ភ្នំពេញៈ រដ្ឋមន្ត្រីក្រសួងប្រៃសណីយ៍ និងទូរគមនាគមន៏លោក ជា វ៉ាន់ដេត បានជំរុញដល់និស្សិតដែលកំពុងសិក្សាលើជំនាញបច្ចេកវិទ្យាឌីជីថលនៅកម្ពុជា ឱ្យខិតខំសិក្សាស្រាវជ្រាវបន្ថែមទៀត ដើម្បីបង្កើនសមត្ថភាពលើជំនាញបច្ចេកវិទ្យាឌីជីថលឱ្យកាន់តែខ្លាំង ដើម្បីឆ្លើយតបទៅនឹងតម្រូវការបច្ចុប្បន្ន និងអនាគត។
ការជំរុញនេះ ត្រូវបានធ្វើឡើងនៅក្នុងពិធីសំណេះសំណាល ជាមួយនិស្សិតអាហារូបករណ៍ទេពកោសល្យឌីជីថលតេជោឆ្នាំសិក្សា ២០២២-២០២៣ ចំនួន ៣១៤ នាក់ ដែលកំពុងសិក្សាឆ្នាំទី ១ នៅគ្រឹះស្ថានឧត្តមសិក្សាចំនួន ៥ គឺបណ្ឌិត្យសភាបច្ចេកវិទ្យាឌីជីថលកម្ពុជា (CADT) សាកលវិទ្យាល័យភូមិន្ទភ្នំពេញ (RUPP) វិទ្យាស្ថានបច្ចេកវិទ្យាកម្ពុជា (ITC) សាកលវិទ្យាល័យអាមេរិកាំងភ្នំពេញ (AUPP) និងសាកលវិទ្យាល័យអន្តរជាតិផារ៉ាហ្គន (Paragon) កាលពីរសៀលថ្ងៃទី ៣ ខែឧសភា ឆ្នាំ ២០២៣។
នាឱកាសនោះលោក ជា វ៉ាន់ដេត បានឱ្យដឹងថា អាហារូបករណ៍ទេពកោសល្យឌីជីថលតេជោ ដែលនិស្សិតពូកែទាំង ៣១៤ នាក់ ទទួលបាននេះគឺមានតួនាទីសំខាន់ណាស់សម្រាប់អភិវឌ្ឍធនធានមនុស្សឆ្នើម ក្នុងយុគសម័យឌីជីថល ដើម្បីជំរុញកំណើនសេដ្ឋកិច្ច និងលើកកម្ពស់សុខុមាលភាពសង្គមកម្ពុជា។
លោករដ្ឋមន្ត្រីបានបញ្ជាក់ទៀតថា៖ «ក្រោមការយកចិត្តទុកដាក់ដ៏ខ្ពង់ខ្ពស់របស់ សម្តេចតេជោ ហ៊ុន សែន ក្នុងការកសាងធនធានមនុស្សឆ្នើម ក្នុងយុគសម័យឌីជីថល ដើម្បីជំរុញកំណើនសេដ្ឋកិច្ច និងលើកកម្ពស់ សុខុមាលភាពសង្គម សម្តេច បានផ្តល់អាហារូបករណ៍ទេពកោសល្យឌីជីថល ផ្តល់ជូននិស្សិតឆ្នើមដើម្បីបង្កើនសមត្ថភាពធនធានមនុស្សជំនាញបច្ចេកវិទ្យាឌីជីថល ក្នុងការចូលរួមអភិវឌ្ឍសេដ្ឋកិច្ច និងសង្គមឌីជីថល និងរដ្ឋាភិបាលឌីជីថល»។
បន្ថែមពីនេះលោក ជា វ៉ាន់ដេត ក៏បានជំរុញ និងណែនាំដល់និស្សិតទាំងអស់ត្រៀមលក្ខណៈឱ្យបានល្អ ត្រូវផ្តោតការយកចិត្តទុកដាក់រៀនសូត្រឱ្យពូកែ និងខិតខំធ្វើការស្រាវជ្រាវលើជំនាញបច្ចេកវិទ្យាឌីជីថលឱ្យកាន់តែខ្លាំងថែមទៀត។ លោកសង្កត់ធ្ងន់ដូច្នេះថា៖«សូមឱ្យនិស្សិតទាំងអស់ខិតខំស្រាវជ្រាវ ដោយមានការផ្សារភ្ជាប់នឹងការអនុវត្តជាក់ស្ដែងឱ្យបានច្រើនដើម្បីក្លាយជាធនធានមនុស្សឆ្នើមក្នុងវិស័យបច្ចេកវិទ្យាឌីជីថល ហើយក្លាយខ្លួនជាអ្នកដឹកនាំលើវិស័យនេះ»។
ជុំវិញសារៈសំខាន់នៃជំនាញបច្ចេកវិទ្យាឌីជីថលនេះផងដែរ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោក គិន ភា បានលើកឡើងថា ដោយមើលឃើញពីគុណតម្លៃនៃវិស័យឌីជីថលលោកបានជំរុញឱ្យយុវជន ពិសេសសិស្សានុសិស្សកម្ពុជា គួរចាប់យកជំនាញនេះ ពិសេសខិតខំសិក្សាឱ្យច្បាស់ ដើម្បីពង្រឹងសមត្ថភាព ពិសេសទទួលបានឱកាសការងារល្អថែមទៀត។
លោកបន្ថែមថា៖ «ការកសាងធនធានមនុស្សគឺជារឿងសំខាន់បំផុតក្នុងការឈានឆ្ពោះទៅការអភិវឌ្ឍវិស័យបច្ចេកវិទ្យា និងការ អភិវឌ្ឍសេដ្ឋកិច្ចសង្គមកម្ពុជា ដែលចំណុចនេះ គឺទាមទារឱ្យមានការពង្រឹងសមត្ថភាពបន្ថែមលើជំនាញឌីជីថល»។
បើតាមក្រសួងប្រៃសណីយ៍និងទូរគមនាគមន៍ និស្សិតពូកែទាំង ៣១៤ នាក់នេះ គឺជាបេក្ខភាពដែលទទួលបានជយលាភីអាហារូបករណ៍ទេពកោសល្យឌីជីថលតេជោ ក្នុងកម្មវិធីប្រកួតប្រជែងថ្នាក់ជាតិ និងថ្នាក់តំបន់ដែលរួមមាន ពានរង្វាន់បច្ចេកវិទ្យាវាស់ស្ទង់កម្ពស់ទឹកក្នុងកម្មវិធីប្រកួតប្រជែងបច្ចេកវិទ្យារបស់គណៈកម្មការទន្លេមេគង្គ ពានរង្វាន់កម្មវិធីប្រកួត ធុរកិច្ចថ្មីឌីជីថល SmartStart 2023 និងពានរង្វាន់កម្មវិធីប្រកួតរ៉ូបូតថ្នាក់ជាតិ Robocon 2022។
តាមរយៈអាហារូបករណ៍នេះក្រសួងប្រៃសណីយ៍បានបង្ហាញក្តីសង្ឃឹម និងជឿជាក់យ៉ាងមុតមាំថា សិស្សនិស្សិតទាំងនេះនឹងខិតខំរៀនសូត្រ អភិវឌ្ឍចំណេះដឹងរបស់ខ្លួន ដើម្បីចូលរួមចំណែកអភិវឌ្ឍកម្ពុជាឆ្ពោះទៅសម្រេចបានបរិវត្តកម្មឌីជីថលនៅកម្ពុជានាពេលអនាគត៕