កែបៈ ថ្នាក់ដឹកនាំខេត្តកែបបានបង្ហាញការប្ដេជ្ញាចិត្ដថានឹងបន្ដប្រែក្លាយខេត្ដជាប់មាត់សមុទ្រមួយនេះឱ្យទៅជាកន្លែងទេសចរណ៍ធម្មជាតិសម្រាប់សម្រាកកម្សាន្តបែបប្រណីតកម្រិតខ្ពស់នាពេលអនាគត។ថ្លែងក្នុងសន្និសីទសារព័ត៌មាន ស្ដីពី "ភាពជោគជ័យក្នុងរយៈពេល ៥ ឆ្នាំកន្លងមក" របស់រដ្ឋបាលខេត្តកែប សន្និសីទសារព័ត៌មាននៅថ្ងៃទី ១១ ខែឧសភា ឆ្នាំ ២០២៣ លោក សោម ពិសិដ្ឋ អភិបាលខេត្តកែបបានលើកឡើងថា ក្រៅពីវិស័យកសិកម្ម នេសាទសមុទ្រ ឧស្សាហកម្ម និងអាជីវកម្មកំពុងជំរុញកំណើនសេដ្ឋកិច្ចរបស់ខេត្ត បច្ចុប្បន្នវិស័យទេសចរណ៍ សេវាកម្ម ក៏កំពុងជួយដល់ប្រជាពលរដ្ឋ និងទាក់ទាញកំណើនទេសចរមកកាន់ខេត្តកែបផងដែរ។
លោកបានថ្លែងថា៖ «ថ្វីដ្បិតតែខេត្តកែប ជាខេត្ត ១ តូច និងមានប្រជាជនតែជាង ៤ ម៉ឺននាក់ តែខេត្តនេះ សម្បូរភោគផលធម្មជាតិ កន្លែងទេសចរណ៍ធម្មជាតិជាច្រើនដែលអាចទាក់ទាញទេសចរជាតិនិងអន្តរជាតិមកទស្សនា។ ជាក់ស្តែងក្នុងរយៈពេល ៥ ឆ្នាំកន្លងមកនេះខេត្តកែបទទួលបានភ្ញៀវទេសចរជាតិនិងអន្តរជាតិមកទស្សនាសរុបជាង ៦ លាននាក់»។
ការលើកឡើងនេះស្របពេលដែលរាជរដ្ឋាភិបាល ក៏ដូចជាក្រសួងទេសចរណ៍បាននិងកំពុងយកចិត្ដទុកដាក់ រួមទាំងអាជ្ញាធរខេត្ដក្នុងការលើកកម្ពស់វិស័យទេសចរណ៍ ក៏ដូចជាការរៀបចំតំបន់ទេសចរណ៍មួយចំនួនឱ្យក្លាយទៅជាសហគមន៍ទេសចរណ៍បែបធម្មជាតិ។
លោក សោម ពិសិដ្ឋ អះអាងថា ផែនការខេត្ត គឺកំពុងខិតខំបង្កើនការវិនិយោគនៅតំបន់ទេសចរណ៍ធម្មជាតិតាមរយៈការដាក់ចេញយុទ្ធសាស្ត្រកែលម្អនិងអភិរក្សតំបន់ធម្មជាតិ សំដៅប្រែក្លាយជាគោលដៅទេសចរណ៍សម្រាកកម្សាន្តបែបប្រណីតកម្រិតខ្ពស់សម្រាប់បម្រើអារម្មណ៍ភ្ញៀវទេសចរ។
លោកបានបញ្ជាក់ថា៖ «ជាយុទ្ធសាស្ត្ររបស់ខេត្ត គឺយើងចង់ឱ្យតំបន់សមុទ្រ ភ្នំ កោះ បាតសមុទ្រ ខេត្តកែប ក្លាយជាគោលដៅទេសចរណ៍ធម្មជាតិសម្រាកកម្សាន្តបែបប្រណីតកម្រិតខ្ពស់ ដែលមានសុខសុវត្ថិភាព ភាពទាក់ទាញ មានភាពប្រកួតប្រជែងក្នុងតំបន់ ពិសេសជាជម្រើសសម្រាប់ទេសចរក្នុងការសម្រាកលម្ហែកាយ»។
ពាក់ព័ន្វនឹងវិស័យទេសចរណ៍នេះដែរ លោក សោម ចិន្តា ប្រធានមន្ទីរទេសចរណ៍ខេត្តកែប បានឱ្យដឹងដែរថា ខេត្តកែបមានកោះចំនួន ១២ ថ្មប៉ប្រះទឹក ១ កន្លែង ថ្មដុះស្ងួត ១ កន្លែង និងមានផ្ទៃសមុទ្រដ៏ទាក់ទាញ ដែលបានជួយទាញកំណើនទេសចរមកកាន់ខេត្តផងដែរ។ ដើម្បីជំរុញវិស័យទេសចរណ៍ ក្នុងនាមមន្ទីរលោកនឹងខិតខំពង្រីកការរៀបចំរមណីយដ្ឋាន ទីប្រជុំជន និងទីក្រុងស្អាត សេវាល្អ ឱ្យកាន់តែទទួលបានទំនុកចិត្តពីភ្ញៀវទេសចរថែមទៀត។
បើតាមរបាយការណ៍របស់រដ្ឋបាលខេត្តកែប បានបង្ហាញថា បច្ចុប្បន្នខេត្តកែប មានទាំងតំបន់ទេសចរណ៍ធម្មជាតិ ដែលបានទាក់ទាញកំណើនភ្ញៀវទេសចរជាតិនិងអន្តរជាតិមកទស្សនាជារៀងរាល់ឆ្នាំ។ ក្នុងនោះរួមមានព្រៃកោងកាង ៣ កន្លែងមានផ្ទៃក្រឡា ១ ០០៥ ហិកតា ស្មៅសមុទ្រ ៣ ០៩៥ ហិកតា ផ្កាថ្ម ៥២,៥ ហិកតា និងមានធនធានធម្មជាតិមានត្រីផ្សោត ជ្រូកទឹក អណ្តើកសមុទ្រ ត្រីសេះ ក្តាមសេះ ដែលមានរសជាតិឆ្ងាញ់ ធនាគារក្ដាម ៤ កន្លែង ទូកនេសាទ ៧២៨ គ្រឿង និងឧទ្យានជាតិកែបមានទំហំ ១ ១៥២ ហិកតា។
នៅទូទាំងខេត្តកែប គឺមានសណ្ឋាគារចំនួន ១៧ ផ្ទះសំណាក់ចំនួន ៥៨ បឹងហ្គាឡូ រីសតចំនួន ២១ អាហារដ្ឋាន និងភោជនីយដ្ឋានចំនួន ៣៤ ស្ប៉ាសូណានិងម៉ាស្សាចំនួន ៣ ខារ៉ាអូខេចំនួន ៨ ក្លិបកម្សាន្តចំនួន ១ មណ្ឌលព័ត៌មានទេសចរណ៍ចំនួន ៣ និងទូកដឹកភ្ញៀវទេសចរចំនួន ១៦។
ក្នុងរយៈពេល ៥ ឆ្នាំមកនេះភ្ញៀវទេសចរដែលបានមកសម្រាកលម្ហែនៅខេត្តកែបសរុប ៦ ៧០៤ ០៣៥ នាក់ ក្នុងនោះភ្ញៀវជាតិ ៦ ៥៥១ ២៣១ នាក់ ភ្ញៀវអន្តរជាតិ ១៥២ ៨០៤ នាក់។ ក្រៅពីនោះខេត្តក៏បានបង្កើតសហគមន៍អេកូទេសចរណ៍ រមណីយដ្ឋានទេសចរណ៍ភ្នំសសៀរនិងផ្លូវបេតុងក្រវាត់ជុំវិញភ្នំកែបធំក្នុងតំបន់ឧទ្យានជាតិ ក្រោមការជួយឧបត្ថម្ភពីលោកសាយ សំអាល់ រដ្ឋមន្ត្រីក្រសួងបរិស្ថានផងដែរ៕