ការបង្រៀនសិស្សរបស់អង្គការតុកកែញញឹមកម្ពុជានៅខេត្តកំពង់ឆ្នាំងកន្លងមក ។ រូបថត Smiling Gecko Cambodia
កំពង់ឆ្នាំងៈ ស្ថិតនៅក្នុងភូមិស្រែសារ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ដែលជាអតីតតំបន់សង្គ្រាមសម្បូរប្រជាជនក្រខ្សត់ តែទីនោះហើយជាទីតាំងដែលអង្គការ «តុកកែញញឹមកម្ពុជា» ឬ «Smiling Gecko» បោះទីតាំងលើផ្ទៃដីប្រមាណ ១៥០ ហិកតា ក្នុងបេសកកម្មផ្ដល់ឱកាសដល់ក្មេងជំនាន់ក្រោយ កែប្រែវាសនាកុមារក្នុងតំបន់នោះ ឬផលិតធនធានមនុស្សដ៏សំខាន់សម្រាប់កម្ពុជាទៅថ្ងៃអនាគត។
នៅទីនោះគឺជាគម្រោងកញ្ចុំ ដែលផ្ដោតលើការអភិវឌ្ឍវិស័យជាច្រើន ដូចជា ការអប់រំ ផ្ដល់ជូនសាលារៀនស្តង់ដាកម្រិតខ្ពស់ដែលមានកុមារកំពុងសិក្សាប្រមាណជិត ៤០០ នាក់, កិច្ចការបណ្ដុះបណ្ដាលសម្រាប់មនុស្សពេញវ័យដែលមានរោងជាងឬសិប្បកម្មកែច្នៃ,គម្រោងកសិកម្មសម្រាប់មនុស្សចាស់ដែលមានការជំនួយផ្នែកបច្ចេកទេស និងវិស័យបដិសណ្ឋារកិច្ចតាមរយៈអេកូរីសត Farmhouse resort ជាដើម។
លោកស្រី Barbara Beaufait នាយិកានៃសាលា SGC HISF Education Campus ដែលស្ថិតក្រោមគម្រោងរបស់អង្គការតុកកែញញឹមកម្ពុជា បានរៀបរាប់ថា ក្មេងៗដែលមកសិក្សានៅទីនេះនឹងទទួលបានការមើលថែគ្រប់បែបយ៉ាងចាប់តាំងពីឯកសណ្ឋាន ការរក្សាអនាម័យខ្លួនប្រាណ សេវាវេជ្ជសាស្ត្រ ការសង្គ្រោះបឋម និងការផ្តល់អាហារ ពេញ ១ ថ្ងៃ រួមទាំងអាហារសម្រន់។
លោកស្រីបញ្ជាក់ថា៖ «ការចាប់ផ្តើមថ្ងៃថ្មី ពួកគេមានសម្លៀកបំពាក់ពីផ្ទះ និងឯកសណ្ឋានសាលា ពួកគេត្រូវទៅងូតទឹក បន្ទាប់ពីងូតទឹករួច យើងមានការសិតសក់ កាត់ក្រចកដៃ ពិនិត្យមើលគ្រប់យ៉ាងឱ្យប្រាកដថាមិនអី បន្ទាប់ពីងូតទឹក ពួកគេក៏ទៅញ៉ាំអាហារពេលព្រឹក បន្ទាប់មកយើងមានអាហារថ្ងៃត្រង់ និងអាហារសម្រន់មួយផ្សេងទៀតនៅសាលានាពេលរសៀល» ។
លោកស្រី នាយិកា ក៏បានបន្តឱ្យដឹងដែរថា នៅពេលរៀនចប់ពួកគេត្រឡប់ទៅផ្ទះវិញ ប៉ុន្តែអង្គការតែងផ្តល់អ្វីៗគ្រប់យ៉ាងដែលពួកគេមិនមាន ព្រោះក្មេងដែលឃ្លានមិនមានសុខភាពល្អទេ ហើយពេលពួកគេប្រឈមភាពឈឺចាប់ពួកគេមិនអាចសិក្សាបានឡើយដូច្នេះហើយលោកស្រីថាគ្រប់គ្នានៅទីនេះធ្វើអ្វីគ្រប់យ៉ាងដើម្បីឱ្យពួកគេរួចរាល់សម្រាប់ការសិក្សា។
បន្ថែមពីលើនេះ លោកស្រី Barbara Beaufait ក៏បានឱ្យដឹងទៀតថា៖ «នៅទីនេះ៣ឆ្នាំដំបូងគឺថ្នាក់មត្តេយ្យដែលបង្រៀនជាភាសាអង់គ្លេសតែយើងក៏មានការណែនាំបន្តិចបន្តួចពីភាសាខ្មែរនៅក្នុងថ្នាក់មត្តេយ្យដើម្បីឱ្យពួកគេត្រៀមខ្លួនសម្រាប់ការរៀនលាយបញ្ចូលគ្នានៅថ្នាក់ទី១ ហើយចាប់ពីថ្នាក់ទី១ឡើង កម្មវិធីសិក្សាយើងបង្រៀនជាភាសាខ្មែរ ភាសាអង់គ្លេស និងគណិតវិទ្យា»។
បើតាមលោកស្រី Barbara Beaufait បច្ចុប្បន្ននេះ សាលា SGC HISF Education Campus មានកូនសិស្សក្បែរ៤០០នាក់ ហើយជារៀងរាល់ឆ្នាំ លោកស្រីនឹងយកសិស្សបន្ថែមចំនួន៥០នាក់ទៀត រហូតឈានដល់ទំហំអតិបរមានៃសាលាដែលមានកុមារ១ពាន់នាក់។
លោកស្រី Barbara បញ្ជាក់ថា ៖ «ក្មេងៗនៅទីនេះមិនមានភាពភ័យខ្លាចទេ ពួកគេសប្បាយចិត្តនៅទីនេះ គ្រប់គ្នាមកសាលារៀន យើងបានធ្វើឱ្យពួកគេរំភើបទាំងអស់គ្នាគឺចង់មកសាលា ហើយចំពោះវត្តមានវិញការចូលរួមគឺជិត១០០ភាគរយ លើកលែងតែករណីពួកគេឈឺប៉ុណ្ណោះ»។
ចំណែកឯកញ្ញា ធារី ដែលជាជំនួយការគ្រប់គ្រងរោងឈើវិញ បានឱ្យដឹងថា រោងឈើក្នុងគម្រោងរបស់អង្គការតុកកែញញឹមកម្ពុជា មានបុគ្គលិក២៦នាក់កំពុងធ្វើការដោយមានការបែងចែកជាក្រុម ក្នុងនោះមានក្រុមសាងសង់ដែលធ្វើទ្វារ ខាងផលិតដែលផលិតជាតុទូ កៅអី និងក្រុមជួលជុល។
កញ្ញា បញ្ជាក់ថា៖ «ដូចកៅអីដែលយើងបានឃើញនៅមុខអាងទឹកនៃរីសត Farmhouse គឺសុទ្ធតែផលិតចេញពីខាងរោងជាងយើងផ្ទាល់តែម្តង សូម្បីតុ ទូ ឬតុញ៉ាំបាយជាដើម»។
កញ្ញាបន្តថា លើសពីនេះ ខាងរោងឈើ ក៏មានការកែច្នៃជ្រញ់ចេញពីដើមត្នោត ដែលអាចលក់ចេញទៅដល់ភ្ញៀវដែលមកស្នាក់នៅកម្សាន្តនៅរីសត Farmhouse។ដោយឡែកសម្រាប់ ផ្នែករីសត Farmhouse ឯណោះវិញ កំពុងបង្កើតការងារដល់បុគ្គលិកជាង៦០នាក់ និងបណ្តុះបណ្តាលជំនាញដូចជា ជំនាញនាំភ្ញៀវ ជំនាញសេវាកម្ម ជំនាញចុងភៅ ជំនាញរៀបចំផ្ទះស្នាក់ និងថែសួនជាដើម។
ជារួមមកសហគមន៍ដែលបង្កើតឡើងដោយអង្គការតុកកែញញឹមកម្ពុជា មានទំនាក់ទំនងវិលជុំជាមួយគ្នា ដើម្បីទ្រទ្រង់នូវគោលដៅសំខាន់មួយគឺការអប់រំ។
គួរជម្រាបដែរថា អង្គការអន្តរជាតិដែលមានឈ្មោះថា Smiling Gecko ឬ«តុកែញញឹម» បានចាប់ផ្តើមដំណើរការរបស់ខ្លួននៅប្រទេសកម្ពុជា កាលពីឆ្នាំ២០១២ ជាមូលនិធិនៃស្នាមញញឹម Gecko Switzerland(SGS)។
ក្រោយមកអង្គការតុកកែញញឹមកម្ពុជាក៏ត្រូវបានបង្កើតឡើងក្រោមគោលបំណងធ្វើឱ្យប្រសើរឡើងនៃការអប់រំ ប្រកបដោយគុណភាពប្រចាំតំបន់តាមរយៈការធានាមូលនិធិគ្រប់គ្រាន់រយៈពេលយូរអង្វែង និងលើកស្ទួយជីវភាពពលរដ្ឋសហគមន៍តាមរយៈកសិកម្មគ្មានគីមី និងគម្រោងតូចៗជាច្រើន៕
