កងកម្លាំងដែល ត្រៀមចូលរួមការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងព្រឹត្តិការណ៍កីឡាស៊ីហ្គេម។ រូបថត នគរបាល
ភ្នំពេញៈ លោកឧត្តមសេនីយ៍ឯក មួង សុធា អគ្គស្នងការរងនគរបាលជាតិ កាលពីថ្ងៃទី ២៧ មេសា បានអញ្ជើញចុះត្រួតពិនិត្យកងកម្លាំងចំណុះនាយកដ្ឋានកណ្តាលនគរបាលយុត្តិធម៌ នាយកដ្ឋាននគរបាលការពារ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ អង្គភាពអន្តរាគម៍ ស្នងការដ្ឋាននគរបាលរាជធានីភ្នំពេញ និងកងរាជអាវុធហត្ថរាជធានីភ្នំពេញ ដែលបានចូលរួមការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងព្រឹត្តិការណ៍កីឡាស៊ីហ្គេម លើកទី ៣២។
បើយោងតាមផេកហ្វេសប៊ុកអគ្គស្នងការដ្ឋាននគរបាលជាតិ នៅក្នុងការចុះត្រួតពិនិត្យកងកម្លាំងនេះ លោកឧត្តមសេនីយ៍ឯក មួង សុធា បានថ្លែងដោយបានធ្វើការណែនាំកងកម្លាំងទាំងអស់ ដែលចូលរួមការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងព្រឹត្តិការណ៍កីឡាស៊ីហ្គេម លើកទី ៣២ ត្រូវគោរពវិន័យ និងបទបញ្ជារបស់ថ្នាក់ដឹកនាំអគ្គស្នងការដ្ឋាននគរបាលជាតិ។
ជាមួយគ្នានេះ លោកឧត្តមសេនីយ៍ទោ ប៉ុល រតនា អនុប្រធាននាយកដ្ឋាននគរបាលព្រហ្មទណ្ឌ បានលើកឡើងថា ព្រឹត្តិការណ៍ប្រកួតកីឡាស៊ីហ្គេម លើកទី ៣២ ដែលកម្ពុជាធ្វើជាម្ចាស់ផ្ទះ គឺជាកិត្តិយស និងកិត្យានុភាព នៃព្រះរាជាណាចក្រកម្ពុជា។
លោកបញ្ជាក់ថា៖ «ដូចនេះក្នុងនាមយើងជាកងកម្លាំងនគរបាលជាតិ ត្រូវតែរួមសហការគ្នាជាមួយកងកម្លាំងសមត្ថកិច្ច និងអាជ្ញាធរពាក់ព័ន្ធ ធ្វើយ៉ាងណារក្សាការពារសន្តិសុខ សណ្តាប់ធ្នាប់ និងសុវត្ថិភាពព្រឹត្តិការណ៍ប្រកួតកីឡាស៊ីហ្គេម លើកទី ៣២ នេះ ឱ្យទទួលបានជោគជ័យ ជាពិសេសការពារឱ្យបានដាច់ខាតសម្រាប់ថ្នាក់ដឹកនាំជាតិ អន្តរជាតិ ប្រតិភូកីឡា និងក្រុមកីឡាករ កីឡាការិនី។
ជាមួយគ្នានេះ លោកប៉ុល រតនា ក៏បានថ្លែងអំណរគុណដល់កងកម្លាំងទាំងអស់ ដែលបានលះបង់ពេលវេលាឃ្លាតឆ្ងាយពីក្រុមគ្រួសារ ដើម្បីបុព្វហេតុជាតិ ខណៈដែលទើបវិលត្រឡប់ពីបំពេញបេសកកម្មរក្សាសន្តិសុខ សណ្តាប់ធ្នាប់ សុវត្ថិភាព ព្រឹត្តិការណ៍អង្គរសង្ក្រាន្ត៕
.jpg)
