សេចក្ដីជូនដំណឹងរបស់អាជ្ញាធរជាតិអប្សរានិងគំនូសផ្លូវវាងឱ្យធ្វើចរាចរណ៍ ។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាប្រកាសការបិទចរាចរណ៍និងបង្វែរទិសដៅទស្សនានៅតាមបណ្តាទីតាំងសំខាន់ៗមួយចំនួននៅរមណីយដ្ឋានអង្គរ ដើម្បីរៀបចំព្រឹត្តិការណ៍ប្រកួតស៊ីហ្គេម និងប៉ារ៉ាហ្គេម ដែលកម្ពុជាធ្វើជាម្ចាស់ផ្ទះឆ្នាំ ២០២៣ នេះ ខណៈអាជ្ញាធរអះអាងថា ការផ្អាកបណ្តាគោលដៅទេសចរណ៍មួយចំនួននេះមិនប៉ះពាល់ដល់អាជីវករនៅតំបន់អង្គរឡើយ ហើយការចូលទស្សនានៅប្រព្រឹត្តជាធម្មតា។
ការប្រកាសបិទនេះធ្វើឡើងតាមរយៈសេចក្តីជូនដំណឹងរបស់អាជ្ញាធរជាតិអប្សរានៅថ្ងៃទី៣ ខែឧសភា ឆ្នាំ២០២៣ ដែលជម្រាបជូនដល់សាធារណជន គ្រប់ក្រសួង មន្ទីរស្ថាប័នជាតិ អន្តរជាតិ សមាគមទីភ្នាក់ងារទេសចរណ៍ ម្ចាស់សណ្ឋាគារ ភ្ញៀវទេសចរជាតិ-អន្តរជាតិ ជ្រាបជាដំណឹង។
អាជ្ញាធរជាតិអប្សរាបានបញ្ជាក់ក្នុងសេចក្តីជូនដំណឹងថា៖«ព្រះរាជាណាចក្រកម្ពុជាមានកិត្តិយសដ៏ធំធេងក្នុងការធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅរាជធានីភ្នំពេញ និងតាមបណ្តាខេត្តមួយចំនួន ក្នុងនោះរួមបញ្ចូលផងដែររមណីយដ្ឋានអង្គរ»។
សេចក្តីជូនដំណឹងបន្តថា ដើម្បីឱ្យការរៀបចំព្រឹត្តិការណ៍នេះបានរលូន អាជ្ញាធរសូមណែនាំដល់សាធារណជនឱ្យបានជ្រាបពីការបិទចរាចរណ៍ និងការបង្វែរទិសដៅទស្សនា នៅតាមបណ្តាទីតាំងសំខាន់ៗមួយចំនួនដែលត្រូវរៀបចំការប្រកួតកីឡា។
ទី១ការបិទការចេញចូលបរិវេណមុខប្រាសាទអង្គរវត្តរហូតដល់ខ្លោងទ្វារដៃឆ្នាំង សម្រាប់ការប្រកួតកីឡារត់ម៉ារ៉ាតុង និងដើរប្រណាំង នៅថ្ងៃទី៦ ខែឧសភា ចាប់ពីម៉ោង ៥៖៣០នាទីព្រឹក ដល់ម៉ោង១៨៖០០នាទីល្ងាច។
ទី២ បិទការចូលទស្សនាប្រាសាទអង្គរវត្តតាមច្រកខាងលិច និងបិទការឆ្លងកាត់ទៅទស្សនាតំបន់អង្គរធំនៅថ្ងៃទី១១ ខែឧសភា ដើម្បីរៀបចំវិញ្ញាសាទោចក្រយានបុរស និងនារីចម្ងាយ ៥០គ.ម ប្រព្រឹត្តទៅនៅជុំវិញផ្លូវមុខអង្គរវត្ត ត្រពាំងសេស និងផ្លូវប៉ាវីសអង្គរវត្តចាប់ពីម៉ោង ៦៖០០នាទីព្រឹក ដល់ម៉ោង១៣៖០០នាទីរសៀល ដោយភ្ញៀវទេសចរអាចចូលទស្សនាតាមច្រកខាងកើតប្រាសាទអង្គរវត្ត។
ទី៣ បិទការឆ្លងកាត់បរិវេណវង់ធំ នៅថ្ងៃទី១២ និង១៣ ខែឧសភា ដើម្បីរៀបចំការប្រកួតវិញ្ញាសាកង់គួកបុរសនិងនារីចម្ងាយ ១៧១,៥គម និង ៩៨គ.ម ចាប់ពីម៉ោង ៦៖០០នាទីព្រឹក ដល់ម៉ោង ១៥៖០០នាទីរសៀល។
ពាក់ព័ន្ធនឹងការបិទនិងបង្វែរទិសដៅទស្សនាក្នុងបរិវេណតំបន់អង្គរនេះដែរ លោកឡុង កុសល អ្នកនាំពាក្យអាជ្ញាធរជាតិអប្សរា បានបញ្ជាក់ថា ការបិទនេះដើម្បីចូលរួមការរៀបចំព្រឹត្ដិការណ៍ ប្រកួតកីឡាស៊ីហ្គេមនិងប៉ារ៉ាហ្គេម ដែលកម្ពុជាធ្វើជាម្ចាស់ផ្ទះនៅឆ្នាំនេះ។
លោកបន្តថា៖«ពាក់ព័ន្ធការផ្អាកផ្លូវទស្សនាតំបន់មួយចំនួនហ្នឹង គឺមិនប៉ះពាល់អាជីវករ ឬបរិវេណទេសចរណ៍ក្នុងតំបន់អង្គរនោះទេ ព្រោះយើងបានជម្រាបតាមសេចក្តីប្រកាសនោះដែរ យើងមានជាផ្លូវវាង គាត់អាចអញ្ជើញទៅទស្សនាបាន លើកលែងតែទីកន្លែងដែលយើងត្រូវរៀបចំការប្រកួតកីឡា»។
លោកឡុង កុសល បន្ថែមថា ការចូលទស្សនាកម្សាន្តក្នុងរមណីយដ្ឋានអង្គរ គឺប្រព្រឹត្តទៅជាធម្មតា នៅតាមបណ្តាគោលដៅដែលមិនប្រារព្ធការប្រកួតកីឡាស៊ីហ្គេម និងអាស៊ានប៉ារ៉ាហ្គេម។
គួរបញ្ជាក់ថា កម្ពុជាកំពុងរៀបចំការប្រកួតកីឡាស៊ីហ្គេមលើកទី៣២ ដែលនឹងចាប់ផ្ដើមជាផ្លូវការពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ និងកីឡាអាស៊ានប៉ារ៉ាហ្គេម លើកទី១២ នៅកម្ពុជា ចាប់ផ្ដើមការប្រកួតពីថ្ងៃទី៣-ដល់ថ្ងៃទី៩ ខែមិថុនា ឆ្នាំ២០២៣ ៕
.jpg)
