.jpg)
លោកសាយសំអាល់ថ្លែងក្នុងពិធីដាក់ឱ្យដំណើរការជាផ្លូវការ«ប្រព័ន្ធគ្រប់គ្រងទិន្នន័យស្រុកយើង»នៅទីស្តីការក្រសួងបរិស្ថាន នាថ្ងៃទី៩ ខែឧសភា។ រូបភាព៖ ក្រសួងបរិស្ថាន
ភ្នំពេញៈ ក្រសួងបរិស្ថានកម្ពុជានិងស្ថាប័នពាក់ព័ន្ធសំខាន់ៗបានប្រកាសដាក់ឱ្យដំណើរការ «ប្រព័ន្ធគ្រប់គ្រងទិន្នន័យស្រុកយើង» ជាផ្លូវការនាថ្ងៃទី ៩ ខែឧសភា ក្រោមវត្តមាន លោក សាយ សំអាល់ រដ្ឋមន្រ្តីក្រសួងបរិស្ថាន និងមានការចូលរួមពីមន្ទីរបរិស្ថានទាំង ២៥ រាជធានី-ខេត្តដៃគូអភិវឌ្ឍន៍រដ្ឋបាលថ្នាក់ក្រោមជាតិ និងអង្គការសង្គមស៊ីវិលមួយចំនួនទៀតផង។
លោកសាយសំអាល់បានឱ្យដឹងថា៖«ប្រព័ន្ធគ្រប់គ្រងទិន្នន័យស្រុកយើងជាឧបករណ៍ដ៏ពិសិដ្ឋជំនួយដល់ការសម្រេចចិត្តឱ្យបានត្រឹមត្រូវនិងរៀបចំគោលនយោបាយប្រកបដោយភាពជាក់ស្តែងទាក់ទងនឹងកិច្ចគាំពារបរិស្ថានការអភិរក្សជីវចម្រុះ ការគ្រប់គ្រងធនធានធម្មជាតិសម្បត្តិធម្មជាតិនិងការរស់នៅដោយចីរភាព»។នេះបើយោងតាមក្រសួងបរិស្ថាន។
លោករដ្ឋមន្រ្តីបានថ្លែងថាគោលបំណងសំខាន់នៃការបង្កើត«ប្រព័ន្ធទិន្នន័យបរិស្ថានស្រុកយើង(CEMIS)»គឺដើម្បីចែករំលែក រក្សាទុក គ្រប់គ្រង និងវិភាគទិន្នន័យ សំដៅជួយពង្រឹងដល់ការរៀបចំផែនការ ការសម្រេចចិត្ត ការតាមដាន និងការគ្រប់គ្រងធនធានធម្មជាតិ និងអភិរក្សជីវចម្រុះ នៅកម្ពុជា។
លោករដ្ឋមន្រ្តីបានបន្តថា ប្រព័ន្ធនេះនឹងគាំទ្រដល់ការអនុវត្តគោលនយោបាយ និងទស្សនវិស័យរបស់ក្រសួងបរិស្ថាន រាជរដ្ឋាភិបាលកម្ពុជា ក៏ដូចជាគាំទ្រដល់គោលនយោបាយ យុទ្ធសាស្ត្រ ផែនការសកម្មភាព របស់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ជាតិ-អន្តរជាតិក្នុងការការពារ គ្រប់គ្រង ធនធានធម្មជាតិ អភិរក្សជីវចម្រុះ ការរៀបចំខ្លួនឆ្លើយតបនឹងការប្រែប្រួលអាកាសធាតុ ការរស់នៅ និងការអភិវឌ្ឍដោយចីរភាព។
ពាក់ព័ន្ធនឹងប្រព័ន្ធនេះដែរ លោកកែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន បានបញ្ជាក់ផងដែរថា «ប្រព័ន្ធគ្រប់គ្រងទិន្នន័យស្រុកយើង» ជាថ្នាលឌីជីថលគ្រប់គ្រងទិន្នន័យផ្លូវការមួយរបស់ក្រសួងបរិស្ថាន ដែលមានវិសាលភាពអនុវត្តន៍នៅថ្នាក់ជាតិ និងថ្នាក់ក្រោមជាតិ។
លោកបានលើកឡើងថា៖«ប្រព័ន្ធនេះមាន៤ផ្នែកសំខាន់ៗដូចជា ផ្នែកទិន្នន័យ ផ្នែកគាំទ្រសេចក្តីសម្រេចចិត្ត ការពង្រឹងសមត្ថភាពមន្ត្រីថ្នាក់ជាតិ និងក្រោមជាតិ និងចំណុចចុងក្រោយគឺការចូលរួម និងកិច្ចសហប្រតិបត្តិរវាងអ្នកពាក់ព័ន្ធ»។
បើតាមក្រសួងបរិស្ថានបានឱ្យដឹងថា«ប្រព័ន្ធគ្រប់គ្រងទិន្នន័យស្រុកយើង» ត្រូវបានរៀបចំឡើងដោយ នាយកដ្ឋានសេវាកម្មព័ត៌មានភូមិសាស្ត្រនៃអគ្គនាយកដ្ឋានចំណេះដឹងនិងព័ត៌មានបរិស្ថាន ដោយបានទទួលនូវការគាំទ្រតាមរយៈ គម្រោង «និរន្តរភាពតំបន់ ទេសភាព និងទេសចរណ៍ធម្មជាតិកម្ពុជា» (CSLEP)។ក្រោមហិរញ្ញប្បទានរបស់ធនាគារពិភពលោក រួមជាមួយនឹងការគាំទ្របច្ចេកទេសពីកម្មវិធីអភិវឌ្ឍន៍សហប្រជាជាតិ(UNDP)បានពង្រីកសក្តានុពល និងវិសាលភាពក្នុងការគ្រប់គ្រងទិន្នន័យដោយធ្វើឱ្យប្រសើរឡើងនូវប្រព័ន្ធប្រមូលផ្តុំ និងគ្រប់គ្រងទិន្នន័យ ព័ត៌មានភូមិសាស្ត្រវិស័យបរិស្ថាន៕
