប់ធ្នាប់ និងរបៀបរៀបរយល្អ ព្រមទាំងបញ្ចៀសនូវការកកស្ទះចរាចរណ៍ រដ្ឋបាលខេត្តត្បូងឃ្មុំនឹងធ្វើការបញ្ចៀសចរាចរណ៍ចំពោះយានយន្តគ្រប់ប្រភេទ ដែលធ្វើដំណើរឆ្លងកាត់តាមកំណាត់ផ្លូវជាតិលេខ ៧ (កែងផ្លូវប្រធាតុស្ពានគីហ្សូណា) និងផ្លូវជាតិលេខ ៧៣ (ឆ្លងតំបន់បុរីរដ្ឋបាលសាលាខេត្តត្បូងឃ្មុំ) នៅថ្ងៃទី ២៨ ខែមេសា ឆ្នាំ ២០២៣ ចាប់ពីម៉ោង ៩:០០ នាទីព្រឹក ដល់ម៉ោង ៣:០០ ម៉ោង រសៀល។
ការបញ្ចៀសចរាចរណ៍មានដូចជា៖ ១. ផ្លូវជាតិលេខ៧ (កែងផ្លូវប្រធាតុស្ពានគីហ្សូណា) ត្រូវបង្វែរចរាចរណ៍ទៅតាមផ្លូវជាតិលេខ ៨ និងតាមផ្លូវពីផ្សារកណ្ដោលជ្រុំ ចេញទៅស្រុកកំចាយមារ ខេត្តព្រៃវែង និង ២. ផ្លូវជាតិលេខ ៧៣ (ឆ្លងតំបន់បុរីរដ្ឋបាលសាលាខេត្តត្បូងឃ្មុំ) ត្រូវបង្វែរចរាចរណ៍ទៅតាម ផ្លូវឆ្លង កាត់តាមស្រុកក្រូចឆ្មារ ចេញទៅតាមស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ៕
.jpg)
