លោកឌិត ទីណា ក្នុងជំនួបជាមួយអនុរដ្ឋមន្ត្រីកសិកម្មគុយបា។ រូប ក្រសួងកសិកម្ម
ភ្នំពេញៈ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងថា កម្ពុជាត្រៀមខ្លួនរួចជាស្រេច ដើម្បីជួយគាំទ្រប្រទេសគុយបាលើវិស័យកសិកម្ម ទាំងផ្នែកបច្ចេកទេស និងការវិនិយោគជាមួយវិស័យឯកជន។ ទន្ទឹមនឹងនេះលោកឌិត ទីណា បានស្នើភាគីគុយបា ធ្វើការសម្របសម្រួលផ្លូវច្បាប់នានា ដើម្បីឱ្យការវិនិយោគលើវិស័យកសិកម្មមានដំណើរការរលូន និងឆាប់រហ័ស។
លោករដ្ឋមន្ត្រីកសិកម្មបានលើកឡើងបែបនេះ ក្នុងពេលទទួលជួបសម្តែងការគួរសម និងពិភាក្សាការងារជាមួយលោក Maury Hechavarria Bermu''dez អនុរដ្ឋមន្ត្រីក្រសួងកសិកម្ម នៃសាធារណរដ្ឋគុយបា នៅទីស្តីការក្រសួងកសិកម្ម កាលពីថ្ងៃទី ៣ ខែឧសភា ឆ្នាំ ២០២៣។ លោករដ្ឋមន្ត្រីក្រសួងកសិកម្មបន្ថែមថា៖ «លើសពីនេះទៀតភាគីគុយបា អាចពិនិត្យលទ្ធភាពលើការធានា និងផ្តល់សេចក្តីទុកចិត្ត ការផ្តល់ដីសម្បទានសម្រាប់អ្នកវិនិយោគ និងសេរីភាពពាណិជ្ជកម្មនាំចេញនាំចូលក៏ដូចជាធាតុចូល ដែលរួចពន្ធ ព្រមទាំងការចេញចូលរបស់អ្នកវិនិយោគផងដែរ»។
ក្នុងកិច្ចប្រជុំពិភាក្សាការងារនោះ លោក ឌិត ទីណា ក៏បានថ្លែងអំណរគុណចំពោះកិច្ច សហប្រតិបត្តិការល្អ និងទំនាក់ទំនងយូរអង្វែង រវាងប្រទេសទាំង ២ កម្ពុជាគុយបា ដែលកន្លងមកគុយបាបានចូលរួមជួយកម្ពុជាលើការបណ្តុះបណ្តាលធនធានមនុស្ស និងការអភិវឌ្ឍលើគ្រប់វិស័យ ហើយកម្ពុជាក៏ធ្លាប់ជួយគុយបា នៅពេលមានបញ្ហាខ្វះខាតអង្ករ ដើម្បីឱ្យមានចីរភាព និងទាន់ពេលវេលា។
តាមការផ្សាយនៅលើគេហទំព័រក្រសួងកសិកម្ម កាលពីថ្ងៃទី ៣ ខែឧសភា បានឱ្យដឹងថា ស្របតាមអនុសាសន៍របស់លោកនាយករដ្ឋមន្ត្រី ហ៊ុន សែន កម្ពុជាបានប្រែក្លាយពីប្រទេសខ្វះខាតអង្ករទៅជាប្រទេសអ្នកនាំអង្ករចេញ ហេតុនេះ លោកឌិត ទីណា រំពឹងថា គុយបានឹងប្រែក្លាយខ្លួនទៅជាប្រទេសនាំចេញអង្ករ ដូចគ្នា តាមរយៈការប្រើប្រាស់បច្ចេកទេសទំនើប ពូជសុទ្ធល្អ ផ្តល់ទិន្នផលខ្ពស់ ប្រើរយៈពេលខ្លី និងមានរសជាតិឆ្ងាញ់។
ក្នុងកិច្ចការងារលើទំនាក់ទំនងក្នុងវិស័យកសិកម្មជាមួយភាគីប្រទេសផ្សេងៗ នៅព្រឹក ថ្ងៃទី ៣ ខែឧសភា ដដែលនោះ លោកឌិត ទីណានិងថ្នាក់ដឹកនាំក្រសួងកសិកម្ម បានចូលរួមកិច្ច ប្រជុំស្តីពីការការពារគម្រោងដែលស្នើទៅរដ្ឋាភិបាលអាល្លឺម៉ង់ នៅទីស្តីការក្រសួងកសិកម្ម ផងដែរ។ នេះបើតាមគេហទំព័រក្រសួងកសិកម្ម។ ក្នុងកិច្ចប្រជុំនេះ លោករដ្ឋមន្ត្រីកសិកម្មកម្ពុជាបានពិនិត្យលើគម្រោងសំណើចំនួន ១១ ដែលស្នើទៅរដ្ឋាភិបាលអាល្លឺម៉ង់។
ក្នុងនោះក្របខ័ណ្ឌដំណាំកសិកម្មមានចំនួន ៨ គម្រោង ក្របខ័ណ្ឌកៅស៊ូចំនួន ២ គម្រោង និងក្រប ខ័ណ្ឌសុខភាពសត្វនិងបសុព្យាបាលចំនួន ១គម្រោង។
ប្រភពដដែលបានឱ្យដឹងថា ទាក់ទងនឹងការរៀបចំគម្រោងសំណើនេះ លោករដ្ឋមន្ត្រី បានណែនាំដល់ក្រុមការងារត្រូវយកចិត្តទុកដាក់សហការគ្នាឱ្យបានល្អ ធ្វើការវិភាគ និងពិនិត្យឱ្យបានល្អិតល្អន់លើគម្រោងសំណើនេះ ដើម្បីការអនុវត្តមានប្រសិទ្ធភាព និងនិរន្តរភាព ដោយក្នុងនោះត្រូវគិតគូរដល់ហេដ្ឋារចនាសម្ព័ន្ធធនធានមនុស្សដែលមានជំនាញច្បាស់លាស់ ការចុះបញ្ជីពូជ SPS និងត្រូវពិនិត្យលទ្ធភាពបន្ថយចំណាយណាដែលមិនចាំបាច់ដែលកសិករអាចបន្តសកម្មភាពបានពេលគម្រោងបញ្ចប់។
ប្រភពដដែលបានបញ្ជាក់ថា៖ «បើតាម ឯកឧត្តមរដ្ឋមន្ត្រី គឺចង់ជំរុញឱ្យគម្រោងនៃអនុវិស័យសត្វ ដំណាំ និងដំណាំឧស្សាហកម្មទាំង នេះលេចចេញជារូបរាងឡើង តែទោះជាយ៉ាងណាត្រូវពិនិត្យលើការប្រើប្រាស់ថវិកាឱ្យចំទិសដៅឱ្យមានប្រសិទ្ធភាពសេដ្ឋកិច្ច និងមាននិរន្តរភាព ដោយមិនប៉ះពាល់ដល់បរិស្ថាន»៕
.jpg)
