មណ្ឌលគិរីៈ ត្មាតភ្លើងជំទង់មួយក្បាលដែលមានរបួសនិងដំបៅធ្ងន់ធ្ងរលើជើងស្តាំត្រូវបានក្រុមការងារអភិរក្សសត្វត្មាតកម្ពុជាជួយសង្គ្រោះកាលពីសប្តាហ៍មុន។ នេះបើតាមហ្វេសប៊ុកអង្គការជីវិតធម្មជាតិនៅកម្ពុជា ដែលបានផ្សព្វផ្សាយនៅថ្ងៃទី ៥ ខែឧសភា ឆ្នាំ ២០២៣ នេះ។
ប្រភពបានឱ្យដឹងថា ការជួយសង្គ្រោះនេះធ្វើឡើង ក្រោមកិច្ចសហការរវាងមជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) សហគមន៍មូលដ្ឋាន មន្ទីរបរិស្ថានខេត្តមណ្ឌលគិរី (PDoE) អង្គការជីវិតធម្មជាតិកម្ពុជា(NLC) និងអង្គការមូលនិធិសកលសម្រាប់ធម្មជាតិប្រចាំកម្ពុជា (WWF Cambodia)។
ប្រភពបញ្ជាក់ថា៖«ត្មាតភ្លើងនេះមានរបួស និងដំបៅក្លាយធ្ងន់ធ្ងរនៅលើជើងខាងស្តាំរបស់វា ហើយមានស្នាមជាំខ្លាំងនៅត្រង់ពោះ។ ដោយការដាក់ថ្នាំឱ្យវាសន្លប់ បសុពេទ្យរបស់យើងបានពិនិត្យពិច័យលើទំហំនៃមុខរបួសរបស់វា ហើយនៅពេលនេះបក្សីនេះកំពុងទទួលការព្យាបាលលើមុខរបួសរបស់វា»។
ប្រភពដដែលបានឱ្យដឹងថា ក្រុមការងារអភិរក្សសត្វត្មាតកម្ពុជា ជាក្រុមការងារសហប្រតិបត្តិការរវាងអង្គការអភិរក្ស និងស្ថាប័នរាជរដ្ឋាភិបាលជាច្រើន ដោយផ្តោតសំខាន់ទៅលើសត្វត្មាតបីប្រភេទមានវត្តមាននៅប្រទេសកម្ពុជា ដែលជាប្រភេទរងគ្រោះថ្នាក់ជិតផុតពូជបំផុត។
ក្រុមការងារអភិរក្សសត្វត្មាតកម្ពុជាបាននឹងកំពុងអង្កេតតាមដានពីការកើនឡើង ឬថយចុះនៃរបាយប្រជាសាស្ត្រសត្វត្មាត ដោយប្រើបច្ចេកទេសរាប់ចំនួនខ្ពស់បំផុតនៃការធ្វើជំរឿនប្រភេទ (highest per species census count) ចាប់តាំងពីឆ្នាំ ២០០៦ មកម្ល៉េះ។
ចំនួនខ្ពស់បំផុតនៃការធ្វើជំរឿនប្រភេទដែលបានកត់ត្រានៅក្នុងឆ្នាំ ២០២២ មានចំនួនសត្វត្មាតភ្លើងត្រឹមតែ ២១ ក្បាលប៉ុណ្ណោះ ត្មាតភ្លើងដែលកំពុងត្រូវបានព្យាបាលស្តារនីតិសម្បទាឡើងវិញនៅ ACCB នាពេលថ្មីៗនេះ ពិតជាមានសារៈសំខាន់ណាស់ចំពោះការរស់រានមានជីវិតនៃប្រភេទនេះ។
តាមរយៈហ្វេសប៊ុកនោះ ក្រុមការងារជួយសង្គ្រោះសត្វត្មាតបង្ហាញក្តីសង្ឃឹមថាបក្សីនេះនឹងជាសះស្បើយដូចដើមវិញទាំងស្រុង ហើយអាចលែងត្រលប់ទៅក្នុងជម្រកធម្មជាតិវិញក្នុងពេលឆាប់ៗនេះ៕
.jpg)
