លោក សោម ពិសិដ្ឋ អភិបាលនៃគណៈអភិបាលខេត្តកែប នៅក្នុងសន្និសីទកាសែតនៅថ្ងៃទី១១ឧសភា។ ហេង ជីវ័ន
កែបៈ រដ្ឋបាលខេត្តកែប បានជំរុញឱ្យបណ្តាក្រុង-ស្រុក ក្នុងខេត្តកែប ធ្វើយ៉ាងណា ពន្លឿនសកម្មភាពការចុះបញ្ជីដីធ្លី ជាលក្ខណៈប្រព័ន្ធជូនប្រជាពលរដ្ឋឱ្យកាន់តែមានប្រសិទ្ធភាពជាងមុន ខណៈថ្នាក់ដឹកនាំខេត្តនេះ បានបង្ហាញការប្តេជ្ញាចិត្តថា នឹងបញ្ចប់លើកិច្ចការងារនេះឱ្យចប់សព្វគ្រប់ត្រឹមឆ្នាំ២០២៣នេះ។
ការប្តេជ្ញា និងជំរុញនេះ បានលើកឡើងនៅក្នុងសិន្និសីទសារព័ត៌មាននៅទីស្តីការគណៈរដ្ឋមន្ត្រី ស្ដីពី “ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តកែប” កាលថ្ងៃទី១១ ខែឧសភា ឆ្នាំ២០២៣។
លោក សោម ពិសិដ្ឋ អភិបាលនៃគណៈអភិបាលខេត្តកែប បានចាត់ទុកការងារចុះបញ្ជីដីធ្លីមានលក្ខណៈជាប្រព័ន្ធថា ពិតជាមានសារៈសំខាន់ណាស់ជាក់ស្តែងក្នុងរយៈពេល៥ឆ្នាំមកនេះ ការចុះបញ្ជីតាមលក្ខណៈជាប្រព័ន្ធនៅទូទាំងខេត្តកែប សម្រេចបានជាង៤ម៉ឺនបណ្ណ។
លោកបានបន្តថា៖ «គិតមកដល់ពេលនេះ ការចុះបញ្ជីដីធ្លីជាលក្ខណៈប្រព័ន្ធនៅទូទាំងខេត្តកែប សម្រេចបានស្ទើរតែគ្រប់ភូមិទៅហើយ យើងនៅតែប្រកាសបិទផ្សាយ និងប្រកាសតំបន់វិនិច្ឆ័យតែ ១ភូមិទៀតប៉ុណ្ណោះ ហើយក្នុងនាមថ្នាក់ដឹកនាំរដ្ឋបាលខេត្ត នឹងខិតខំធ្វើការចុះបញ្ជីដីធ្លីជាលក្ខណៈប្រព័ន្ធឱ្យសម្រេចបាន១០០% នៅក្នុងឆ្នាំ២០២៣នេះ»។
ជាមួយគ្នានេះលោក សោម ពិសិដ្ឋ ក៏បានជំរុញដល់ក្រុមចុះបញ្ជីដីធ្លីនៅក្នុងខេត្តកែប ត្រូវបន្តខិតខំអនុវត្តការងារ និងផ្តល់ការសហការគ្នាឱ្យកាន់តែមានប្រសិទ្ធភាពថែមទៀត ដើម្បីវាស់វែងចេញបណ្ណជូនប្រជាពលរដ្ឋឱ្យបានកាន់តែមានគុណភាព ពិសេសបណ្ណ ដែលនៅសេសសល់ ត្រូវពន្លឿនដើម្បីចែកជូនប្រជាពលរដ្ឋឱ្យបានទាន់ពេលវេលា ដើម្បីអាចឱ្យពួកគាត់អាចប្រើប្រាស់សម្រាប់ផលប្រយោជន៍នានា។
ជាមួយគ្នានោះដែរ លោក សុទ្ធ ពុទ្ធិម៉ានីន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកែប បានថ្លែងថា សមិទ្ធផលទាំងនេះ គឺជាកិច្ចខិតខំប្រឹងប្រែងរបស់មន្ទីរៀបចំដែនដី នគរូបនីយកម្ម សំណង់ និងសុរិយោដីខេត្ត រួមជាមួយមន្រ្តី និងបងប្អូនប្រជាពលរដ្ឋ ប៉ុន្តែចំនួននេះ នៅតែមិនទាន់មានលក្ខណៈគ្រប់ជ្រុងជ្រោយនៅឡើយទេ។
លោកបានបន្តថា ក្រៅពីការចុះបញ្ជីដីធ្លីជាលក្ខណៈប្រព័ន្ធ មន្ទីរក៏នឹងខិតខំជំរុញការងារដោះស្រាយវិវាទដីធ្លីក្រៅប្រព័ន្ធតុលាការ ដោយបានខិតខំធ្វើការសម្របសម្រួលដោះស្រាយករណីទំនាស់ដីធ្លី ជូនប្រជាពលរដ្ឋ និងអ្នកពាក់ព័ន្ធស្របតាមនីតិវិធីច្បាប់ និងលិខិតបទដ្ឋានគតិយុត្តផងដែរ។
បើតាមរបាយការណ៍របស់រដ្ឋបាលខេត្តកែប គិតត្រឹមរយៈពេល៥ឆ្នាំមកនេះ ពោលពីឆ្នាំ២០១៨-២០២២ ពាក់ព័ន្ធនឹងការងារផ្នែកសុរិយោដី ឃើញថា ខេត្តកែប បានសម្រេចការចុះបញ្ជីដីធ្លីលើកដំបូងបានចំនួន ១២៧បណ្ណ,ចុះបញ្ជីបន្តចំនួន ៤ ៦៤៥បណ្ណ, ចុះបញ្ជីតាមលក្ខណៈជាប្រព័ន្ធ បានចំនួន ៤១ ៩៣០បណ្ណ។ ក្រៅពីការចុះបញ្ជីដីធ្លីជាលក្ខណៈប្រព័ន្ធហើយនោះ រដ្ឋបាលខេត្តកែប ក៏បានរៀបចំផែនការប្រើប្រាស់ដីធ្លីគ្រប់ភូមិនៅទូទាំងខេត្ត ពិសេសបានធ្វើប្លង់គោលស្រុកដំណាក់ចង្អើរសម្រេចបាន ១០០% ការកសាងប្លង់ទីប្រជុំជន និងការកសាងផែនទីប្រើប្រាស់ដីធ្លី ព្រំប្រទល់ឃុំ សង្កាត់ និងហេដ្ឋារចនាសម្ព័ន្ធគ្រប់ឃុំ សង្កាត់ថែមទៀត។ ចំណែកឯ ផ្នែកសំណង់វិញខេត្តកែប ក៏បានចេញលិខិតអនុញ្ញាតសាងសង់សំណង់ សណ្ឋាគារ ខុនដូ ផ្ទះសំណាក់ បុរី សំណង់អគារផ្សេងៗ សរុបចំនួន ៦៩គម្រោងផងដែរ។
បើតាមរបាយការណ៍របស់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា គិតចាប់តាំងពីចាប់ផ្តើមអនុវត្ត រហូតដល់ខែវិច្ឆិកា ឆ្នាំ២០២២ អាជ្ញាធរបានចេញបណ្ណកម្មសិទ្ធិ ដីធ្លីដល់ពលរដ្ឋទូទាំងប្រទេសបានចំនួន៦ ៧៣០ ៧៥២បណ្ណ ស្មើនឹង៩៦,២ភាគរយ នៃចំនួនក្បាលដីប៉ាន់ស្មានដំបូង ៧លានក្បាលដី។
កន្លងមក លោក ជា សុផារ៉ា ក៏ធ្លាប់បានណែនាំដល់បណ្តារដ្ឋបាលខេត្តទាំងអស់ ត្រូវពន្លឿនការចុះបញ្ជីក្បាលដីជូនប្រជាពលរដ្ឋនៅទូទាំងប្រទេសឱ្យបានសម្រេច១០០ភាគរយ នៅក្នុងឆ្នាំ២០២៣ ដោយមិនត្រូវពន្យារពេលទៀតទេ៕
.jpg)
