ភ្នំពេញៈ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានជំរុញដល់រដ្ឋលេខាធិការ អនុរដ្ឋលេខាធិការ និងប្រធាននាយកដ្ឋានកសិកម្មចុះសិក្សាអំពីសក្តានុពល និងបញ្ហានៅតាមបណ្តាខេត្តនានាដើម្បីដោះស្រាយបញ្ហាឱ្យកាន់តែមានប្រសិទ្ធភាព។
លោករដ្ឋមន្ត្រីក្រសួងកសិកម្មថ្លែងជំរុញបែបនេះ ក្នុងពេលលោកចូលរួមពិធីប្រកាសចូលកាន់តំណែង រដ្ឋលេខាធិការ អនុរដ្ឋលេខាធិការ និងប្រធាននាយកដ្ឋានកសិកម្ម នៅអគារផ្ការំដួល នៃក្រសួងកសិកម្ម រុក្ខាប្រមាញ់ និងនេសាទកាលពីថ្ងៃទី ១០ ខែឧសភា ឆ្នាំ ២០២៣។
តាមការផ្សាយលើគេហទំព័រក្រសួងកសិកម្មថ្ងៃទី ១១ ខែឧសភា បានឱ្យដឹងថា ក្នុងពិធីប្រកាសចូលកាន់តំណែងរដ្ឋលេខាធិការ អនុរដ្ឋលេខាធិការ និងប្រធាននាយកដ្ឋានកសិកម្ម លោក ឌិត ទីណា បានថ្លែងលើកទឹកចិត្តដល់មន្ត្រីជាន់ខ្ពស់ទាំងនោះឱ្យខិតខំបំពេញការងារប្រកបដោយភាពស្មោះត្រង់ អស់ពីកម្លាំងកាយចិត្ត មិនប្រកាន់ពីតួនាទី និងសហការជាមួយដៃគូពាក់ព័ន្ធ និងអាជ្ញាធរ ដើម្បីលើកកម្ពស់វិស័យកសិកម្មឱ្យកាន់តែរីកចម្រើន។
ប្រភពដដែលបានបញ្ជាក់ថា៖ «ឯកឧត្តមរដ្ឋមន្ត្រី ចង់ឃើញមន្ត្រីក្រោមឱវាទទាំងនោះ ចុះសិក្សានៅតាមបណ្តាខេត្តនានាអំពីសក្តានុពល និងបញ្ហាប្រឈមនានា ដើម្បីដោះស្រាយបញ្ហាឱ្យមានប្រសិទ្ធភាព»។
លោកសាន វណ្ណទី ដែលទើបនឹងកាន់តំណែងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងតំណាងឱ្យមន្ត្រី ដែលទើបតែងតាំងថ្មី បានប្តេជ្ញាចិត្តថា នឹងបន្តសិក្សារៀនសូត្រហើយខិតខំប្រឹងប្រែងបំពេញការងារឱ្យអស់ពីកម្លាំងកាយ កម្លាំងចិត្ត ដោយមិនខ្លាចនឿយហត់ ម៉ឺងមាត់ មានការទទួលខុសត្រូវ និងគណនេយ្យភាព ដើម្បីបង្កើនប្រសិទ្ធភាពការងារនៅក្រសួងកសិកម្ម រុក្ខាប្រមាញ់ និងនេសាទ ស្របតាមចក្ខុវិស័យ របស់រាជរដ្ឋាភិបាលក្នុងការអភិវឌ្ឍវិស័យកសិកម្មនៅកម្ពុជា។
លោកបានបញ្ជាក់ថា៖ «ខ្ញុំនឹងពង្រឹងសាមគ្គីភាព ឯកភាពផ្ទៃក្នុងជាមួយថ្នាក់ដឹកនាំ និងមន្ត្រីក្រោមឱវាទគ្រប់លំដាប់ថ្នាក់ តាមរយៈការពង្រឹងកិច្ចសហប្រតិបត្តិការជាមួយអង្គភាព និងក្រសួងពាក់ព័ន្ធនានាដើម្បីធ្វើឱ្យវិស័យកសិកម្មកាន់តែរីកចម្រើនប្រកបដោយនិរន្តរភាព»។
បន្ថែមលើនេះលោកបញ្ជាក់ទៀតថា នឹងគោរពឋានានុក្រមការងារដោយផ្អែកតាមភារកិច្ចដែលបានបែងចែក អនុវត្តការងារតាមអង្គភាពជំនាញ និងប្រកបដោយវិជ្ជាជីវៈ រួមទាំងគោរពគោលការណ៍ លិខិតបទដ្ឋានគតិយុត្តពាក់ព័ន្ធ និងអនុវត្តភារកិច្ចផ្សេងៗទៀត ដែលថ្នាក់ដឹកនាំប្រគល់ឱ្យផងដែរ។
យោងតាមព្រះរាជក្រឹត្យអនុក្រឹត្យតែងតាំង និងសេចក្តីសម្រេចស្តីពីការបែងចែកភារកិច្ចថ្នាក់ដឹកនាំរបស់ក្រសួងកសិកម្ម រុក្ខាប្រមាញ់ និងនេសាទ ការប្រកាសចូលកាន់តំណែងរដ្ឋលេខាធិការ អនុរដ្ឋលេខាធិការ និងប្រធាននាយកដ្ឋានកសិកម្មសរុបចំនួន ១០ រូបដែលមន្ត្រីជាន់ខ្ពស់ទាំងនោះ ជាក្បាលម៉ាស៊ីនសំខាន់ក្នុងការជួយគ្រប់គ្រង និងដោះស្រាយបញ្ហានានាពាក់ព័ន្ធ នឹងព្រៃឈើ សត្វព្រៃ ជលផល ធនធានមនុស្ស និងផ្នែកកសិកម្ម ជាដើម។
បច្ចុប្បន្នវិស័យកសិកម្ម កម្ពុជាមានសក្ដានុពលជាច្រើនដូចជា ការដាំដុះស្រូវ ម្រេច កៅស៊ូ ស្វាយចន្ទី ចេកជាដើម។
បន្ថែមពីលើនេះមានដំណាំសាកវប្បកម្ម ដំណាំឧស្សាហកម្ម ព្រមទាំងមានការចិញ្ចឹមសត្វដែលមានទាំងជលផលសមុទ្រ និងទឹកសាបផងដែរ។ មិនតែប៉ុណ្ណោះសក្ដានុពលកសិកម្មកម្ពុជាក៏នៅមានព្រៃឈើ សត្វព្រៃ ជីវចម្រុះច្រើនប្រភេទ ដែលអាចទាក់ទាញភ្ញៀវទេសចរទៅលេងកម្សាន្ត និងនាំមកចំណូលមិនចេះរីងស្ងួតផងដែរ។ នេះបើតាមរបាយការណ៍ ការងារកសិកម្ម រុក្ខាប្រមាញ់ និងនេសាទឆ្នាំ ២០២២៕