លោក ជា វ៉ាន់ដេត កាលពីពេលកន្លងមក ។ រូបថត ក្រសួងប្រៃសណីយ៍
ភ្នំពេញៈ ក្នុងពិធីប្រគល់សញ្ញាបត្រនិស្សិតចំនួន ១៣១ នាក់ បានបញ្ចប់ការសិក្សាពីសាកលវិទ្យាល័យអាអាមេរិកភ្នំពេញ (AUPP) កាលពីថ្ងៃទី ៦ ខែឧសភា លោក ជា វ៉ាន់ដេត រដ្ឋមន្ត្រីក្រសួងក្រសួងប្រៃសណីយ៍និងទូរគមនាគមន៍ ជំរុញឱ្យនិស្សិតប្រើប្រាស់ ចំណេះដឹងរបស់ខ្លួនក្នុងផ្លូវត្រូវ ដើម្បីចូលរួមចំណែកអភិវឌ្ឍកម្ពុជាឆ្ពោះទៅសម្រេចបានបរិវត្តកម្មឌីជីថលនាពេលអនាគត។
លោកជា វ៉ាន់ដេត បានលើកឡើងថា ក្នុងការកសាងធនធានមនុស្សឆ្នើមក្នុងយុគសម័យឌីជីថល ដើម្បីជំរុញកំណើនសេដ្ឋកិច្ច និងលើកកម្ពស់សុខុមាលភាពសង្គម រាជរដ្ឋាភិបាលបានផ្តល់អាហារូបករណ៍ទេពកោសល្យឌីជីថលជូននិស្សិតឆ្នើម៣១៤នាក់ ក្នុងឆ្នាំថ្មីនេះដើម្បីបង្កើនសមត្ថភាពធនធានមនុស្សជំនាញបច្ចេកវិទ្យាឌីជីថល ក្នុងការចូលរួមអភិវឌ្ឍសេដ្ឋកិច្ចនិងសង្គមឌីជីថល និងរដ្ឋាភិបាលឌីជីថល។
និស្សិតទាំង៣១៤នាក់នោះកំពុងសិក្សាឆ្នាំទី១នៅគ្រឹះស្ថានឧត្តមសិក្សាចំនួន៥គឺបណ្ឌិត្យសភាបច្ចេកវិទ្យាឌីជីថលកម្ពុជា (CADT) សាកលវិទ្យាល័យភូមិន្ទភ្នំពេញ (RUPP) វិទ្យាស្ថានបច្ចេកវិទ្យាកម្ពុជា (ITC) សាកលវិទ្យាល័យអាមេរិកាំងភ្នំពេញ (AUPP) និងសាកលវិទ្យាល័យអន្តរជាតិផារ៉ាហ្គន (Paragon) ។
លោករដ្ឋមន្ដ្រីបានបញ្ជាក់ថា តាមរយៈការជួបសំណេះសំណាលជាមួយនិស្សិតដែលទទួលបានវិញ្ញាបនបត្របញ្ជាក់ពីការទទួលស្គាល់អាហារូបករណ៍ទេពកោសល្យឌីជីថលតេជោ ទាំង៣១៤នាក់នោះ លោកក៏បានណែនាំដល់និស្សិតឱ្យត្រៀមលក្ខណៈបានល្អ ដោយត្រូវយកចិត្តទុកដាក់រៀនសូត្រឱ្យពូកែនិងស្រាវជ្រាវផ្សារភ្ជាប់នឹងការអនុវត្តជាក់ស្ដែងឱ្យបានច្រើនដើម្បីក្លាយជាធនធានមនុស្សឆ្នើមក្នុងវិស័យបច្ចេកវិទ្យា ឌីជីថល ហើយក្លាយខ្លួនជាអ្នកដឹកនាំលើវិស័យនេះ។
លោកថ្លែងថា៖«ខ្ញុំសង្ឃឹមនិងជឿជាក់យ៉ាងមុតមាំថា ក្មួយៗនឹងខិតខំរៀនសូត្រ អភិវឌ្ឍចំណេះដឹងរបស់ខ្លួន ដើម្បីចូលរួមចំណែកអភិវឌ្ឍកម្ពុជាឆ្ពោះទៅសម្រេចបាន បរិវត្តកម្មឌីជីថល នៅកម្ពុជានាពេលអនាគត» ។
ថ្លែងនៅក្នុងពិធីនោះដែរ លោក Raymond Leos សាកលវិទ្យាធិការរងផ្នែកកិច្ចការសិក្សានៅសាកលវិទ្យាល័យអាមេរិកាំងភ្នំពេញបានលើកឡើងថា អ្វីដែលនិស្សិតត្រូវការបំផុតគឺការអភិវឌ្ឍខ្លួនបន្ទាប់ពីបញ្ចប់ការសិក្សានៅទីនេះពោលគឺ “ភាពច្នៃប្រឌិតនិងការបង្កើតនូវអ្វីដែលថ្មី។
លោកបានបន្ថែមថា៖«ភាពច្នៃប្រឌិតអាចជាការបង្កើតនូវកម្មវិធីកុំព្យូទ័រថ្មី បង្កើតកម្មវិធីទូរស័ព្ទថ្មី បង្កើតប្រភេទអាជីវកម្មថ្មី បង្កើតវិធីថ្មីក្នុងការស្វែងរកទីផ្សារសម្រាប់ផលិតផលឬសេវាកម្ម ការផ្តល់វិធីថ្មីក្នុងការដោះស្រាយបញ្ហាឬផ្តល់វិធីថ្មី ដើម្បីបង្កើត និងចែករំលែកភាពរីកចម្រើន វាអាចជួយឱ្យយើងបង្កើតពិភពលោកដ៏ល្អប្រសើរមួយសម្រាប់ខ្លួនយើង និងអ្នកដទៃ»។
លោកបានបន្ថែមថា លោកមានទំនុកចិត្តលើនិស្សិតបញ្ចប់ការសិក្សាដែលបានរៀបចំនិងត្រៀមខ្លួនជាស្រេចដើម្បីប្រឈមមុខនឹងការប្រកួតប្រជែងនៃភាពច្នៃប្រឌិតនិងការបង្កើតថ្មីដែលជាផ្នែកមួយសម្រាប់ការសម្របខ្លួន និងការរីកចម្រើននៅក្នុងពិភពលោកដែលកំពុងផ្លាស់ប្តូរយ៉ាងឆាប់រហ័សរបស់យើង។
បើតាម លោក Raymond Leos ជាមួយនឹងចក្ខុវិស័យក្នុងការក្លាយជាសាកលវិទ្យាល័យគំរូដើម្បីជួយដល់ប្រទេសកម្ពុជាក្នុងការអភិវឌ្ឍធនធានមនុស្សក៏ដូចជាបណ្តុះបណ្តាលយុវជនជំនាន់ថ្មីដែលជាអ្នកចេះត្រិះរិះពិចារណា អ្នកច្នៃប្រឌិត និងអ្នកដឹកនាំប្រកបដោយក្រមសីលធម៌ ដើម្បីបម្រើប្រទេសកម្ពុជា និងពិភពលោក សាកលវិទ្យាល័យAUPP បានផ្តល់ជូនកម្មវិធីសិក្សាបែបអាមេរិកស្របតាមស្តង់ដាអន្តរជាតិចាប់តាំងពីឆ្នាំ២០១៣ មក ។
លោកបានបន្ថែមទៀតថា AUPP បានសហការជាមួយដៃគូសាកលវិទ្យាល័យនៅសហរដ្ឋអាមេរិកចំនួន២គឺសាកលវិទ្យាល័យ Arizona និងសាកលវិទ្យាល័យ Fort Hays State ហើយមាននិស្សិតជាង៤០០នាក់ហើយដែលបានបញ្ចប់ការសិក្សានៅ AUPP ៕
.jpg)
