លោក ប៉ុក ប៉ាន់ នៅក្នុងសិក្ខាសាលាថ្នាក់ជាតិ ស្តីពីការប្រឹក្សាការងារនិងការណែនាំសម្រាប់ថ្នាក់ដឹកនាំ និងអ្នកសម្របសម្រួលកម្មវិធី BEEP ដែលរៀបចំឡើងនៅទីស្តីការក្រសួងការងារចាប់ពីថ្ងៃទី១៥ដល់១៦ ខែឧសភានេះ។ រូបថត ក្រសួងការងារ
ភ្នំពេញៈក្រសួងការងារ និងបណ្តុះបណ្តាលវិជ្ជាជីវៈបានស្នើសុំដៃគូអភិវឌ្ឍន៍ពិនិត្យលទ្ធភាពជួយដោះស្រាយសេវាអ៊ីនធឺណិតឱ្យបានទូលំទូលាយ និងផ្តល់កុំព្យូទ័របន្ថែម ដើម្បីពង្រឹងប្រព័ន្ធអប់រំយុវជន ដែលបាត់បង់ឱកាសសិក្សា និងអ្នករវល់ការងារ ពុំមានពេលសិក្សាពេញលេញឱ្យកាន់តែល្អប្រសើរឡើងដើម្បីបញ្ចប់ការអប់រំមធ្យមសិក្សាបឋមភូមិ។
ការស្នើសុំនេះ ត្រូវបានធ្វើឡើងដោយ លោក ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ក្នុងសិក្ខាសាលាថ្នាក់ជាតិស្តីពីការប្រឹក្សាការងារ និងការណែនាំសម្រាប់ថ្នាក់ដឹកនាំ និងអ្នកសម្របសម្រួលកម្មវិធី «កម្មវិធីសមមូលអប់រំកម្រិតមូលដ្ឋានតាមប្រព័ន្ធអ៊ីនធើណិត (BEEP)» ដែលរៀបចំឡើងនៅទីស្តីការក្រសួងការងារ ចាប់ពីថ្ងៃទី១៥ដល់១៦ ខែឧសភា។
យោងតាមក្រសួងការងារបានឱ្យដឹងថា៖«ឯកឧត្តមរដ្ឋលេខាធិការ[ប៉ុក ប៉ាន់] ក៏បានស្នើសុំដៃគូអភិវឌ្ឍន៍ ពិនិត្យលទ្ធភាពជួយដោះស្រាយសេវាអ៊ីនធើណិតឱ្យបានទូលំទូលាយ ជួយផ្តល់កុំព្យូទ័រលើតុ និងកុំព្យូទ័រចល័តបន្ថែម ដើម្បីសម្រួលដល់ការសិក្សារបស់សិស្ស ជួយពង្រឹងប្រព័ន្ធសិក្សារបស់កម្មវិធី BEEP កាន់តែល្អប្រសើរឡើង និងជួយគាំទ្រប្រឹក្សាណែនាំបន្ថែមដល់អ្នកពាក់ព័ន្ធអំពីកម្មវិធី BEEP»។
លោករដ្ឋលេខាធិការបានថ្លែងថា រាជរដ្ឋាភិបាលកម្ពុជា និងដៃគូសហប្រតិបត្តិការបានបង្ហាញការកត់សម្គាល់ថា «កម្មវិធីសមមូលអប់រំកម្រិតមូលដ្ឋានតាមប្រព័ន្ធអ៊ីនធើណិត (BEEP)» គឺជាកម្មវិធីគំរូមួយក្នុងការស្ដារបង្កើនចំណេះដឹង និងជំនាញបច្ចេកទេស និងវិជ្ជាជីវៈសម្រាប់យុវជនដែលបាត់ឱកាសសិក្សា និងអ្នករវល់ការងារពុំមានពេលសិក្សាពេញលេញ។
លោក ប៉ុក ប៉ាន់ បានថ្លែងបន្តថា ជាមួយនឹងការវិវឌ្ឍនៃបច្ចេកវិទ្យារបស់សកលលោក គឺតម្រូវឱ្យមានការបណ្តុះបណ្តាលផ្ទាល់ ឬពីចម្ងាយ (Online) ដូចជាកម្មវិធី BEEP នេះ ជាដើម។ BEEP ផ្តល់នូវការអប់រំដែលមានភាពបត់បែនតាមបែបឌីជីថលសម្រាប់យុវជនដែលបោះបង់ការសិក្សា ដើម្បីបញ្ចប់ការអប់រំមធ្យមសិក្សាបឋមភូមិសមមូលនឹងថ្នាក់ទី៩។ BEEP អាចសិក្សាបានតាមរយៈកុំព្យូទ័រ ឬស្មាតហ្វូនគ្រប់កាលៈទេសៈ ដែលមិនប៉ះពាល់ម៉ោងធ្វើការរបស់ពួកគេ។
លោកបានថ្លែងថា៖«កម្មវិធីសិក្សា BEEP បានការជួយសម្របសម្រួលពិសេសមួយរវាងក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ ហើយឥឡូវនេះកម្មវិធីបានក្លាយជាកម្មវិធីគំរូសម្រាប់ក្រសួងទាំង២»។
បើតាមលោកប៉ុក ប៉ាន់ បច្ចុប្បន្នមណ្ឌលសិក្សា BEEP សរុបមានចំនួន២៤ទីតាំង។ ក្នុងនោះស្ថិតនៅក្រោមក្រសួងការងារចំនួន១២ មណ្ឌល និងក្រោមក្រសួងអប់រំចំនួន១២មណ្ឌល ដែលមានសិស្សចុះឈ្មោះចូលរៀនសរុបចំនួន ២ ០០០នាក់(ស្រី៦៧៧នាក់) និងសិស្សប្រឡងជាប់ជាស្ថាពរសរុបចំនួន៨៤៣នាក់(ស្រី២៥០នាក់)។
លោកបន្តថា ការបញ្ចប់វិញ្ញាបនបត្រ BEEP អាចឱ្យសិក្ខាកាមបង្កើនចំណេះដឹង និងអាចបន្តការសិក្សាជំនាញបណ្តុះបណ្តាលបច្ចេកទេស និងវិជ្ជាជីវៈ និងទទួលបានឱកាសការងារសមរម្យ។ នេះបើយោងតាមប្រភពដដែលនេះ។
លោកសារដារ អ៊ូម៉ារ អាឡាំ (Sardar Umar Alam) តំណាងអង្គការយូណេស្កូប្រចំាប្រទេសកម្ពុជា និងលោកស្រីណាដ្យា អូតទីហ្កឺរ (Nadia Ottiger) អនុប្រធានទីភ្នាក់ងារស្វ៊ីសសម្រាប់ការអភិវឌ្ឍ និងសហប្រតិបត្តិការ (SDC)ក៏មានវត្តមានក្នុងសិក្ខាសាលានេះដែរ។ នេះបើយោងតាមប្រភពដដែល។
មណ្ឌលសិក្សា BEEP ដំបូងនៅកម្ពុជា ត្រូវបានបើកដំណើរការជាផ្លូវការកាលខែកុម្ភៈឆ្នាំ២០១៩។ ការអនុវត្តកម្មវិធីនេះត្រូវបានផ្ដល់មូលនិធិ និងគាំទ្រពីអង្គការយូណេស្កូប្រចាំនៅកម្ពុជា ទីភ្នាក់ងារស្វ៊ីស SDC ព្រមទាំងក្រុមហ៊ុនទូរស័ព្ទស្មាត (Smart Axiata)។
កម្មវិធី BEEP នេះ មានគោលបំណងផ្តល់ការបណ្តុះបណ្តាល និងកសាងសមត្ថភាពថ្មីៗបន្ថែមដល់យុវជនដែលបាត់បង់ឱកាសសិក្សា និងអ្នកដែលកំពុងបម្រើការងារនៅតាមសហគ្រាស-គ្រឹះស្ថានដែលពុំមានពេលវេលា ឬឱកាសសិក្សាបន្ត ហើយមានបំណងចង់បន្តការសិក្សា៕
