ភ្នំពេញៈ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) នឹងរៀបចំវគ្គបណ្តុះបណ្តាលពិសេសដោយឥតគិតថ្លៃស្តីពី “តួនាទីសារព័ត៌មានក្នុងដំណើរការបោះឆ្នោត និងការពង្រឹងតួនាទីសារព័ត៌មានក្នុងបរិបទឌីជីថល” ចាប់ពីថ្ងៃទី ២២ ដល់ ២៣ ខែមិថុនាខាងមុខនេះ។
យោងតាមសេចក្តីជូនដំណឹងរបស់ស.ស.ស.កបានឱ្យដឹងថា វគ្គបណ្តុះបណ្តាលនេះ នឹងត្រូវបានរៀបចំឡើងក្នុងគោលបំណងផ្តល់នូវចំណេះដឹងជាមូលដ្ឋានសំខាន់ៗ សម្រាប់អ្នកសារព័ត៌មាន អ្នកប្រើប្រាស់បណ្តាញសង្គម និងអ្នកត្រៀមខ្លួនចូលរួមសង្កេតការណ៍បោះឆ្នោត ដែលកម្ពុជានឹងរៀបចំបោះឆ្នោតជ្រើសតាំងតំណាងរាស្ត្រនីតិកាលទី ៧ នាថ្ងៃទី ២៣ ខែកក្កដា ឆ្នាំ ២០២៣ ខាងមុខ។
វគ្គបណ្តុះបណ្តាលនេះ ក៏បើកទូលាយសម្រាប់ការចុះឈ្មោះចូលរៀនជូនដល់ មន្ត្រីរាជការ បុគ្គលិកក្រុមហ៊ុន បុគ្គលិកអង្គការសមាគម និងនិស្សិតផងដែរ ដែលមានបំណងបំប៉នចំណេះដឹងបន្ថែម។ វគ្គបណ្តុះបណ្តាលនេះ នឹងឧទ្ទេសនាមដោយវាគ្មិនសរុប ៧ រូប ដែលអញ្ជើញមកពី គណៈកម្មាធិការជាតិរៀបចំការបោះឆ្នោត អ្នកច្បាប់ សាស្ត្រាចារ្យសារព័ត៌មាន និងអ្នកមានបទពិសោធន៍ដឹកនាំលើវិស័យនេះ។ ចំពោះវិញ្ញាបនបត្របញ្ជាក់ការសិក្សា នឹងប្រគល់ជូនសិក្ខាកាមនៅក្រោយពេលបញ្ចប់វគ្គ។
កម្រងមុខវិជ្ជានិងបទឧទ្ទេសនាម ត្រូវបានរៀបចំឡើងក្នុងគោលបំណងចែករំលែកដល់សិកាកាមនូវចំណេះដឹងជាមូលដានដូចតទៅ៖១. ក្រមសីលធម៌សម្រាប់ប្រព័ន្ធផ្សព្វផ្សាយនៅក្នុងដំណើរការបោះឆ្នោត និងក្រមសីលធម៌របស់ អ្នកសង្កេតការណ៍បោះឆ្នោត។ ២. ការត្រៀមខ្លួនរបស់អ្នកសារព័ត៌មានទាក់ទិនការបោះឆ្នោត និងមុំព័ត៌មានសំខាន់ៗទាក់ទិនការបោះឆ្នោត។ ៣. ការចាប់យកឌីជីថលទៅក្នុងការងារព័ត៌មាន ដើម្បីពង្រីកការផ្សព្វផ្សាយ និងអ្វីទៅសុវត្ថិភាព Internet? ៤.ស្វែងយល់ពីការដឹកនាំគ្រប់គ្រងអង្គភាពសារព័ត៌មាន និងការស្វែងរកទីផ្សារ ហិរញ្ញវត្ថុ សម្រាប់ទ្រទ្រង់ អាជីវកម្មសារព័ត៌មាន។ ៥. ស្វែងយល់ពីកិច្ចការអ្នកនាំពាក្យ កិច្ចការសាធារណៈ និងការងារផ្សព្វផ្សាយមហាជន។ ៦. ស្វែងយល់ពីវិធីបង្ការសុវត្ថិភាពសម្រាប់អ្នកសារព័ត៌មានក្នុងពេលចុះបំពេញការងារ, ការយល់ដឹង ជាមូលដ្ឋានរបៀបដោះស្រាយលើសំណុំទាមទារ ការកែតម្រូវខ្លឹមសារផ្សាយ, និងការដោះស្រាយបណ្ដឹង នៅតុលាការ និង៧. តួនាទីសារព័ត៌មាននិងសិទ្ធិបញ្ចេញមតិ នៅក្នុង ដំណើរការប្រជាធិបតេយ្យ, ការកសាងសន្តិភាព, និងការកសាងសង្គមស៊ីវិល័យ។
អ្នកចង់ចូលរួមវគ្គបណ្តុះបណ្តាលពិសេសនេះ អាចចុះឈ្មោះតាមរយៈទូរស័ព្ទលេខ៖ ០៧៧ ៣៣៨ ១៣១ ឬ ០៧៨៧៩៣ ៩៧៤ ឬតាម Facebook: Union of Journalist Federations of Cambodia រហូតផុតកំណត់ការទទួលចុះឈ្មោះត្រឹមថ្ងៃទី ៩ ខែមិថុនា ឆ្នាំ ២០២៣៕
.jpg)
