ទិដ្ឋភាពគ្រោះថ្នាក់ចរាចរណ៍នៅខេត្តកំពង់ចាមកាលពីថ្ងៃទី១៤ ឧសភា ។ រូបថត សហការី
កំពង់ចាមៈយ៉ាងហោចណាស់មនុស្ស ៤ នាក់ស្លាប់ រីឯ ៤ នាក់ផ្សេងទៀតរងរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍រវាងរថយន្ត និងរថយន្តកែច្នៃ (ថាឡេថង) នៅភូមិតាម៉ៅ ឃុំស្រក ស្រុកកំពង់សៀម ខេត្តកំពង់ចាម ថ្ងៃទី ១៤ ខែឧសភា។
លោក សឿន សារ៉ាវុធ នាយប៉ុស្តិ៍នគរបាលរដ្ឋបាលស្រក ស្រុកកំពង់សៀម បានឱ្យដឹងថា ចំពោះហេតុការណ៍គ្រោះថ្នាក់ចរាចរណ៍នេះ នៅមុនពេលកើតហេតុគេឃើញរថយន្តnissanbrontierពណ៌ប្រផេះបើកបរពីកើតទៅលិចក្នុងល្បឿនលឿន។លុះពេលមកជិតដល់ចំណុចកើតហេតុរថយន្តនោះមិនបានបង្អង់ទេហើយថែមទាំងបានបង្កើនល្បឿនជែងរថយន្ត១គ្រឿងទៀត ពេលជែងផុតដោយសារល្បឿនលឿនពេកក៏បានរេចង្កូតបុកទៅរថយន្តកែច្នៃ(ថាឡេថង)ពេញទំហឹងតែម្តង។
លោកបន្តថា រថយន្តបង្កម៉ាក nissanbrontierពណ៌ប្រផេះ ពាក់ស្លាកលេខ ភ្នំពេញ 2AN-9962 បើកបរដោយបុរសម្នាក់ ឈ្មោះព្រំ គឹមនាង អាយុ៣២ឆ្នាំ មានលំនៅក្នុងភូមិព្រែកព្រះអង្គ ឃុំព្រែកបាក់ ស្រុកស្ទឹងត្រង់ ខេត្តកំពង់ចាម ធ្វើដំណើររួមជាមួយគ្រសារដែលមានប្រពន្ធនិងកូន២នាក់មិនមានរងរបួសធ្ងន់ទេ។ ដោយឡែក រថយន្តកែច្នៃជិះគ្នា៨នាក់ ស្លាប់៤នាក់ ស្រី៣ ប្រុស១និង៤នាក់ផ្សេងទៀតរងរបួសធ្ងន់។អ្នកទាំង៨នាក់រស់នៅភូមិដូនទរ ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម។
លោកថ្លែងថា៖«ម្ចាស់រថយន្តបង្កយើងបានអញ្ជើញគាត់មកអធិការដែរ ហេតុនេះលោកអាចទាក់ទងសួរទៅលោកអធិការតែម្តងទៅ ព្រោះខាងប៉ុស្តិ៍នគរបាលយើងអត់បានសួរនាំទេ យើងគ្រាន់តែទាក់ទងទៅជំនាញ ហើយជំនាញជាអ្នកសួរនាំ»។
លោកឯក ប៉ាន់ដន អធិការនគរបាលស្រុកកំពង់សៀមបានឱ្យដឹងនៅថ្ងៃទី១៥ ខែឧសភាថា ក្រោយទទួលបានព័ត៌មានលោកបានបញ្ជូនកម្លាំងចុះទៅកន្លែងកើតហេតុដើម្បីសម្រួលចរាចរណ៍និងធ្វើការវាស់វែង។អ្នកស្លាប់ត្រូវបានប្រគល់ទៅក្រុមគ្រួសារយកទៅធ្វើបុណ្យតាមប្រពៃណី ចំណែកអ្នករបួសបញ្ជូនទៅកាន់មន្ទីរពេទ្យ។ លោកបន្តថា ចំពោះបញ្ហាគ្រោះថ្នាក់ចរាចរណ៍នេះលោកនៅមិនទាន់ទទួលបានរបាយការណ៍លម្អិតនៃការវាស់វែងនៅឡើយ ខណៈសមត្ថកិច្ចកំពុងសាកសួរអ្នកបើកបរថយន្តបង្ក។
លោកថ្លែងថា៖«ខ្ញុំអត់ទាន់ហ៊ាននិយាយទេ ព្រោះមិនទាន់មានលទ្ធផលវាស់វែង យើងអត់ទាន់អាចដាក់កំហុសទៅខាងណាទេ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា ថ្លែងនៅថ្ងៃទី១៥ ខែឧសភាថា វិធានការចម្បងក្នុងការកាត់បន្ថយគ្រោះថ្នាក់ចរាចរណ៍គឺការអនុវត្តច្បាប់ដើម្បីឆ្លើយតបនឹងឥរិយាបថរបស់អ្នកបើកបរលើដងផ្លូវ។ការអនុវត្តច្បាប់នេះទៀតសោតត្រូវតែធ្វើឱ្យបានទូលំទូលាយ ម៉ឺងម៉ាត់ ទាំងថ្ងៃទាំងយប់ និងប្រកបដោយតម្លាភាព និងត្រឹមត្រូវ។ លោកបានបញ្ជាក់ថា ជាក់ស្តែងការអនុវត្តច្បាប់បានល្អគ្រោះថ្នាក់ចរាចរណ៍មានការថយចុះគួរឱ្យកត់សម្គាល់នៅឆ្នាំ២០១៦និងឆ្នាំ២០២០។
លោកថ្លែងថា៖«ខ្ញុំនៅតែមានការលើកទឹកចិត្តឱ្យមានការរឹតបន្ដឹងការអនុវត្តច្បាប់ឱ្យបានខ្លាំង ទូលំទូលាយ គ្រប់កន្លែង កុំឱ្យយើងធ្វើតែខេត្តនេះហើយយើងអត់បានធ្វើក្នុងខេត្តនោះ ឬក៏ធ្វើដែរតែធ្វើតិចតួច យើងនៅតែឃើញបើខេត្តនេះថយ ខេត្តនោះកើន អ៊ីចឹងវាអត់ស្របតាមគោលដៅរបស់យើង»។
នាយកអង្គការមូលនិធិបង្ការរបួសអាស៊ីប្រចាំនៅកម្ពុជាលើកឡើងថា ក្រៅពីការអនុវត្តច្បាប់ក៏នៅមានវិធានការផ្សេងៗទៀត ដូចជាការផ្សព្វផ្សាយអប់រំ ការកែលម្អរចនាសម្ព័ន្ធ បំពាក់ស្លាកសញ្ញាគំនូសសញ្ញាចរាចរណ៍ ដាក់ភ្លើងបំភ្លឺឱ្យបានសមរម្យនៅកន្លែងដែលមានការប្រឈមខ្ពស់ និងការពង្រឹងសុវត្ថិភាពយានយន្ត ព្រមទាំងការផ្តល់ជំនួយសង្គ្រោះបន្ទាន់ដល់ជនរងគ្រោះ។
បើតាមលោក គឹម បញ្ញា បន្ថែមលើនេះការផ្សព្វផ្សាយអប់រំពីសុវត្ថិភាពចរាចរណ៍ផ្លូវគោកធ្វើឡើងជាមួយក្មេងៗមានប្រសិទ្ធភាពជាងធ្វើជាមួយមនុស្សពេញវ័យព្រោះអ្នកបើកបរ១មួយចំនួនធ្វើតាមទម្លាប់និងមិនសូវចូលរួមអនុវត្តច្បាប់ទេ។ លោកបន្ថែមថា ការបញ្ជ្រាបការយល់ដឹងនៅតាមសាលាបឋមសិក្សាជាការបណ្តុះគំនិតនិងទម្លាប់ពីក្មេងហេតុនេះនៅពេលពួកគាត់ធំឡើងនឹងមានទម្លាប់គោរពច្បាប់កាន់តែល្អ៕
.jpg)
