ភ្នំពេញៈ ​ក្រសួង​អប់រំ យុវជន និង​កីឡា បាន​ជំរុញ និង​ស្នើ​ឱ្យមាន​ការជួយ​គ្នា​ទៅវិញទៅមក​នៅ​កម្រិត​ថ្នាក់​តំបន់​ក្នុងការ​អភិ​វ​ឌ្ឍ​សមត្ថភាព​សិស្ស​ក្នុង​ផ្នែក​ STEM និង​បច្ចេកវិទ្យា​ព័ត៌មាន​ឱ្យ​កាន់តែខ្លាំង​ថែមទៀត​។ ការ​ជំរុញ​នេះ បានធ្វើ​ឡើង​ក្នុង​កិច្ច​ប្រជុំ​ក្រុមប្រឹក្សា​សហគមន៍​សង្គម​វប្បធម៌​អាស៊ាន​លើក​ទី​២៩​ នៅ​កោះ​បាលី​ប្រទេស​ឥណ្ឌូនេស៊ី​នា​ថ្ងៃទី​ ៨ ឧសភា ឆ្នាំ​ ២០២៣​។​

​កិច្ចប្រជុំ​នេះ​មានការ​ចូលរួម​ពី​សំណាក់​អគ្គលេខាធិការ​អា​ស៊ាន​,​រដ្ឋមន្ត្រី​សហគមន៍​សង្គម​វប្បធម៌​អាស៊ាន​, ឧ​ត្ត​ម​មន្ត្រី​សហគមន៍​សង្គម​វប្បធម៌​អាស៊ាន​និង​គណៈប្រតិភូ​អម​សំខាន់ៗ​ជាច្រើន​។ នេះ​បើតាម​ការ​ប្រ​កាស​របស់​ក្រសួង​អប់រំ​យុវជន និង​កីឡា​។​

​នាឱកាស​នោះ​លោក ណាត ប៊ុន​រឿន រដ្ឋលេខាធិការ ក្រសួង​អប់រំ យុវជន និង​កីឡា និង​ជា​តំណាង​ជាតិ​ក៏បានផ្តល់​អនុសាសន៍​សំ​ខាន់ៗ​ដើម្បី​សម្រេច​«​ទិសដៅ​យុទ្ធសាស្ត្រ​សម្រាប់​ទស្សនវិស័យ​រប​ស់សសរ​ស្ដម្ភ​សហគមន៍​សង្គម​​វប្បធម៌​អា​ស៊ាន ក្រោយ​ឆ្នាំ​ ២០២៥»​។​

​អនុសាសន៍​របស់​ក្រសួង​អប់រំ​កម្ពុជា​រួមមាន ការធ្វើកំណែទម្រង់​វិស័យ​អប់រំ​របស់​កម្ពុជា​, ការអភិវឌ្ឍ​សុខុមាលភាព​សង្គម​សម្រាប់​ប្រជាជន​កម្ពុជា​,​ការ​លើកកម្ពស់​ការអប់រំ​អ្នកជំនាន់ក្រោយ​មកពី​គ្រប់​មជ្ឈដ្ឋាន​ដើម្បី​ទទួលបាន​សមត្ថភាព​ខ្ពស់​និង​ការលើកកម្ពស់​ភាពជា​ដៃគូ​នៃ​វិស័យ​សាធារណៈ និង​ឯកជន​ក្នុង​វិស័យ​អប់រំ​, ការអប់រំ​រួមជាមួយ​សហគ្រិនភាព និង​បច្ចេកវិទ្យា​ឌីជីថល​,​ការបណ្ដុះ​បណ្ដាល និង​ការអប់រំ​បច្ចេកទេស និង​វិជ្ជាជីវៈ​នៅ​កម្រិត​មធ្យមសិក្សា​ជាដើម​។​

​ទន្ទឹមនឹងនេះ​ក្រសួង​ក៏បាន​បញ្ជាក់​ផងដែរ ពី​ការជួយ​គ្នា​ទៅវិញទៅមក​នៅ​កម្រិត​តំបន់​ក្នុងការ​អភិវឌ្ឍ​សមត្ថភាព​សិស្ស​ក្នុង​ផ្នែក​ STEM និង​បច្ចេកវិទ្យា​ព័ត៌មាន និង​ការស្រាវជ្រាវ និង​ការអភិវឌ្ឍ​នៅ​គ្រប់​កម្រិត​រវាង​ប្រទេស​ជា​សមាជិក​អាស៊ាន​ដែលមាន​សារៈសំខាន់​យ៉ាងខ្លាំង​ដើម្បី​ជំរុញ​ដល់​ការប្រកួតប្រជែង​របស់​អាស៊ាន​ក្នុង​ទីផ្សារការងារ​សកល ការកសាង​មជ្ឈមណ្ឌល​ស្រាវជ្រាវ និង​ភាពរឹងមាំ​ក្នុង​តំបន់​អាស៊ាន​។​

​ពាក់ព័ន្ធ​នឹង​ជំនាញ​ផ្នែក​ STEM​ និង​បច្ចេកវិទ្យា​ព័ត៌មាន​នេះ ប្រ​ធាន​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យសភាកម្ពុជា​លោក គិ​ន ភា បាន​លើកឡើងថា ក្នុង​បរិបទ​សម័យ​បច្ចេកវិទ្យា​ឧស្សាហកម្ម​ដូចនេះ ការ​អភិ​វ​ឌ្ឍ​សមត្ថភាព​ផ្នែក STEM និង​បច្ចេកវិទ្យា​ព័ត៌មាន គឺ​យុវជន​ក៏ដូចជា​សិស្ស​និស្សិត​ចាំបាច់​ត្រូវមាន​ដើម្បី​រួមចំណែក​ពេញលេញ​លើ​ការអភិវឌ្ឍ​សេដ្ឋកិច្ច​។​

​លោក​បាន​បញ្ជាក់ថា​៖ «​ការ​ជំរុញឱ្យមាន​ការជួយ​គ្នា​នៅក្នុង​កម្រិត​ថ្នាក់​តំបន់​លើ​ការអភិវឌ្ឍ​ជំនាញ​ផ្នែក​ STEM និង​បច្ចេកវិទ្យា​ព័ត៌មាន​មាន​សារៈសំខាន់​ណាស់ ពីព្រោះ​យើង​មិនអាច​រីកចម្រើន និង​អភិវឌ្ឍ​បានទេ​បើ​ការចូលរួម និង​ការជួយ​គ្នា​នៅមានកម្រិត និង​គម្លាត​គ្នា​»​។​

​លោក គិ​ន ភា បាន​បន្តថា​៖ «​ដូច្នេះ​ការជួយ​គ្នា​ពី​បណ្តា​ប្រ​ទេស​ដែលមាន​ការរីកចម្រើន​ខ្លាំង​លើ​ជំនាញ​ផ្នែក STEM​ និង​បច្ចេកវិទ្យា​ព័ត៌មាន​មកជួយ​ដល់​ប្រទេស​ដែល​មិនទាន់មាន​ការរីកចម្រើន​ខ្លាំង​លើ​ជំនាញ​នេះ គឺជា​រឿង​ចាំបាច់​ដើម្បី​ជំរុញ​ឱ្យ​តំបន់​អាស៊ាន​កាន់​តែមាន​សក្តានុពល និង​ជា​តំបន់​គួរ​ជាទី​ទាក់ទាញ​សម្រាប់​ការវិនិយោគ​ផ្ទាល់​ពី​ប្រទេសក្រៅ​តំបន់​»​។​

​បើតាម​លោក គិ​ន ភា បច្ចុប្បន្ន​នៅ​តំបន់​អាស៊ីអាគ្នេយ៍​មាន​កម្លាំង​ពលកម្ម​យុវជន​វ័យក្មេង​ច្រើន ប៉ុន្តែ​ទាមទារ​ឱ្យមាន​ការពង្រឹង និង​អភិវឌ្ឍ​សមត្ថភាព​ជំនាញ​ STEM និង​បច្ចេកវិទ្យា​ព័ត៌មាន​បន្ថែមទៀត​ដើម្បី​ឆ្លើយ​តប​នឹង​ការអភិវឌ្ឍ​នៃ​បដិវត្តន៍​ឧស្សាហកម្ម​។​

​សូម​បញ្ជាក់ដែរថា មុខវិជ្ជា​ STEM គឺ​ផ្ដោតលើ​ផ្នែក​ជំនាញ​វិទ្យាសាស្ត្រ បច្ចេកវិទ្យា វិស្វករ និង​គណិតវិទ្យា​។ ពាក់ព័ន្ធ​នឹង​មុខវិជ្ជា​នេះ លោក ហង់​ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា ធ្លាប់បាន​លើក​ឡើង​ក្នុង​ពិធី​បើក​មហា​ស្រព​ពិព័រណ៍​វិទ្យាសាស្ត្រ​កម្ពុជា​ប្រចាំឆ្នាំ​លើក​ទី​១៦ កាលពី​ថ្ងៃទី ២៥-២៩ ខែមករា​ថា កាល​ណា​សិស្ស និស្សិត និង​យុវជន​មាន​ជំនាញ​ STEM ​នេះ​ច្បាស់​នឹងធ្វើ​ឱ្យ​ពួកគេ​មានការ​ងារ​ដ៏​ល្អ​ត្រឹមត្រូវ​មួយ និង​រួមចំណែក​ឱ្យ​សង្គម​កម្ពុ​ជាមាន​ភាព​រី​ក​ចម្រើន​ថែមទៀត​៕