លោកហ៊ុន សែន ក្នុងពិធីដែលលោកទទួលគោរមងារកិត្តិយស «ពុទ្ធមាមកាភិបាល» និងសញ្ញាបត្របណ្ឌិតកិត្តិយសផ្នែក «មនុស្សសាស្ត្រ និងសាមគ្គីភាព»នៅថ្ងៃទី២ឧសភា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាក់ជាថ្មីថា កម្ពុជានៅតែបន្តប្រកាន់ខ្ជាប់នូវគុណតម្លៃ គុណធម៌ និងទស្សនវិជ្ជារបស់ព្រះពុទ្ធសាសនា ហើយកម្ពុជា ក៏បន្តបើកទូលាយដល់សិទ្ធិសេរីភាពខាងជំនឿសាសនា សម្រាប់ប្រជាជនកម្ពុជាគ្រប់រូប ដូចដែលមានចែងក្នុងរដ្ឋធម្មនុញ្ញកម្ពុជាផងដែរ ក្នុងការលើកកម្ពស់សុខដុមរមនាអន្តរជំនឿ ជាគោលដៅរួមដើម្បីសន្តិភាព និងស្ថិរភាព។
ការលើកឡើងរបស់លោកហ៊ុន សែនដូច្នេះ ធ្វើឡើងក្នុងសុន្ទរកថា នាពិធីដែលលោកទទួលគោរមងារកិត្តិយស «ពុទ្ធមាមកាភិបាល» និងសញ្ញាបត្របណ្ឌិតកិត្តិយសផ្នែក «មនុស្សសាស្ត្រ និងសាមគ្គីភាព» ដែលរៀបចំដោយអង្គការពុទ្ធសាសនិកពិភពលោក និងសកលវិទ្យាល័យជាតិ ណេហ្គរី ប៉ា នារមណីយដ្ឋានវប្បធម៌ និងប្រវត្តិសាស្ត្រវត្តភ្នំ រាជធានីភ្នំពេញ នៅថ្ងៃទី២ ខែឧសភា ឆ្នាំ២០២៣។
លោកហ៊ុន សែន មានប្រសាសន៍ថា៖ «ក្នុងនាមរាជរដ្ឋាភិបាលកម្ពុជា ខ្ញុំព្រះករុណាខ្ញុំសូមបញ្ជាក់សាជាថ្មីថា កម្ពុជានៅបន្តប្រកាន់យកគុណតម្លៃ គុណធម៌ និងទស្សនវិជ្ជាព្រះពុទ្ធសាសនា ហើយប្រជាជនកម្ពុជាទាំងអស់នឹងបន្តទទួលបានសេរីភាពខាងសាសនាដូចដែលមានចែងក្នុងរដ្ឋធម្មនុញ្ញរបស់យើង»។
លោកសង្កត់ធ្ងន់ថា៖ «ព្រះពុទ្ធសាសនាគឺជាមូលដ្ឋាន សម្រាប់ការកសាងសន្តិភាព »។
ជាមួយគ្នានេះ លោកក៏បានអំពាវដល់អង្គការពុទ្ធសាសនិកពិភពលោក ក្រុមប្រឹក្សាវប្បធម៌អាស៊ី និងសហគមន៍ព្រះពុទ្ធសាសនាកម្ពុជា និងអន្តរជាតិ មកពីគ្រប់និកាយ រួមគ្នាសហការជាមួយអង្គការយូណេស្កូ(UNESCO) និងទីភ្នាក់ងារអង្គការសហប្រជាជាតិដទៃទៀត ដើម្បីធ្វើការងារលើកកម្ពស់សុខដុមនីយកម្មអន្តរសាសនាជាតិ និងអន្តរជាតិ ក្នុងវត្ថុបំណងសម្រេចគោលដៅរួមពោលគឺដើម្បីសន្តិភាព និងស្ថិរភាព។
ពាក់ព័ន្ធនឹងបញ្ហានេះ លោក ប៉ា ច័ន្ទរឿន អ្នកជំនាញផ្នែកទស្សនវិជ្ជា និងជាប្រធានវិទ្យាស្ថានប្រជាធិបតេយ្យកម្ពុជា ថ្លែងថា ការលើកឡើងបញ្ជាក់ជាថ្មីរបស់លោកនាយករដ្ឋមន្ត្រីដូច្នេះ ជារឿងល្អមួយ ហើយដែលជាការគោរពដល់រដ្ឋធម្មនុញ្ញឆ្នាំ១៩៩៣ ពាក់ព័ន្ធជំនឿសាសនា។ ប៉ុន្តែលោកថា ការអនុវត្តគុណតម្លៃនៃទស្សនវិជ្ជាព្រះពុទ្ធសាសនានៅក្នុងសង្គមកម្ពុជាជាក់ស្តែងនៅមានចំណុចខ្វះខាតច្រើន។
លោក ប៉ា ច័ន្ទរឿន បញ្ជាក់ថា៖ «នៅសង្គមកម្ពុជាយើងសព្វថ្ងៃ កំពុងប្រឈមមុខនឹងបញ្ហាអសីលធម៌ បញ្ហារំលោភបំពានមួយចំនួន ដែលទិដ្ឋភាពទាំងនេះ ផ្ទុយពីខ្លឹមសារព្រះពុទ្ធសាសនា។ ដូច្នេះដើម្បីឱ្យសង្គមយើងកាន់តែមានភាពសុខដុមរមនា កាន់តែមានការអភិវឌ្ឍបែបបរិយាប័ន្ន ដើម្បីទាំងអស់គ្នា ទាល់តែយើងសិក្សារៀនសូត្រហើយអនុវត្តនូវគោលការណ៍ព្រះពុទ្ធសាសនា»។
លោកបានបន្តថា ទស្សនវិជ្ជាព្រះពុទ្ធសាសនា បានបង្កប់នូវខ្លឹមសារសន្តិភាព និងប្រជាធិបតេយ្យ ដែលមានតម្លៃក្នុងការយកមកអនុវត្ត ហើយលោកអំពាវនាវឱ្យប្រជាជនកម្ពុជាសិក្សាស្វែងយល់ និងអនុវត្តឱ្យបាននូវអត្ថន័យខ្លឹមសាររបស់ព្រះពុទ្ធសាសនា ដើម្បីសន្តិភាពសង្គមពិតប្រាកដ។
សម្រាប់លោក ឈត ប៊ុនថង ប្រធានវិទ្យាស្ថានទំនាក់វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា ក៏បានលើកឡើងដែរថា អ្នកគោរពលទ្ធិព្រះពុទ្ធសាសនានៅកម្ពុជាមានបរិមាណច្រើន ក៏ប៉ុន្តែអ្នកដែលយកដំបូន្មានរបស់ព្រះពុទ្ធ មកអនុវត្តជាក់ស្តែងនៅមានបរិមាណតិចនៅឡើយ។
ចំណែកការអនុវត្តសិទ្ធិសេរីភាពខាងជំនឿសាសនាវិញ លោកថា នៅកម្ពុជាមានភាពប្រសើរឡើងច្រើន គួរឱ្យកត់សម្គាល់ដែលគេឃើញមានការប្រកាន់យកសាសនាផ្សេងៗពីពលរដ្ឋរៀងៗខ្លួន មានភាពសេរី ហើយគេអាចប្រារព្ធពិធីសាសនា ឬជួបជុំសាសនិកបានយ៉ាងទូលំទូលាយ។
លោក ឈត ប៊ុនថង បានបន្ថែមថា៖ «ខ្ញុំគិតថា ទាំងកម្រិតបុគ្គល ស្ថាប័នជាតិ គ្រួសារ សហគមន៍ បើប្រកាន់យកព្រះពុទ្ធសាសនាជាមាគ៌ាជីវិត ជារឿងប្រសើរបំផុតដោយសារក្នុងសាសនានេះឱ្យរម្ងាប់ពៀរ ដោយការមិនចងពៀរ ឱ្យប្រើប្រាស់មធ្យោបាយអហិង្សា ដើម្បីដោះស្រាយបញ្ហា ឱ្យទទួលយកការពិត មិនរំលោភបំពានគ្នាជាដើម»៕
.jpg)
